Hnakkus

Íþróttafrétt úr hliðstæðri vídd

2010-01-31T17:50:00.006Z

Lausn fyrir trúgjarna

2010-01-13T08:38:00.003Z

Ég hef verið upptekinn undanfarið við að þróa byltingarkennda vöru sem mun breyta lífi þínu. Pantaðu að minnsta kosti einn kassa handa öllum í fjölskyldunni! Núna er ekki tíminn til að efast!

Af talnaglöggu fólki

2010-01-09T22:19:00.004Z

Ég er búinn að koma auga á aðferðafræðina sem Samfylkingin notar til að sannfæra sig um að við getum borgað Iceasave.

Deila með þremur!

Beiðni frá mér til ykkar

2009-12-31T13:35:00.005Z

Kæru lesendur.

Ég hef haldið þessari síðu úti í ansi mörg ár og skrifað margt misgott, flest þó stórkostlegt. Ég hef hér ritað menningarsögu Íslands einn og óstuddur án þess að taka krónu fyrir, og hef aldrei beðið um neitt í staðinn. Ég hef ekki einu sinni fengið heiðurslistamannalaun svo ég viti til! Síðustu tvö árin hefur mörgum þótt líða langt á milli pistla en hafa ber í huga að ég eyði líklega meiri tíma að meðaltali í hverja færslu en gengur og gerist meðal bloggara. Oft hef ég verið að eyða nokkrum klukkutímum í að skrifa og endurskrifa einn pistil, ekki síst ef ég ákveð að skreyta hann með ódauðlegu meistaraverki úr MS Paint.

Ég veit að mörg ykkar hafa skemmt sér við að lesa þessa síðu í gegnum tíðina og nú vil ég biðja um einn lítinn greiða í staðinn. Greiða sem tekur t.d. talsvert styttri tíma en það tekur mig að spyrða saman mynd af forsetanum og rugguhesti eða að rita nákvæma frásögn í raunsæisstíl af átökum mínum við hræ.

Gerið mér allra náðarsamlegast þann greiða að skrá nafn ykkar á undirskriftarlista til stuðnings þjóðaratkvæðagreiðslu um Icesave.

Helst ættu náttúrulega allir Íslendingar að gera þetta fyrir sig og sína, en ef þið viljið bara gera þetta fyrir mig, þá er það líka í fínu lagi. Ég elska ykkur líka.

Það eru ekki allir sammála um hver besta niðurstaðan úr slíkri þjóðaratkvæðagreiðslu væri, en kannanir sýna að meirihluti þjóðarinnar vill leyfa þjóðinni að eiga síðasta orðið. Sumir segja að þetta mál sé ekki tækt í þjóðaratkvæðagreiðslu, þeir um það. Stjórnarskrá Ísland tekur það skýrt fram að öll lög frá Alþingi þurfi undirskrift forseta, og að hann geti neitað að undirrita þau og þannig sent þau til þjóðaratkvæðis.

Andstæðingar þjóðaratkvæðis segja þessi lög öðruvísi en önnur lög, en stjórnarskráin er ósammála, og stjórnarskrár eru til þess gerðar að menn geti ekki jafn auðveldlega sveigt atburði líðandi stundar að sinni lund.

Það eina sem þín undirskrift þarf að segja er að það sé þinn vilji að þjóðin fái sjálf að ráða sínum örlögum í þessu stóra máli (eða að þú gerir allt sem ég segi af því ég er fokking rosalegur). Niðurstaðan úr þjóðaratkvæðagreiðslunni er alls ekki fyrirfram ljós, og þú ert ekki að taka afstöðu með eða á móti Icesave með því að skrifa undir.

Ég vona að þið hugsið málið vel, fyrir framtíð Íslands, og fyrir gamla. Gleðilegt ár.

p.s. Ef margir taka undir þessa auðmjúku bón og ég fæ að kjósa um Icesave, þá skal ég á móti vera duglegri að eyða frítímanum í skriftir á næsta ári.

Sannleikurinn mun gjöra yður frjáls

2009-11-17T22:25:00.006Z

Guðrún Karlsdóttir, prestur í Grafarvogi, átti stórleik í fréttunum um daginn þegar hún lýsti yfir stuðningi við áætlanir breskra stjórnmálamanna um að láta merkja breyttar og fegraðar myndir í tímaritum og auglýsingum.

"Ég er alveg til í að sjá svona viðvaranir á auglýsingum þegar ég er að skoða...uuhh ehhh...hrukkukremið sem að mig langar í og mig dreymir um að verða sléttari og fallegri"

...sagði sérann spekingslega og bætti svo við að sérstaklega væri þetta mikilvægt fyrir ungar stelpur svo þær færu nú ekki að gera sér falskar væntingar um raunveruleikann.

Á blogginu sínu skrifar presturinn svo: Vandinn er bara sá að þetta eru ekki einu blekkingarnar sem fyrir koma í auglýsingum. Auglýsingar ganga meira og minna út á að blekkja okkur.

Núna er ég kannski að berja dauðan prest...en prestar hafa hingað til ekki beint verið þekktir fyrir ólgandi ást sína á sannleikanum. Guðrún Karlsdóttir og kollegar hennar fá vel greitt fyrir að telja fólki trú um að almáttug vera hafi skapað allan alheiminn til þess eins að gera langdregna félagsfræðitilraun á tvífætlingastofni sem hún plantaði á eina af skrilljón plánetum himingeimsins. Prestarnir hafa það beinlínis að ævistarfi sínu að troða því inn í hausinn á fólki að þessi almáttuga, algóða og alvitra vera hafi svo miklar áhyggjur af hegðun okkar, og þá helst kynlífshnoðinu, að hún hlusti á allt og heyri allt og hendi okkur í eilífðarbál af eintómri umhyggju ef við sitjum ekki stillt og bíðum dauðans á þessum skitnu áttatíu árum sem hún skammtar okkur. Þetta hlýtur að teljast óvenjulegt tómstundargaman hjá gaur sem getur skapað heilan alheim?

"LoL...setjum á þau kynfæri sem er ýkt stuð að juða við önnur kynfæri, og kveikjum svo í þeim ef þau fatta ekki að fara til hempuklædds embættismanns og fá ríkisvottun á juðið fyrst...lololol. Hey, og látum embættismennina allavega fá hálfa milljón á mánuði af skattfé, k"

Þessu vilja prestar að þú trúir, en hafa á sama tíma þungar áhyggjur af ónákvæmum myndum í auglýsingum fyrir krem sem einhverjir vitleysingar halda að geti snúið við öldrun húðarinnar?

En batnandi fólki er best að lifa og í anda þessarar nýju sannleiksbyltingar útbjó ég nokkrar endurbættar Jesú myndir með viðeigandi viðvörunum sem Séra Guðrún getur tekið með sér í sunnudagaskólann svo ungar stúlkur, og drengir, verði ekki óraunverulegum eða fegruðum ímyndum að bráð.

Kommaborgarar

2009-10-26T00:14:00.001Z

Hamborgarar - morðtól feðraveldisins

Sjaldan hef ég orðið vitni að annarri eins gleði og í dag þegar tilkynnt var að McDonalds hamborgarar yrðu ekki framar á boðstólnum á Íslandi. Það var engu líkara en að íslenskt boltalið hefði gert jafntefli í vináttulandsleik. Internetið orgaði af kæti og ljóst mátti hverjum manni vera að mikil illska hefur legið yfir landinu síðan Davíð sonur Odds grúfði sig yfir staðlaða hamborgaralufsu seint á síðustu öld, og tætti hana í sig af slíkri áfergju að svartur makkinn hristist tryllingslega dágóða stund á eftir. Sá hrokkni skrattakollur hefði eins getað steikt fjallkonuna á teini og sogið kjötið af beinum hennar, svo mjög hryllti þjóð hans við ónáttúrunni sem hún varð vitni að, og hefur lifað með síðan.

Svo mikill var léttirinn vegna skyndilegs brotthvarfs hamborgararisans að þjóðmálaþjarkurinn Egill Helgason bloggaði tvisvar um málið. Í fyrri færslunni lagði Egill til að örlög síðasta McDonalds borgarans yrðu þau sömu og hins fyrsta - að Davíð Oddsson fengi að slafra hann í sig með viðhöfn. Í seinni færslunni var Egill orðinn öruggur með meðbyrinn og gekk svo langt að kalla það "dásamlegt frelsi að hafa ekki lengur McDonalds á Íslandi."

Ég vissi að Davíð hefði gommað í sig fyrsta hammaranum...og ég get ekki enn útilokað að hann verði við áskorunum um að éta þann síðasta...en ég vissi ekki að Egill hefði verið neyddur til að éta alla hina! Það myndi allavega fara langleiðina með að útskýra kátínuna og léttinn. Og ýmislegt annað reyndar líka.

Í kommentum ver Egill svo Þórðargleði sína með vísun í hversu illa miðborg London sé haldin af keðjuvæðingu sem aftur ýti undir einsleitni, og virðist hann þess fullviss að Skeifan muni blómstra sem suðupottur þjóðlegrar menningar nú þegar McDonalds er á bak og burt. Án efa mun hamborgaramusterið "Metró" njóta góðs af þegar aðalmenningarviti landsins fer að gera komur sínar tíðar í Skeifuna í leit að borgara með sál.

Vefborgarinn Egill McSpegill

Þar sem Egill snobbar fyrir öllu sem franskt er, að undanskildum kartöflunum á McDonalds (sá fyrsti sem bendir mér á að þær séu ekki franskar í alvöru verður laminn), er ekki úr vegi að rifja aðeins upp reiðibylgju mikla sem gekk yfir nýlega þegar fréttist að opna ætti McDonalds útibú á Louvre safninu í París. Frönsk "menningarelíta" gekk þá af göflunum af bræði ásamt allskyns fólki um víða veröld sem á það helst sameiginlegt að hata McDonalds og að hafa aldrei stigið fæti inn í Louvre.

Það vill svo til að ég hef skolast með túristaflaumnum um gervalla ganga Louvre og endaði sú för einmitt á eina veitingastað safnsins, franskri kaffiteríu þar sem þjónustan var svo yfirgengilega ömurleg, og maturinn svo viðurstyggilega ógeðslegur, að ég myndi fyrr éta upp úr ruslinu á McDonalds en að stíga þar fæti inn aftur. Þar var mér gert að velja mér heitan mat úr hlaðborði og því næst látinn standa í biðröð við afgreiðslukassa í korter á meðan heiladauð frönsk stúlka taldi mynt úr lófa gesta á hraða snigilsins. Á meðan kólnaði maturinn gjörsamlega sem kom þó ekki að sök því hann var svo innilega fokking viðbjóðslegur á bragðið að maður óskaði þess næstum að Jóhanna Vigdís hefði staðið við pottana. Þegar ég loks lauk máltíðinni, kjökrandi, og skrönglaðist eftir sterkum kaffibolla til að drepa óbragðið, komst ég að því að ég þurfti að fara aftur í biðröðina til að kaupa Louvre gervimynt í kaffivélina fyrir alvöru myntina sem ég var með í hendinni. Af því það meikar fullkomið sens að flækja allt sem mögulega er hægt að flækja, enda túristar bara McDonalds elskandi ómenningarlegt hyski upp til hópa.

Ekki man ég eftir því að margir úr frönsku menningarelítunni hafi komið mér til varnar þar sem ég sat og kúgaðist á þjóðlegri franskri fiskisúpu sem bragðaðist eins og uppþvottarvatn andskotans. Enginn franskur menningarviti kom aðvífandi á hárréttu augnabliki, löðrungaði illa gefnu afgreiðslustúlkuna úr sæti sínu og afgreiddi mig áður en viðbjóðurinn minn kólnaði. Samt mæta þeir froðufellandi um leið og einhver athafnamaðurinn lætur sér detta í hug að fara í samkeppni við þeirra ástsæla eiturbras með því að bjóða ódýran, temmilega ætan mat og hraða afgreiðslu fyrir svanga gesti sem eru búnir að labba mörg hundruð kílómetra á marmaragólfum Louvre. Þvílík skömm fyrir Franska matarmenningu! Sacre bleu!!

McDonalds máltíðin sem ég fékk mér eftir að ég slapp af safninu var bragðbesta fokkjú merki sögunnar.

Ekki þarf heldur að leita langt yfir skammt til að finna óætan mat hér á hjartahreina Íslandi. Fyrir skömmu álpaðist ég til dæmis inn á veitingastaðinn "Red Chili" á Suðurlandsbraut þar sem hreinræktaðir Íslendingar færðu okkur örbylgjaðar quesadillur með gerviostasósu á milli í stað alvöru osts. Þessi óstaðlaði ófögnuður kostaði tvöfalt meira en Big Mac máltíð og þó kom engin ill samsteypa að tilurð hans.

En að öllu gamni slepptu þá þykir mér gleðibylgjan við brotthvarf McDonalds vægast sagt undarleg. Ekki það að ég hafi búist við gráti og gnístan tanna heldur, eða neins konar tilfinningaflóði yfir höfuð. Mér finnst einfaldlega sérkennilegt að fólk sem augljóslega borðar ekki McDonalds borgara (nema í mesta lagi í laumi á meðan það hýðir sig með íslenskum birkihríslum) skuli láta sig það svona miklu varða að nú verði þessi tiltekna hamborgarategund ekki lengur fáanleg á landinu. Hver er ávinningurinn? Sama fólk heldur væntanlega áfram að borða EKKI McDonalds eins og venjulega svo eini munurinn verður að þeir sem hafa fílað að borða McDonalds geta það ekki lengur. Ekki vegna þess að þá langi það ekki, heldur vegna þess að það er ekki lengur hagkvæmt að flytja inn matvöru til Íslands og endurselja á þolanlegu verði. Er það allt og sumt sem þarf til að kæta fólk? Skýra sönnun þess um að peningarnir þeirra séu einskis virði lengur?

Það væri kannski ráð að gera örstutt hlé á fagnaðarlátunum, renna lauflétt yfir innkaupastrimlana sína og athuga hversu stór hluti af matarinnkaupum heimilisins á uppruna í öðrum löndum? Spá svo aðeins í því hvaðan olían á landbúnaðarvélarnar okkar kemur? Vélarnar sjálfar jafnvel líka, dýrafóðrið, áburðurinn og umbúðirnar? Kommaborgarar vaxa ekki bara á trjánum.

Næst væri ekki úr vegi að horfa aðeins í kring um sig og spyrja sig spurningar sem liggur beint við?

"Hvernig lönd eru það sem eru svo lánsöm að hafa engan McDonalds stað?"

Það gleður mig að þið spurðuð. Ég gróf nefnilega upp lista yfir þau lönd sem hafa, eða hafa ekki, McDonalds staði.

Af stöðum sem hafa McDonalds staði má nefna Bandaríkin, Bretland, nærri öll Evrópulöndin, og flest önnur lönd heimsins þar sem helsti gjaldmiðillinn er ekki búfénaður og þar sem bleiknefjum er ekki sjálfkrafa fórnað til heiðurs skrattanum sjáist þeir á ferli.

Af löndum sem ekki hafa McDonalds staði má nefna Albaníu, Afghanistan, Nígeríu, Vatíkanið, Kiribati og Suðurskautslandið.

Semsagt...í löndum þar sem fólk detoxar með því að borða albínóa, selur dætur sínar fyrir geitur, tilbiður gamlan mann í kjól, eða þar sem mörgæsir eru einu tvífætlingarnir...þar þarf heldur enginn að þola nærveru McDonalds veitingahúsa.

Nú vitið þið allavega um nóg af frábærum McDonaldsfríum sumaleyfisstöðum!

Hjátrúarbragðafræði

2009-09-20T18:20:00.005Z

Ég er orðinn þreyttur á að heyra fólk sem heldur að það sé nútímalegt og frjálslynt segja að almenn trúarbragðakennsla eigi að koma í stað kristinfræðikennslu. Það er ömurleg hugmynd. Næstum því jafn ömurleg og kenna kristinfræði til að byrja með.

Kristinfræði heitir reyndar "kristnfræði, siðfræði og trúarbragðafræði" núna svo að aðdáendum trúarbragðafræði virðist hafa orðið að ósk sinni að hluta án þess þó að taka eftir því miðað við hversu oft ég þarf að hlusta á einhvern segja mér að trúarbragðafræðsla væri þokkalega málið.

"Ég vil fræðslu um öll trúarbrögð svo að í staðinn fyrir að þurfa að læra um eitt úrelt og heimskulegt hjátrúarkerfi þurfi börnin mín að sóa æsku sinni í að læra um þau öll!! lol!"

Þetta þarf ég að hlusta á reglulega hvar sem ég kem. Það er ekki furða að ég sé reiður og svartsýnn að eðlisfari.

Margir eru að vísu búnir að átta sig á því nú til dags að kristinfræðikennsla í skólum er fornaldarsteypa og fánýti, sérstaklega í opinberu skólakerfi með miðstýrða námsskrá. Flestir eru samt ekki að fatta kjarna málsins eða þora ekki að fara fram á alvöru umbætur. Þeir viðurkenna að það sé tímaskekkja að leggja heilt fag undir utanbókarlærdóm upp úr biblíusögunum og þeir viðurkenna líka að illa dulið kristið trúboð eigi ekki heima í barnaskólum. En í staðinn fyrir að draga rökréttustu ákvörðunina í stöðunni og henda kristinfræðinni bara út um gluggann er gripið til ruglingslegrar málamiðlunar og heimtað að hið opinbera taki að sér að kynna allar heimsins ranghugmyndir fyrir ungviðinu á kerfusbundinn hátt.

Ég skal koma með villta hugmynd hérna. Hvernig væri að hætta alveg að eyða verðmætum tíma og skattpeningum í að kenna börnum gamlar flökkusögur og kenna þeim eitthvað praktískt í staðinn? Hvernig væri að hætta að gera trúarbrögðum hærra undir höfði en öðrum hugmyndum manna um heiminn?

Það er alveg nóg að renna í gegnum helstu óra forfeðra okkar í mannkynssögutímum og skoða hvaða áhrif þeir höfðu á söguna. Það þarf ekkert sér fag undir stök trúarbrögð né undir einhvern fjölmenningarlega umburðarlyndan hjátrúarkokteil. Það er andskotans nóg af mikilvægara efni sem er hægt að kenna krökkum. Til dæmis væri hægt að fræða þau um vísindaleg vinnubrögð, efahyggju og sjálfstæða hugsun svo verði ekki trúarbrögðum að bráð og endi sem kristnifræðikennarar eða eitthvað þaðan af verra.

Væl og málamiðlanir eru fyrir aumingja. Ef ég væri menntamálaráðherra þá myndi ég útrýma kristnifræði með einu karlmannlegu pennastriki án þess að eyða einni sekúndu í að hugsa mig um. Svo myndi ég bara fara úr að ofan og berja alla sem væru með eitthvað múður yfir því.

Ég yrði frábær menntamálaráðherra.

Forseti Íslands að ríða

2009-09-16T23:03:00.000Z

Óla fannst gaman að ríða,

Óþekkum bykkjum og folum,

Hrossin því hent'onum víða,

Svo öxlin var gjarnan í molum.

Óheppnin elti svínið,

Það varð honum þó til lífs,

Að fallið tók af honum trýnið,

Ólíkt Christopher Reeves.

Frá Bessastöðum senn ríður,

Þjóðin komin með nóg,

Ég gleðst ef þá hans bíður,

Starf í ródeó.

Hryllingsmyndir, brennivín, skeinipappír og grátandi hippar.

2009-09-15T22:16:00.002Z

Baldvin bræðurnir á góðri stundu

Jón Baldvin og Bryndís Schram eru landsmönnum af góðu kunnug. Bryndís fyrir að hnefa tuskuhrafn í afturendann í svarthvítum barnaþætti snemma á síðustu öld, og Jón Baldvin fyrir að tala furðulega.

Í dag sagði fréttamiðillinn Vísir.is frá fréttnæmri bíóferð þeirra skötuhjúa. Þau hjúin skelltu sér á skandínavísku hryllingsmyndina "Antichrist" og bjuggust eðlilega við því að njóta hugljúfrar kvöldstundar í glampa stóra tjaldsins. Hryllingsmyndin reyndist aftur á móti vera nokkuð hryllileg öllum að óvörum. Jón Baldvin rauk út í hléi og skildi vesalings Bryndísi eftir eina í myrkrinu, stjarfa af ófögnuði. Jón Baldvin tekur það sérstaklega fram í fréttinni að hann hafi ekki grautað á nærstadda eins og ónefndur kvikmyndagestur lét víst eftir sér. "Ég er lífsreyndur maður" sagði hann furðulegum rómi og virkar nokkuð rogginn þrátt fyrir að hafa verið nýbúinn að flýja undan kvikmynd (ég horfði á The shining þegar ég var sjö ára).

Bryndís kláraði myndina en var að eigin sögn í svo miklu andlegu og líkamlegu lamasessi eftir glápið að hún neyddist til að sturta í sig kynstrunum öllum af brennivíni til þess eins að jafna sig. Hvort hún grautaði af allri þessarri óheppilegu en nauðsynlegu drykkju fylgdi ekki sögunni. En það eitt að Bryndís skyldi bregða svona svakalega út af vananum eftir að horfa á þessa mynd er ekkert nema ögrun í mínum eyrum!

Nú þarf ég að horfa á þessa mynd til enda og sanna að ég sé bæði hugaðri en Jón Baldvin og betri á taugum en Bryndís. Ef mér tekst að horfa á myndina alla án þess að drekka frá mér ráð og rænu í kjölfarið þá er ég klárlega harðari en þau bæði til samans. Meira þarf ég ekki í lífinu.

Ég læt ykkur vita hvernig gengur. Nema þið lesið um það á Vísi.

~~~

Hitt stórmál dagsins er mál klósettrúllukastarans og hans loðnu vina. Á borgarstjórnarfundi í dag varð klósettrúllukastaranum svo heitt í hamsi að hann kastaði klósettrúllunni sinni í átt að borgarstjórn ofan af áhorfendapöllum. "Hafið þetta auðvaldskúkarnir ykkar!" kýs ég að ímynda mér að hann hafi skrækt um leið og varpaði rúllunni niður í borgarstjórnargryfjuna...."Ég skeini mér bara á kjörseðlum eða eitthvað!".

Að sjálfsögðu voru borgarfulltrúarnir aldrei í hættu enda handleggir klósettrúllukastarans vafalaust grútlinir og rýrir af tófúáti og teþambi. Nærstaddir lögreglumenn létu engu að síður snarlega til skarar skríða gegn þessum góðkunningjum sínum eins og þeim ber að gera þegar fólk hendir ótilgreindum hlutum í átt að stjórnmálamönnum. Rangeygðir rindlar eru þar ekki undanþegnir.

Loðnu vinir klósettrúllukastarans brugðust ekki væntingum og reyndu afar fyrirsjáanlega að hindra lögregluna í að leiða hann úr salnum til þess að verða ekki af sínum skerf af sætu lögregluofbeldinu. Minnugir allra skiptanna sem þeir hafa haft lögregluna undir í handalögmálum héngu loðnu vinirnir á klósettrúllukastaranum eins og einhvers konar beðja af athyglissjúkri óskhyggju.

Allt þar til lögreglan sannaði að þeir sem nenna að gera armbeygjur sigra í lífinu, og leysti úr flækjunni á nokkrum sekúndum. Armur laganna þjáist ekki af prótínskorti.

Leiftursnögg kennslustund í borgaralegri óhlýðni

Hvaða lexíu má svo læra af þessarri uppákomu?

Helst þá að maður á ekki að grenja yfir því sem er fyrirsjáanlegt heldur taka afleiðingunum eins og karlmaður. Sjáið íraska skókastarann. Hann er alvöru töffari og með prýðilegan kasthandlegg að auki. Þegar hann ákvað að henda skónum sínum í Bush bjóst hann helst við því að verða skotinn á staðnum og hann var tilbúinn að taka þeim afleiðingum. Hann kveinkar sér líka minna eftir 9 mánaða fangelsi og pyntingar en klósettrúllukastarinn og félagar gerðu rétt á meðan á handtökunni í dag stóð. Skókastarinn fær líka helling af peningum og kvenfólki gefins af því hann er svo ógeðslega kúl. Hvað ætli klósettrúllukastarinn fái margar konur gefins fyrir sína atlögu? Ég ætla að giska á enga. Í mesta lagi fær hann laust hi-five frá loðnu vinunum.

Hvernig héldu þeir félagarnir að þetta myndi enda? Fyrst kasta þeir drasli í átt að borgarstjórn, reyna svo að hindra lögregluna í að handtaka sig og góla þar næst eins og stungnir grísir þegar handleggjunum á þeim er komið haganlega fyrir efst á bakinu þar sem þeir eiga heima.

Sumir myndu freistast til að giska á að löngunin til að verða píslarvottur í fangi stælts lögreglumanns væri drifkrafturinn að baki svona hegðun...eins og þegar maður eyddi heilu dögunum í að stríða stelpunum í sjö ára bekk. En að sjálfsögðu er einungis um óeigingjarnt hugsjónastarf að ræða.

"En Hnakkus! Borgarstjórnin er vond og á skilið að fá skeinipappír í andlitið...eða í gólfið við hliðina á sér af því ég kasta eins og stelpa!"

Já já, það má vel vera. Fullt af fólki á skilið að fá alls kyns drasl í andlitið. En ef ég ákveð að útdeila slíku réttlæti þá ætla ég ekki að væla þegar löggan snýr upp á hendina á mér í kjölfarið og hendir mér upp í bíl. Það er það sem löggur gera. Þær fá meira að segja borgað fyrir það. Fullt af fólki myndi örugglega snúa upp á handlegginn á mér frítt ef það gæti svo það væri hálf bjánalegt að fara að erfa slíkt við lögguna ef ég tæki upp á því að vera með ólæti beint fyrir framan nefið á þeim.

Kastljós

2009-09-07T10:49:00.000Z

Rantur dagsins

2009-09-02T22:40:00.005Z

Núna er Alþingi búið að láta plata sig til að samþykkja Icesave nauðungasamninginn fyrir okkar hönd og þar með gera okkur lagalega ábyrg fyrir skuld einkabanka sem okkur bar ekki nokkur skylda til að hirða. Fyrirvararnir sem tókst með herkjum að troða inn eru vissulega milljón sinnum skárri en upprunalegi viðbjóðurinn sem hefði án nokkurs einasta vafa keyrt okkur lóðbeint í greiðsluþrot. En þeir eru samt sem áður bara fyrirvarar við auma uppgjöf.

Ef það verður einhver hagvöxtur næstu ár þá fer hann beint í vasa Breta og Hollendinga. Þegar ríkisstjórnin hækkar á okkur alla mögulega skatta á næstunni, getum við yljað okkur við það að góður slatti af peningunum okkar fer beint úr landi að óþörfu.

Icesave málið var aldrei flókið þó margir hafi gert sitt besta til að flækja það. Okkur var hótað öllu illu ef við samþykktum ekki að búa til ríkisábyrgð á einkaskuld þar sem engin ríkisábyrgð var til staðar. Við guggnuðum og gáfum eftir í stað þess að láta reyna á innantómar og fráleitar hótanir. Kúba norðursins? Er fólk eitthvað vangefið að falla fyrir svona rugli?

Árni Þór á Kúbu syðri. Augljóslega stórhneykslaður á ástandinu.

Margir hafa dregið Jón Sigurðsson inn í umræðurnar og velt því fyrir sér hvað honum myndi finnast. En hverjum er ekki sama? Ég hef allavega enga þolinmæði í Jón Sigurðsson. Ef ég ætti tímavél myndi ég frekar ná í Egil Skallagrímsson og renna yfir málið með honum. Hann myndi vera snöggur að kenna Alþingiog 20% þjóðarinnar að finna á sér hreðjarnar...rétt áður en hann sliti þær af.

Egill myndi ekki fá að taka upp úr töskunum áður en ég væri búinn að senda hann heim til Steingríms. Enginn hefur logið af jafn mikilli ákefð og Steingrímur.

Fyrir kosningar laug Steingrímur því að hann væri á móti því að ábyrgjast Icesave, daginn fyrir undirritun laug hann því að engar samningaviðræður væru í gangi, því næst laug hann því að það væri ekki hægt að sýna þingi eða þjóð samninginn, svo laug hann því að fyrirvarar jafngiltu höfnun samningsins og núna lýgur hann því að fyrirvararnir séu bara fín lending.

Ef hann væri með X-D nælu á barminum væri pottþétt búið að lemja hann til dauða með pottum og pönnum.

Fyrst eftir hrun fannst mér fólk aðeins vera að byrja að endurskoða liðasystemið en núna eru allir dottnir í sama gírinn og gamla fótboltapólitíkin er sterkari en nokkru sinni fyrr. Fólk virðist trúa því í einfeldni sinni að einhvern tíma í fyrndinni hafi verið skipt í „vonda og góða“ eins og í Star Wars. Og að sjálfsögðu eru allir í góða að eigin mati.

Hvað er gert, og hverju er logið skiptir ekki máli svo lengi sem það er gert í þágu rétta liðsins. Spuni, klíkuráðningar, bolabrögð, sjálfsskömmtun og útúrsnúningar eru í fínu lagi svo lengi sem Sjálfstæðisflokkurinn kemur hvergi nærri.

Ég bíð spenntur eftir deginum þegar allir aðrir en ég fatta að það skiptir ekki máli hvaða blöndu af siðblindingjum við kjósum til valda í núverandi kerfi. Ég bíð spenntur eftir því að fólk uppgötvi að það eru engir stjórnmálamenn í okkar liði. Það eru bara við á móti þeim.

Ég lýg því reyndar að ég bíði spenntur. Flestir munu aldrei fatta þetta.

Það besta við Icesave svikin er að nánast allir stuðningsmenn þeirra studdu þau í heilu lagi, alveg frá upphafi, löngu áður en byrjað var að tala um fyrirvara. Núna þykjast allir hafa viljað fyrirvara og þykjast ekki hafa haft áhuga á að samþykkja samningsdrullu Svavars og Steingríms í upprunalegri mynd. "Google afrit" eru til staðar ef einhver vill þræta.

En ég ætla ekki að ljúka þessum ranti án þess að minnast aðeins á ástkært sameiningartákn okkar (þú hélst örugglega að þú værir sloppinn Ólafur, liðleskjan þín!). Einhverjir létu sig dreyma um að hann færi allt í einu að taka upp á því að vera samkvæmur sjálfum sér...eða eitthvað, og að hann myndi hafna þessu Icesave frumvarpi til að gefa þjóðinni úrslitavald í eigin málum. Nú er ég temmilega svartsýnn einstaklingur svo það er kannski ekki að marka mig...en hvaða sataníska E-pillutrippi voru þeir á sem nenntu að keyra alla leið upp á Bessastaði til að afhenda Ólafi formlega beiðni um að dusta rykið af hreðjunum á sér?

Fyrir utan að vera augljóslega pólitískt hlutdrægur og tvöfaldari en rúlla af Bónus salernispappír, þá er Ólafur án vafa gagnslausasti jólasveinn sem nokkurn tíma hefur haldist á starfi, hvað þá starfi þjóðhöfðingja. Ef hann er ekki belgjandi í sig kampavíni í einkaþotum glæpamanna eða haldandi óskiljanlegar leiðindaræður um ekki neitt, þá er hann myljandi í sér beinin við að hrynja ofan af íslenskum smáhestum! Hvað í andskotanum er það?? Af hverju getum við ekki frekar fengið Hallbjörn Hjartarsson sem forseta? Þeir félagarnir meika kannski álíka lítið sens en Hallbjörn getur þó setið klofvega á pínulitlu hrossi án þess að verða sér til skammar.

Augnabliki áður en ógæfan dundi yfir

Ef einhver er með ranghugmyndir og heldur að Ólafur sé alvöru forseti, þá vil ég benda á Pútín fyrrverandi Rússlandsforseta til samanburðar. Hann er alvöru harðjaxl og væri flottur hér. Pútín er með svarta beltið í júdó, tekur ósvífna milljarðamæringa í bóndabeygju og þeysist um ber að ofan á fullvöxnum hestum án þess að enda í öndundarvél. Að vísu er hann helvítis fasisti og lét drepa stöku rannsóknarblaðamann hér og þar...en hann myndi falla vel í kramið á Íslandi samt sem áður. Íslenskir blaðamenn eru hvort eð er svo slappir að þeir væru aldrei í teljandi hættu. Allir myndu sigra!

Ólafur hver?

En við sitjum víst uppi með Ólaf í bili. Sem minnir mig á það...

Hver er munurinn á Ólafi Ragnari og Christopher Reeve? Þeir eru báðir lélegir hestamenn en annar er örlítið meiri grís! Búrumm tsssj.

63 krónur

2009-08-19T20:07:00.001Z

Ósæmileg meðferð á líki

2009-08-14T15:21:00.002Z

Í gærkvöldi gerði ég heiðarlega tilraun til að þröngva hálffullri bjórdós upp í afturenda líks með miður góðum árangri. Bjórinn var af gerðinni gylltur Viking sem mér þykir sérlega góður bjór þó hann sé orðinn allt of dýr í seinni tíð.

En þið viljið væntanlega frekar heyra um líkið en bjórinn.

Þær eru skrýtnar kringumstæðurnar sem maður finnur sig í á stundum. Bjórdósin tæki vafalítið undir það hefði hún á því tök. Þegar ég vaknaði í gærmorgun sá ég ekki fyrir að ég ætti ég eftir að standa í eldhúsinu organdi af bræði, með blóðuga og krumpaða bjórdós í höndunum alsetta kjöttægjum.

En svo langaði mig í kjúkling.

Ég lagði leið mína á alnetið í leit að skemmtilegri uppskrift og rakst á myndband af manni að matreiða bjórdósarkjúkling að hætti rauðhálsa. Uppskriftin er í stuttu máli svona:

1 heill kjúklingur
Hálf bjórdós
Krydd að eigin vali

Kryddið kjúklinginn

Þröngvið hálfri bjórdós upp í óæðri endann (á kjúklingnum)
Látið hann standa upp á endann á lokuðu grilli í 45-60 mínútur

Hljómar einfalt ekki satt? Ég held meira að segja að það þurfi talsverða útsjónarsemi til að klúðra þessarri einföldu og ósiðlegu athöfn. En sem betur fer fyrir ykkur er ég útsjónarsamur maður.

Allt fór vel af stað og gekk að óskum. Sérstaklega skylduþambið í upphafi. Hálfur bjór hvarf á mettíma og ég var tilbúinn að leggja hendur á hinn látna.

„KOMDU TIL PÁPA!“ hrópaði ég kátur og bjóst til að reka kalt álið á bólakaf í steindauðan málleysingjann. En ekkert gerðist.

„Djöfuls vesen...“ tautaði ég og ýtti fastar og fastar án þess að neitt gerðist. „Plúpp!“ sagði kjúklingurinn þegar hann skaust úr hendinni á mér og skautaði eftir borðinu, augljóslega harður á því að verja sóma sinn með öllum ráðum.

„Helvíti er þetta þröngt!“ Urraði ég og bölvaði smávöxnum íslenskum kjúklingum í sand og ösku. „Geta þeir ekki dúndrað í þetta sterum eins og í öðrum iðnvæddum löndum svo maður geti troðið almennilega í þetta!“

Nú dygðu engin vettlingatök. Ég stillti dósinni á borðið, togaði og teygði kjúklingsræfilinn til í gríðarstórum hrömmum mínum með tilheyrandi braki og brestum, og bauð honum góðfúslega til sætis.

„HNNUUUGH!!“ sagði ég og togaði vængina fast suður á bóginn svo lá við að þeir rifnuðu af. „Tylltu þér félagi!! GNNHGG!“.

„KRONNKHLLL“ gargaði bjórdósin um leið og hún lagðist saman og frussaði rándýrum bjór í allar áttir, Kveingrími Joð eflaust til ómældrar ánægju. „GAARHGGH“&/#%!“ gól ég og horfði á andstæðing minn liggja makindalega á bakinu með krumpaða og rifna áldós standandi lengst út úr öðrum endanum og gylltan bjórlæk vætlandi úr hinum.

Á þessum tímapunkti hefði venjulegur maður tekið upp símann og pantað pizzu. En ég er enginn venjulegur maður . Ég er maður sem hugsa í lausnum. Endalausnum.

Helvítis hænan skyldi á grillið.

Ég reif upp ísskápshurðina og rak strax augun í dós af Red Bull sem var talsvert grennri en hálfs líters bjórdósin og mun vænlegri til myrkraverka. Ég opnaði annan bjór, gommaði helmingnun í mig gegnum ótímabært sigurglottið, tæmdi Red Bull dósina í vaskinn og endurfyllti hana af bjór.

Þrátt fyrir fínlegan vöxt dósarinnar gekk enn brösulega að koma henni á sinn stað með góðu móti. Á þessum tímapunkti var mig mest farið að langa til að troða kjúklingnum upp í rassgatið á hressa fíflinu í YouTube myndbandinu fyrir að láta þetta virka auðvelt með kvikmyndagöldrum og hólkvíðum sterahænum.

En loks hófst það! Dósin juðaðist inn með heilmiklu brambölti og blautu brakhljóði. Ég stillti fuglinum upp á endann, geislandi af stolti og sté sigurdans. Þar sem ég dansaði fugladansinn í trylltri sigurvímu varð mér litið á kjúklinginn útundan mér.

Eitthvað var ekki eins og það átti að vera.

Ég fór að rifja upp gamlar líffræðilexíur og myndefni sem ég hef séð í gegnum tíðina af lifandi hænsnfuglum. Í minningunni sneru fæturnar á þeim í átt til jarðar en ekki í átt til himins. Sömuleiðis hefði ég getað svarið að vængirnir höfðu alltaf verið staðsettir ofan við lappirnar en ekki lafað niður á átt að jörðu. Minn kjúklingur virtist öðruvísi byggður þar sem hann stóð á „höndum“ og gerði grín að mér.

„FUUUUUUUUUUUUU!!!!1111“ hrópaði ég svo undir tók í fjöllunum. Ég hafði alveg óvart þvingað fuglsræfilinn til að „deep throata“ bannsetta bjórdósina!

Ég reif dósina út, sturtaði bjórnum aftur í bjórdósina sem hann kom úr, og renndi henni því næst án nokkurrar fyrirstöðu upp í fjósið á illfyglinu. Hinn endann varð ég að festa með grillpinnum svo dósin kæmi ekki hoppandi út um gauðrifinn hálsinn.

Skömmu síðar fékk hinn svívirti fugl útför að hætti víkinga þegar kviknaði í grillinu.

Ég ætti þokkalega að vera með matreiðsluþátt í sjónvarpinu.

Stærstu mistökin

2009-08-12T14:40:00.003Z

Stærstu mistökin í Icesave málinu voru gerð þegar Kveingrímur Joð laumaðist til að skrifa undir samkomulag sem haldið hafði verið rækilega leyndu fyrir þingi og þjóð. Mögulega mætti líka telja til samþykki meints forsætisráðherra fyrir téðri undirskrift...þar sem ekki var búið að þýða samninginn á þeim tímapunkti og hún því ófær um að lesa hann sjálf. En afleiðingin var undirritaður samingur sem enginn hafði fengið að sjá. Það verða að teljast stærstu mistök aldarinnar. Allt annað sem hefur farið úrskeiðis í Icesave ferlinu er tittlingaskítur miðað við þessi risavöxnu mistök. Og það er eiginlega fráleitt að kalla þetta mistök. Það kallast mistök þegar einhver rennur á bananahýði...eða kúkar í buxurnar á leiðinni heim úr skólanum í tíu ára bekk (já, ég þori að viðurkenna eigin mistök ólíkt sumum).

Að gera leynilegan samning um framtíð þjóðarinnar og undirrita hann áður en þjóð eða þing fær tækifæri til að kynna sér hann er ekkert annað en svik af verstu gerð. Skítleg drullusokkataktík til þess eins gerð að mála okkur út í horn áður en við höfðum tækifæri til að hafa áhrif á niðurstöðuna.

Að senda hálfvita eins og Svavar Gests til að semja fyrir okkar hönd var í raun miklu minna klúður en að stelast til að undirrita saminginn. Ef samningurinn hefði verið kynntur, ræddur og um hann greidd atkvæði ÁÐUR en Kveingrímur vottaði hann með ráðherraundirskrift, þá væri staðan önnur í dag. Þá hefði mín vegna mátt senda Stjána Stuð til að semja fyrir okkar hönd. Bara svo lengi sem við hefðum fengið að meta niðurstöðurnar FYRIR undirskrift. Þegar öllu er á botninn hvolft er ég ekkert svo frá því að Stjáni hefði komið heim með miklu betri samning eftir að hafa brætt hjörtu erlendu samninganefndanna með fríum pítsum og stanslausu stuði. Ég veit að ef ég þyrfti að sitja í loftlausu fundarherbergi og semja um eitthvað við leiðindadrumb eins og Svavar Gests, þá væri ég fljótt farinn að óska þess að ég væri í pítsupartíi með Stjána Stuð einhversstaðar langt langt í burtu.

Síðan myndi ég semja af Svavari aleiguna bara til að hefna mín.

En af hverju fór Kveingrímur svona að? Það lá ekkert á Icesave málinu í sjálfu sér og þessi flumbrugangur virkar ekki sérlega skynsamlegur. Svo sannarlega ekki út frá hagsmunum Íslendinga, og varla einu sinni út frá hans eigin persónulegu pólitísku hagsmunum sem að sjálfsögðu vega miklu þyngra.

Ástæðan er sú að hann vissi að samningurinn væri drasl og að hann yrði ekki einu sinni samþykktur af hans eigin þingflokki, hvað þá af þjóðinni. Í stað þess að líta á það sem merki um að kannski væri hann búinn að skíta í buxurnar og hringja grátandi í mömmu sína í vinnuna til að fá ráðleggingar um þrif, reif hann upp pennann og stakk okkur í bakið með honum.

Án Icesave undirskriftarinnar hefði Össuri ekki fundist jafn gaman að afhenda ESB umsókn Íslands á einhverjum tussu fundi sem var haldinn 27.júlí og að sjálfsögðu gengur órofið vanvitaglottið á Össuri fyrir öllu. Steingrímur veit að ef hann gerir ekki eins og samfylkingin segir honum, þá má hann ekki vera memm í ríkisstjórn lengur og það myndi þýða endilok vinstri stjórnarinnar langþráðu. Þá er nú skárra að gera bara eins og manni er sagt, jafnvel þó það hlaði skuldum þjófóttra stórkapítalistasvína á herðar skattborgara og brjóti öll fyrri loforð um Icesave, auk loforða um gegnsæi og ný vinnubrögð. Vinstri stjórn að nafninu til er greinilega betri en engin. Sérstaklega á meðan Kveingrímur fær að vera besti vinur aðal.

En nú er útlit fyrir að þetta plott hrynji allt með látum og enn ein vonlausa ríkisstjórnin líði undir lok. Þá verður spennandi að sjá hverjir fá að vera með Samfylkingunni í ríkisstjórn næst!

Og talandi um útlit...

Ég var að enda við að horfa á Kastljósviðtalið við Kveingrím frá því í síðustu viku og er búinn að reita hár mitt og klæði samfellt síðan. Bráðum verður vart hægt að þekkja okkur félagana í sundur.

Kveingrímur er ekki aðeins rúinn trausti, heldur lítur hann út eins og gömul rúin sauðkind þar sem hann starir fram fyrir sig með sljóum, eilítið útstæðum augum, jórtrandi sömu fúlu tuggurnar. Skögultennt rolla sem beitt hefur verið á flúormengaðan haga þannig að geiflurnar passa ekki alveg í munninn lengur. Þrjóskulega húkir hann í sjálfheldu á hárri sillu og neitar að koma niður.

En nú er nóg komið. Röfl um fyrirvara er tilgangslaust og aðeins til að tefja. Samingurinn er drasl og verður að falla. Allir eru búnir að gefast upp á að reyna að tala Steingrím niður af syllunni og bíða óþreyjufullir eftir skyttunni.

Skýrsla seðlabankans um Icesave

2009-08-04T21:37:00.003Z

Ég komst yfir frumritið! Dreifið þessu út um allt áður en þeir setja lögbann á mig!!!111

Takk fyrir samveruna kæru lesendur

2009-07-27T22:29:00.002Z

Árin hafa verið ánægjuleg. Ég er ykkur öllum þakklátur fyrir lesturinn og vona að þið hafið það gott það sem eftir er. Nú skilja leiðir eins og verða vill. Allt hefur sinn enda og það er lítið við því að gera.

Ég man þegar ég byrjaði að skrifa á þessa síðu fyrir löngu síðan. Mig grunaði ekki þá að ég ætti eftir að ná til svo margra. Að ég ætti eftir að eignast svona marga gallharða áhangendur, fá send umslög í pósti með ýmist nærbuxum eða peningaseðlum. Nærbuxurnar voru flestar blúndum prýddar og ekki í minni stærð, en peningarnir komu að góðum notum. Verst með þynnkuna.

Ég var valinn besti bloggari í heimi á eftir sólstrandargæjanum Agli Helga. Að lenda undir honum var vafasamur heiður og ekki eitthvað sem ég er stoltur af.

Ég eignaðist marga góða pennavini, t.d. fyrrverandi varaformann Félags íslenskra þjóðernissinna. Ætli hann sé ennþá að leita að mér?

Meðlimi Live2cruize dreymdi um að keyra mig niður, barnalandsfraukur dreymdi um að festa mig niður, heimdellingar og ungir vinstri grænir vildu leggja mig niður.

En nú er þetta búið. Klukkan 23:15, eftir aðeins tæpa klukkustund mun jarðskjálfti tortíma okkur öllum. Hverjum hefði dottið í hug að Hnakkus hinn mikli, refsari veraldarvefsins og kyndilberi sannleikans, ætti eftir að kremjast undir nokkrum hæðum af steinsteypu og nokkrum ókunnugum nágrönnum eins og hver annar kakkalakki. Það liggur við að maður sakni Egils.

En ekki gráta mig. Þið munið þó ekki þurfa að lifa án mín og syrgja. Og ég hugga mig við það að StebbiFr lifir að öllum líkindum ekki til að skrifa um mig minningargrein.

Og þó. Hann er snöggur af brekkusnigli að vera.

Icesave - af spunaköllum og öðrum sprelligosum

2009-07-01T23:04:00.000Z

Ég var á borgarafundinum á mánudag þar sem Icesave málið var rætt.

Ég er feginn að ég skellti mér í stað þess að stóla á umfjöllun fjölmiðla eins og ég hef oft áður gert. Á fundinum var Steingrími Joð sparkað um eins og loftlausri tuðru af andstæðingum Icesave en þegar ég kom heim voru einu fréttirnar af fundinum í formi fullyrðinga sem hann lét falla í ræðustól. Fullyrðingarnar höfðu allar verið rækilega skotnar í kaf með rökum og dátt hlegið að þeim flestum, en ekki þótti netmiðlum ástæða til að láta það fylgja sögunni.

Steingrímur má eiga eitt, og aðeins eitt. Hann mætti og reyndi að tala fyrir núverandi sannfæringu sinni. Þó veit ég ekki hvers virði sú eign hans er. Hann mætti klárlega aðeins vegna þess að hann heldur að gamli sannfæringarkrafturinn og Morfís eldmóðurinn dugi til að dáleiða þjóðina í að vera til friðs rétt á meðan hann bindur endahnútinn á framtíð hennar.

Ekki sást til Samfylkingarþingmanna sem hafa allir sem einn stutt Icesave svikin frá upphafi, enda liggur samúð þeirra fremur hjá breskum viðskiptavinum draslbanka en hjá skattborgurunum sem kusu þá. Samfylkingarþingmenn mærðu samninginn löngu áður en þeir sáu hann og andlegur leiðtogi þeirra, Jóhanna Sigurðardóttir, hefur ekki ennþá lesið hann...nema þá að hún hafi náð að stauta sig í gegnum hann eftir að hann var þýddur af útlensku í fyrradag.

Steingrímur tekur alla holskefluna sjálfviljugur í smettið af því hann heldur að hann sé búinn nægum persónutöfrum til að selja viðbjóðinn og kaupa sjálfum sér frið næstu sjö árin. Hann hélt að fólkið sem tók undir með honum öll árin sem hann gagnrýndi ólýðræðislegan yfirgang fyrri ríkisstjórna myndi styðja hann núna þegar hann lætur skoltana ganga í þveröfugum tilgangi.

Fyrst þegar Steingrímur tilkynnti um undirskrift Icesave samnings hélt hann að hann fengi þingmenn til að undirrita hann óséðan. Honum fannst það auk þess eðlilegar aðfarir. Því næst hélt hann að honum nægði að sýna samninginn til að allir féllu í stafi. Þegar það virkaði ekki heldur, hélt hann að þetta hlyti að smella ef hann sýndi fylgiskjölin líka. Flest þeirra allavega...þessi sem eru ekki viðkvæm.

En ekki er allt að virka eins og skyldi því eins og staðan er, eru 60% landsmanna á móti, og 19% fylgjandi. Í boltaleik væri sú staða kölluð rúst.

Margir vorkenna Steingrími þessa dagana. Tala um að hlutskipti hans sé ekki öfundsvert og að þrifin séu svo erfið. Mest barmar hann sér þó sjálfur undan þessu öllu...og undir öðrum kringumstæðum hefði ég mögulega fengist til að vorkenna honum smá. En fyrir Íslending er bara eitthvað öfugsnúið við að leyfa rauðhærðum manni að hneppa sig í þrældóm.

Steingrími er að sjálfsögðu ekki nokkur vorkun. Hann er nákvæmlega þar sem hann hefur verið að reyna að komast síðan ég var í barnaskóla. Með rauðbirkið rassgatið í dúnmjúkum ráðherrastól og megnið af atvinnulífi landsins í sinni kommúnísku krumlu. Icesave samningarnir áttu að tryggja honum frið til að halda sér þar, en sem betur fer virðist tvísýnt um það.

Þrifin koma ekki í hans hlut, heldur okkar. Það verðum við sem munum þurfa að strita næstu þrjátíu árin til að reyna að borga Icesave skuldirnar á meðan hann les yfir okkur úr stjórnarráðinu...eða sendir okkur kvislingakveðjur frá Lillehammer.

Getur svo einhver sagt mér hvað það er sem Jóhanna á að hafa gert svona merkilegt? Hvaða snjöllu hugmyndir hafa komið frá henni í gegnum tíðina? Hvaða þrekvirki hefur hún unnið? Hvað skilur hún? Hvað veit hún? Ég hlustaði á hálfa ræðu með henni í þinginu í dag og mér leiddist svo mónótónískt þusið í henni að ég grét. Og ég er ekki einu sinni með tárakirtla! Hún myndi ekki einu sinni ná að halda uppi stuðinu á elliheimili á eyjunni Lesbos!

Hvað í fjandanum er hún að gera í forsætisráðuneytinu skrifandi mig fyrir nauðungarsamningum sem hún hefur ekki einu sinni lesið sjálf?

Þegar Eygló Harðardóttir tók til máls á fundinum og benti á skjalfest dæmi þess að Jóhanna hefði ekki gripsvit á efnisatriðum undirritaðs samningsins æstist Steingrímur allur upp, sveiflaði fingrinum ótt og títt, og skammaði Eygló fyrir þau ódrengilegheit að "tala um manneskju sem ekki væri á staðnum til að verja sig".

Lýðræðisvitund Steingríms er semsagt svo skörp að hann umber ekki tal um orð og getu forsætisráðherra landsins nema hún sé í sama herbergi.

Fjölmiðlar fóru svo enn og aftur á kostum þegar Kastljósið klippti á afhjúpanir Eyglóar á þessu vítaverða getuleysi forsætisráðherrans til að vinda sér yfir í langa og áríðandi umfjöllun um falsaðar Ísfólks bækur.

Annað merkilegt sem kom fram á fundinum var að útreikningar ríkisstjórnarinnar um hvernig ætti að borga Icesave lánið voru ekki til þegar skrifað var undir. Pallborðsmeðlimur frá Indefence spurði þrálátlega hvar útreikningarnir væru og náði loks að kreista svar úr dauðyflislegum aðstoðarsveini Steingríms, Indriða H. Þorlákssyni. Indriði, sem lítur út eins og teikning eftir Brian Pilkington, muldraði í átt að fundargestum að útreikningarnir væru rétt á að detta í hús núna. Ástæðan? Jú, það tekur svo langan tíma að gera svona útreikninga. Á meðan gat hinn síkáti Svavar Gestsson hinsvegar ekki beðið með að klára samninganaviðræðurnar enda leiðinlegt að hafa svona drasl hangandi yfir sér eins og við öll þekkjum.

Um daginn varð heilmikið fjölmiðlafár vegna þess að dóttir Svavars, umhverfisráðherrann, datt á hausinn við hjólreiðar og fékk kúlu á hausinn. Hún getur huggað sig við það að vera ekki lengur það vitlausasta sem Svavar hefur áorkað á sinni ævi.

"Af spunanum skulið þér þekkja þá" sagði skáldið. Ok, ég var að skálda þetta núna. En þetta er dagsatt! Sá sem beitir spunanum hefur rangt fyrir sér.

Á fundinum komu öll sterk rök frá andstæðingum Icesave, en spuninn og útúrsnúningarnir úr búðum fylgismanna. Steingrímur eyddi mestum parti frummælandaræðu sinnar í heljarinnar sögulexíu þar sem hann þuldi löngu opinbera atburðarrás Icesave málsins í smáatriðum, alla leið frá undirritun EES - til dagsins í dag. Með þessu vildi hann freista þess að sannfæra okkur um skort okkar á valkostum í dag. Minnisblöð, símtöl og óheppileg ummæli forvera hans áttu að hafa bundið hendur þings og þjóðar sem værum við heiðursgestir í svallveislu í Byrginu.

Stóra holan í þessu annars langdregna og leiðinlega plani var að 99% af öllu sem hann þuldi uppi vissum við allt um fyrir kosningar. Og hann líka. Þó gerði hann sér að góðu að nota þá þessa sömu punkta til að þenja sig yfir vanköntum Icesave og illsku IMF og breta. Hvað breyttist í millitíðinni annað en að Steingrímur fékk völdin? Ekkert.

Ósvífnasti spuninn kom þó fram í lokin þegar Steingrímur hélt krepptum hnefa á lofti og hvatti okkur til að "berjast saman í stað þess að gefast upp!". Maginn í mér hefði losað sig við kvöldmatinn með látum hefði ég ekki verið löngu dauður að innan á þessum tímapunkti í ræðunni.

Persónulega vil ég frekar berjast við Steingrím núna en berjast við að borga skuldir glæpamanna það sem ég á eftir ólifað.

Mætum öll á Austurvöll á morgun kl 15:00!!

Af gungum og druslum

2009-06-17T19:42:00.004Z

Sagði ég ekki? Þeir eru allir eins - tvítyngdar lyddur.

Svo talar fólk um lýðræði og að öll berum við ábyrgð á því sem þetta meinta lýðræðislega yfirvald tekur sér fyrir hendur? Hvernig er hægt að tala um lýðræði þegar enginn fær nokkurn tíma að vita neitt? Á hvaða grundvelli á almenningur að geta tekið upplýsta ákvörðun um það hver eigi að stjórna sér næstu fjögur árin þegar stjórnmálamenn ljúga einu fyrir kosningar en stíma svo í þveröfuga um leið og atkvæði hafa verið talin? Hvernig er hægt að ætlast til að almenningur viti eitt né neitt í sinn haus þegar sjálfir þingmennirnir fá ekki einu sinni upplýsingar um stóralvarleg mál sem þeir þó hika ekki við að kjósa um? Og hvernig fær sumt fólk það út að öll axarsköft ráðamanna og þeirra skósveina séu réttilega okkar sameiginlega ábyrgð? Sama hvað við kusum eða kusum ekki...sama hvernig við hegðuðum okkur. Unnendur þessa fjórflokkalýðræðis mega éta það sjálfir.

Þetta kerfi er eins og ofbeldisfull sambúð. Allir fullir af samviskubiti yfir einhverju sem þeir bera enga ábyrgð á.

Og já, ég er að tala um Icesave. Djöfull fer þetta Icesave mál brjálæðislega í taugarnar á mér. Stuðningsmenn stjórnvalda eru svo þyrstir í að sanna að Sjálfstæðisflokkurinn hafi skilið okkur eftir án nokkurra undankomumöguleika, að þeir eru tilbúnir að reyta upp hvert einasta hálmstrá til að afsaka stærstu mistökin af þeim öllum. Þörf fólks til að sanna fyrir sjálfu sér og öðrum að það hafi verið í réttu liði er svo sterk, að engin rök skipta máli og engar afleiðingar eru of hræðilegar. Ef þingið samþykkir Icesave, og Ísland sekkur í sára fátækt í kjölfarið, þá getur þetta fólk loks andað léttar og klappað sjálfu sér á kollinn fyrir að hafa kosið rétt. Það leggur meira að segja kannski saman í púkk fyrir einum bjór til að fagna almennilega!

Þetta er eins og að horfa upp á ofsatrúaða píslarvotta í þriðja heims ríkjum lemja sig til blóðs með birkihríslum til að öðlast viðurkenningu. Nema alls ekki eins fyndið.

Já já, Davíð var hrokafullur valdafíkill með horn og hala. Bjarni Ben er eins og hross í jakkafötum. Geir Haarde er álíka gagnlegur og skjaldbaka með stjarfklofa. Hannes Hólmsteinn er hlutdrægari og leiðinlegri en lögfræðingur á prósentum, Þorgerður Katrín er eins bergrisinn eftir kynskiptaaðgerð og Sigurður Kári vildi leyfa ykkur að kaupa bjór úti í búð.

En...get the fuck over it!

það er löngu tímabært að leggja frá sér fornleifafræðiáhöldin og fara að pæla aðeins í því sem er að gerast akkúrat NÚNA...sama hvaða liði ykkur finnst þið tilheyra. Handan við hornið er væntanleg samþykkt Alþingis á leynilegum nauðungarsamningi sem mun mjög líklega rústa þessu landi endanlega. Ef það gerist...þá getum við fyrst farið að tala um skort á valkostum. Og þið getið fokking gleymt því að ég nenni að blogga á kálfskinn fyrir ykkur.

"En Hnakkus! Veistu ekki hvað gerist ef við segjum nei? Við verðum útilokuð úr samfélagi þjóðanna...hvað sem það nú þýðir! Okkur verður hent út úr EES! Það vill enginn kaupa fisk af okkur! Við komumst ekki í ESB! Það koma drekar og borða okkur!! VÆÆÆÆÆÆÆL!"

Jafnvel þó þetta væri allt satt, sem það er ekki, hvað þá með það? Til að afarkostir virki þá þurfa þeir að hafa tvennt til brunns að bera:

1. Þeir þurfa að vera trúverðugir.
2. Þeir þurfa að vera hræðilegri en hinn valkosturinn.

Í fyrsta lagi...viðskipti. Verður okkur hent út úr EES? Örugglega ekki. Það eru bara getgátur um eitthvað sem alls ekki liggur á borðinu. Ef evrópuþjóðirnar ætla að henda okkur úr EES nema við skrifum undir, þá þarf það að vera skjalfest eins og annað í þessu máli. Það er ekki nóg að giska bara á að kannski hafi einhver sagt það einhvern tíma og veðja svo 700 milljörðum á það eins og mongólíti í spilavíti.

Hætta "allir" að kaupa fisk "af Íslendingum"? Auðvitað ekki. Best að útskýra þetta nánar fyrir þeim lesendum mínum sem eru með sérþarfir. Íslenska ríkið selur ekki fisk og erlendar ríkisstjórnir eru ekki helstu kaupendur fisks. Fyrirtæki kaupa fisk af öðrum fyrirtækjum af því þau græða pening á því. Veitingastaðir og verslanir um alla Evrópu hætta ekkert að kaupa dúndurgóðan fisk sem þeir hagnast sjálfir vel á að endurselja af því að Gordon Brown er í fýlu við Jóhönnu og Steingrím. Þannig virkar heimurinn ekki. Það eiga engir veitingahúsaeigendur eftir að segja..."AhA! Zeir skrifa ekki undir non?? Zá ég ekki kaupa meiri fisk af zessir ribbaldar!!". Það er öllum skítsama um þetta rugl nema einhverjum pólitíkusum. Til þess að stoppa sölu á afurðum frá Íslandi þyrfti viðskiptabann og það er enginn að fara að setja viðskiptabann á Ísland út af vandræðalegri deilu sem Bretar þora ekki einu sinni að láta reyna á fyrir dómsstólum.

ESB. Komumst við kannski ekki í það ef við neitum? Ok þá. ESB breytir varla neinu til eða frá ef við skuldum meira en við getum nokkurn tíma borgað. ESB hefur verið kynnt sem lækningin við öllum okkar vandamálum en það er helvíti hart ef við þurfum að skjóta okkur í hausinn til að komast til læknisins. Að skrifa undir Icesave samningana til að komast í ESB er dálítið eins og að skera af sér skrallið til að komast á deit með draumadísinni. Tilgangslaust í besta falli.

Verðum við "útilokuð úr samfélagi þjóðanna"?. Ég veit ekki einu sinni hvað það á að þýða og ég held að enginn annar viti það heldur. Helst skýt ég á að það þýði að Ólafi og Dorrit verði boðið í færri fínar veislur. Það er allavega meiri möguleiki á að ég lifi það af en lífstíðardóm í skuldafangelsi.

Auðvitað hefði verið best ef Geir og Ingibjörg hefðu tekið rétt á þessu frá upphafi. Mótmælt hryðjuverkalögunum, rekið breska sendiherrann heim í tjöru og fiðri, dregið bretana fyrir rétt...og svo framvegis. En þau gerðu það ekki og þá er ekkert annað hægt að gera en að taka bestu ákvarðanirnar í stöðunni. Að samþykkja Icesave undirskriftina hans Steingríms er ekki ein af þeim. Ef við hefðum enga valkosti þá þyrftu þessir böðlar ekki undirskrift frá okkur.

Ef þingið samþykkir þennan samning sem það fær ekki að sjá, á forsendum sem það fær ekki heldur að sjá, þá þarf að fjarlægja það með valdi og rifta samningnum. Þegar það er búið og gert skal ég persónulega taka upp símann í stjórnarráðinu og segja Gordon Brown að fokka sér.

Spurt að leikslokum já!

2009-05-27T22:40:00.004Z

Í fyrradag birtist mynd af Steinþóri Steingrímssyni í Fréttablaðinu í tilefni þess að hann er að gefa út spurningaspilið "Spurt að leikslokum".

Á myndinni virðist sem Steinþór sé ögn vangefinn en þar sem ég þekki örlítið til Steinþórs finnst mér ég knúinn til að taka upp hanskann fyrir hann.

Steinþór er ekki vangefinn svo vitað sé.

Spilið er aftur á móti vangefið gott! Þið getið nálgast það hér.

Siðapostular leggja til atlögu

2009-05-25T20:34:00.004Z

Árið 2009 er komið vel áleiðis en þó virðast ótrúlega margir ekki enn hafa fattað hvernig internetið virkar eða hversu mikið það hefur breytt heiminum. Enn finnst fólk sem gapir yfir því að ekki allir takmarki tjáningu sína á netinu við ranta á moggablogginu undir fullu nafni og kennitölu, eins og það sjálft. Enn finnst fólk sem nennir að hneykslast yfir því að allt litróf skoðana og allir mátar til að tjá þær þrífist á netinu. Það bíður spennt eftir handhægri patent lausn á vandamálinu.

Fréttaaukinn fjallaði í gærkvöldi um meinta ljóta siði á netinu. Þrátt fyrir að umfjöllunin hafi verið óhemjulega grunn og illa unnin tókst henni engu að síður að senda hroll niður mitt hrikalega bak. Kannski var það einmitt skilningslaus, barnaleg og frek nálgunin sem hafði þessi áhrif á mig? Eða kannski var það tilhugsunin um alla opinmynntu, tæknifötluðu, hneykslisfíklana heima í stofu, ávallt reiðubúna að fórna minni hagsmunum fyrir meiri? Tilbúna að deyja fyrir Lúkas. Tilbúna að framselja frelsi sitt, og mitt, í skiptum fyrir að vera ekki kallaðir hálfvitar á internetinu (sem þeir eru by the way....eins gott að koma því á framfæri á meðan það er ennþá löglegt).

Það sem stóð upp úr í Fréttaaukanum var gapandi vanþekking dagskrárgerðarmanna á öllu sem tengist internetinu og vangeta þeirra til lifa með fötlun sinni. Á internetinu kallast svona fólk 'helvítis núbbar'.

Til að aðstoða Fréttaaukann við að kafa ofan í undirheima alvefsins var dröslað fram á skjáinn einhverjum námsbrautarstjóra úr Háskóla Íslands. Hver dó og gerði hann að konungi internetsins kom ekki fram, en sjálfur virtist hann ekki beygður af efa yfir titlinum.

Séníið kjökraði fyrst örlítið undan því hvað stjórnmálamönnum og öðrum sárnaði mikið að heyra ljóta hluti um sig á netinu, en lét svo hendur standa fram úr ermum, og byrjaði að sýna íbygginni Elínu Hirst allt það ljótasta sem honum hafði tekist að draga upp úr dýpinu.

Dæmin voru kynnt með drungalegu og alvarlegu "DÚNG!" hljóði...og komu svífandi á móti áhorfendum út úr myrkrinu. Greinilega hræðilegt stöff.

Fyrsta dæmið var af röflvefnum Málefnunum. Þar hafði einlínungurinn Vísir afgreitt kynjakvótataumræðu Sóleyjar Tómasdóttur sem "Femmukjaftæði". Einhver vitringurinn hafði svo gantast með að Steingrímur væri "svoddan kelling" að þetta hlyti að jafnast út. Ég hef tvennt um þetta að segja. Í fyrsta lagi, þá er Sóley Tómasdóttir á krónískum túr og alltaf með eitthvað femmukjaftæði. Í öðru lagi, þá er Steingrímur hálfgerð kelling. Svo ég skildi ekki alveg vandamálið.

Annað dæmið var tekið af Barnalandi. Þar sagði einhver móðirin frá því hvernig hún hafði komið gotinu fyrir í pössun, farið á djammið og að eigin sögn rekist á Ólaf F. Magnússon á Laugarveginum, í álíka ástandi og nítjándu aldar götumyndin allt um kring. Séníið velti upp þeim möguleika að kannski væru svona skrif undir nafnleysi alls ekkert ALLTAF sönn! Og að kannski væru þetta bara kjaftasögur eins og þær sem hafa alltaf tíðkast allsstaðar og sem venjulegt fólk tekur með miklum fyrirvara á meðan smáborgarar smjatta og kjökra til skiptis. Ég hrósaði séníinu í huganum fyrir að sýna slíka skarpskyggni eftir aðeins korter á veraldarvefnum.

"Steraráðleggingar" voru næsti hryllingurinn sem séníið framreiddi. Hann sýndi okkur spjallborð þar sem vaxtaræktarmenn skiptust á ráðum um hvernig best og öruggast væri að nota stera - væntanlega þá í staðinn fyrir að sprauta þeim bara í andlitið á sér og sjá hvað gerist. Tilvist slíkrar umræðu á Íslenskri vefsíðu er mjög alvarlegur hlutur augljóslega. Því án hennar myndi enginn nota stera. Reyndar hef ég fyrir því áreiðanlegar heimildir að fyrir tíma internetsins hafi menn aldrei talað um stera sín á milli heldur bara sprautað þeim í sig þegjandi og hljóðalaust eins og alvöru karlmenn.

Umræða um hvernig mætti redda sér róandi lyfjum var líka dregin á flot. Elín Hirst sýndi mikla hæfileika í rannsóknarblaðamennsku þegar hún tók eftir því að umræðan hafði átt sér stað um miðja nótt. Á þessum tímapunkti var mig farið að vanta róandi lyf. Verst að þau sýndu aldrei adressuna.

Næst var dregin upp umræða um "kynferðislega misnotkun" á ótilgreindu spjallborði. Umræðustofnandi nokkur kvaðst sólginn í börn og bað um ráðleggingar við þeim kvilla. Þetta tækifæri notuðu séníið og Elín til að segja okkur hver er munurinn á "alvöru vef", og vef sem er ekki alvöru. Níðbjörninn á spjallborðinu átti semsagt að leita sér ráða á "alvöru vef". Í stað þess að leita sér ráða á hafsbotni eins og ég hefði t.d. ráðlagt honum. Alvöru vefir, samkvæmt skilgreiningu Fréttaaukans, eru allir vefir þar sem vottaðir sérfræðingar skrifa greinar og svara formlegum fyrirspurnum eftir dúk og disk. Öll bein og opin samskipti á netinu virðast hinsvegar vera þyrnir í augum tárvotra internetsérfræðinga.

Næst bauð séníið upp á heilmiklar fabúleringar um unglinga sem samkvæmt hans hógværa mati væru í hálfgerðri kynlífsánauð vegna áhrifa klámvæðingar. "Margir unglingar halda að klámmyndir séu einhvers konar kynlíf" sagði hann og virtist ekkert skilja hvernig slíkar ályktanir yrðu til við það eitt að horfa á nakið fólk juðast á kynfærum hvors annars. Hann bætti svo við af annáluðu innsæi sínu að "unglingsstrákar yrðu snarruglaðir í hausnum og að stelpurnar vissu ekki heldur hvað þær ættu að gera". Eins gott fyrir unglingsstelpurnar að séníið veit það. Vonandi horfa þær allar á Fréttaaukann!

Fyrirspurn um "Klámfíkn" maka á Barnalandi hafði farið út í vitleysu...og slapp ekki undan vökulum augum. "Þessi kona hefði frekar þurft einhvers konar vinkonuspjall" upplýsti séníið okkur um, svo enn og aftur mátti lesa á milli línanna að best væri að loka á möguleika fólks til að taka slæmar ákvarðanir á netinu.

Rauði þráðurinn í umfjölluninni var að sjálfsögðu nafnleysi eins og kom rækilega fram undir lokin þegar dómsmálaráðherra var spurður út í álit sitt á nafnleysi á netinu. Smáborgarar, pempíur og púrítanar hata þá sem ekki flagga nafni, kennitölu og tvennum skilríkjum í hvert sinn sem þeir opna munninn. Þeir fyllast óöryggistilfinningu að geta ekki samstundis rakið ættir viðmælenda aftur til landnáms. Það einkennilega við þetta er að engir virðast hata nafnlausa tjáningu meira en þeir sem mest mæra fulltrúalýðræðið með sínum rækilega nafnlausu kosningum. Hver er munurinn?

Nafnleysi er það besta sem hefur komið fyrir umræðu á Íslandi. Íslendingar eru smáþorparar í eðli sínu og hafa alltaf verið meira uppteknir af persónu þess sem talar en því sem hann talar um. Hver segir hvað og af hverju hann er að segja það. Með möguleikanum á nafnlausri umræðu hefur opnast fyrir flóðgáttir allskyns skoðana sem áður heyrðust ekki nema í tveggja manna tali og hefðu aldrei ratað í lesendabréf í gömlu flokksblöðunum. Það er gott. Hvort skoðanirnar sjálfar eru góðar eða slæmar skiptir engu máli. Það metur hver og einn fyrir sig, á sínum forsendum. Rusl á það til að dæma sig sjálft án aðstoðar sérfræðinga. Og vitlaust fólk sem verður sér að voða á internetinu er aðeins sjálfkjörinn fórnarkostnaður óheftrar umræðu. Það verður að fá að þjást áfram. Sér til lærdóms - okkur til skemmtunnar.

Hvern vill fólk svo frekar þegar upp er staðið? He-man eða Prins Adam? IronMaster eða Guðmund Jónsson?

Fyrir ári hefði þessi þáttur aðeins verið létt spaug. En andrúmsloftið í dag er þannig að maður getur því miður ekki hlegið að svona aulahætti lengur. Fólk er reitt og í stuði fyrir að hlutirnir "séu teknir föstum tökum". Fjárglæframenn skemmdu Ísland á meðan stjórnmálamenn héldu um þá lofræður og föttuðu ekki neitt. Og hvað er þá til ráða annað en að tífalda traust sitt á getu stjórnmálamannanna til að stýra tilveru okkar í réttan farveg.

Forræðishyggjan er ekki lengur úti í horni að láta hlæja að sér. Hún ræður, og hún er fúl. Hún vill ráða því hvað við borðum og hvað við drekkum, hvað við segjum, og hvar við segjum það. Núverandi stjórnvöldum leiðist því miður ekkert sérlega mikið að hugsa fyrir okkur og eins og andrúmsloftið er í dag, eru þau ansi líkleg til að 'sörfa' á þeirri undiröldu heimsku og forpokunar sem glitti í í þessum annars afspyrnu lélega þætti.

Netlöggan nálgast.

Sorrí stelpur

2009-05-17T14:22:00.003Z

Undarleg afsökunarbeiðni biskups

2009-05-02T13:02:00.007Z

Biskup Íslands fékk vafalaust fleiri en mig til að klóra sér í kollinum þegar hann í ræðu bað konur og börn afsökunar á kynferðisofbeldi af hálfu starfsmanna kirkjunnar, án þess að skýra mál sitt neitt frekar.

Eðlilega sperrtu margir eyrun enda ekki á hverjum degi sem opinber stofnun kýs að biðjast opinberlega afsökunar á ótilgreindum kynferðisafbrotum. Aðspurður hvort hann sé að tala um einhver tiltekin brot og hvort kirkjan sé að viðurkenna sök í einhverjum kynferðisafbrotamálum dregur biskupinn í land og segist bara vera að tala almennt af því það séu örugglega einvherjir sárir einhversstaðar.

Þetta er svo bara tekið gott og gilt. Málið dautt.

Ætli það sé þá ekki við hæfi að ég noti þetta tækifæri og biðji þjóðina afsökunar á særðum tilfinningum ótilgreindra moggabloggara að norðan. Ekki út af neinu sérstöku heldur af því það er örugglega einhverjir sárir einhvers staðar.

Af hverju, má ég spyrja, er ekki gengið harðar á eftir þessum krípí hálf-játningum Biskups? Ef einhver stígur fram og biðst afsökunar á nauðgunum og djöfuldómi upp úr þurru þá hlýtur að teljast líklegt að viðkomandi viti eitthvað sem hann þarf að deila með þar til gerðum yfirvöldum. Þegar ég var lítill og hafði ekki enn lært að ljúga almennilega, þá var það iðullega mitt fyrsta verk eftir að ég mölbraut eitthvað, að hlaupa til mömmu og tilkynna henni að ég hefði ekki gert það...svona ef hún skyldi finna eitthvað brotið einhversstaðar.

Af hverju er ekki búið að boða biskupinn í yfirheyrslu hjá lögreglu? Af hverju er dómsmálaráðherra ekki búinn að krefja hann um svör og af hverju eru Barnalandskonur ekki enn farnar að metast um það hverri langar mest að hengja hann upp á tánum eins og venjan er með menn sem hafa sannarlega ástæðu til að biðja konur og börn afsökunar á kynferðisbrotum? Hvar er Lúkas??

Ég velti því fyrir mér hvort þessi undarlega afsökunarbeiðni hefði vakið meiri athygli ef hún hefði komið frá forsvarsmanni einhverrar annarrar ríkisstofnunar en kirkjunnar? Ætli það hefði ekki kallað á rannsókn ef forstjóri Landsvirkjunar hefði stigið fram og beðið fórnarlömb kynferðisbrota afsökunar fyrir hönd starfsmanna Landsvirkjunar? Ætli það myndi ekki framkalla undrun ef ríkisskattstjóri skrifaði grein í Moggann til að biðjast forláts á því hversu duglegir starfsmenn sínir séu að nauðga landsmönnum....ok ekki gott dæmi kannski, en þið skiljið hvert ég er að fara.

Stafar þessi skortur á eftirfylgni og undrun af því að undir niðri reikna allir með því að prestar séu oftar en ekki spólgraðir pervertar sem fela standarann með því að ganga í kjól? Eru allir orðnir vanir tilhugsuninni um kynbrenglaða klerkinn? Finnst fólki kannski bara gott hjá biskupnum að biðjast fyrirgefningar af því að prestar hljóti hvort eð er að vera étandi sig sadda af Viagra í fermingafræðslunni?

Biskupi fannst ekki taka því að útskýra mál sitt frekar því hann telur svona mál ekki vera gerð upp "með þeim hefðbundnu verkfærum sem venjulegast er...eehh...ihhh...á vettvangi dómstóla"

Eins og sumir vita rekur kirkjan "Fagráð um meðferð kynferðisafbrotamála". Slík er fagmennska kirkjunnar manna þegar kemur að kynferðisafbrotum. Fagráðið meðhöndlar kynferðisafbrotamál sem koma upp, áður en þau eru hugsanlega send til lögreglu. Alveg örugglega ekki í neinum annarlegum tilgangi, og örugglega ekki á neinn þann hátt að biðjast þurfi afsökunar. Kannski einhver ætti að biðja um að fá að gægjast í skjalageymslur ráðsins?

Biskup virðist telja að miklu betra sé að gera upp þessi ótilgreindu mál í einrúmi með "iðrun" og "fyrirgefningu". Einu verkfærunum sem kirkjan hefur upp á að bjóða að hans sögn.

Ég er kannski gamaldags en mér finnst alltaf best að nauðganir séu gerðar upp með vatni og brauði inni í litlu læstu herbergi. Huglægt þvaður eins og iðrun og fyrirgefningu má svo allt eins iðka þar eftir smekk.

Glæpalíf

2009-04-25T22:15:00.001Z

Kreppan dýpkar og erlendar glæpaklíkur virðast byrjaðar að festa rætur á Íslandi. Kallinn sem gerði Löggulíf flassaði klíkumerki framan í ljósmyndara á kjörstað í dag og uppskar aðdáunarfullt augnaráð áhrifagjarnar konu með blýant, sem sat álengdar og fylgdist með ógnandi klíkuhegðun kappans.

Samkvæmt erlendum leiðarvísi um klíkumerki virðist vera um merki "BK (Blood Killa)" klíkunnar að ræða, en hún hefur hingað til ekki verið umsvifamikil í íslenskum undirheimum.

Að ganga um grjótaþorpið að næturlagi með rauðan klút á kollinum hefur líklega aldrei verið hættulegra!

Að kjósa sér nafn við hæfi

2009-04-25T18:21:00.001Z

Í tilefni þess að ég varði kosningadeginum í að spila tölvuleiki á sparinærbuxunum datt mér í hug að deila með ykkur skemmtilegri sögu af tölvuleikjaævintýrum mínum.

Einu sinni spilaði ég tölvuleik sem heitir Knights of the old republic. Í honum brá ég mér í hlutverk Jedi riddara sem flengdist um alheiminn og lenti í ýmsum ævintýrum. Svo fór að ég spilaði þennan leik tvisvar í gegn eftir að ég uppgötvaði hvað það skipti miklu máli að velja sér rétt nafn.

Í fyrstu umferð skýrði ég kallinn minn eitthvað sem mér fannst töff án þess að pæla mikið í því, en veitti því fljótt athygli að í hvert sinn sem ég bryddaði upp á samræðum við geimverurnar sem á vegi mínum urðu, fékk ég gjarnan þann möguleika að kynna kallinn minn með nafni.

Oftast með eftirfarandi sniði..."Hi, I'm <>, blabla bla"

Möguleikarnir fyrir gott sprell voru klárlega miklir svo ég drífði mig að byrja upp á nýtt um leið og ég var búinn að klára leikinn í fyrsta skiptið.

Ég braut heilann dágóða stund um hvaða nafn myndi framkalla mesta flissið og ákvað svo loks að kallinn minn skyldi heita "Gonna molest you".

Meira að segja Kolbrún Halldórsdóttir gæti ekki annað en séð spaugilegu hliðina á Jedi riddara sem þvælist um geiminn og tilkynnir iðullega viðmælendum sínum með kæruleysislegu þjósti að hann hyggist misnota þá kynferðislega.

Djarfar yfirlýsingar Jedi riddarans knáa kættu mig að minnsta kosti gífurlega og þær áttu það til að varpa nýjum og ferskum blæ á samskipti hans við aðra eins og sjá má.

Þráu augun þín

2009-04-23T23:35:00.000Z

Sigmundur Davíð hræðir mig. Í hvert skipti sem hann birtist á sjónvarpsskjánum, hallar höfðinu eilítið fram og sendir þetta alvitra, stingandi glott inn í stofu til mín langar mig mest að fela mig undir sófa. Og ég myndi örugglega gera það ef ég byggist ekki hálfpartinn við því að hann byði mín þar, þolinmóður og glottandi.

Þetta glott er lamandi. Glott þess sem veit allt sem þú veist ekki. Glott þess sem veit örlög þín. Glott sem virðist segja..."Ég einn veit hvað er í glasinu þínu, væni". Sannkallað Rohypnol glott.

Í seinni tíð er ég orðinn nokkuð viss um að Sigmundur Davíð búi undir rúminu mínu.

Á hverju kvöldi þegar ég fer að sofa finn ég hvernig steinrunnar glyrnurnar bora gat í gormadýnuna undir mér. Ég er hræddur við að fara fram úr til að pissa á nóttunni. Held frekar í mér. Ligg kjökrandi í spreng uns birtir.

Vatnsglasið á náttborðinu snerti ég ekki!

Ég óttast framtíðina. Ef Sigmundur sölsar undir sig völdin eftir kosningar eru dagar okkar taldir. Gvendarbrunnar munu krauma af Rohypnoli og öll munum við óska þess að vakna aldrei aftur.

Jesús Rís

2009-04-12T12:12:00.000Z

Hnakkus skilar auðu

2009-04-11T00:07:00.004Z

Fólki finnst gaman að sveiflast. Ýmist til vinstri eða hægri. Í hvora áttina fólk sveiflast hverju sinni fer allt eftir því hvaða fífl klúðraði málunum seinast. Þegar vinstri menn skella á verðtryggingu svo allir missa húsin sín sveiflast fólk til hægri. Þegar hægri menn leyfa bankastjórum að rústa landinu sveiflast fólk aftur til vinstri.

Fólki virðist ómögulegt að hata einn hóp af atvinnustjórnmálamönnum nema þá að elska annan að minnsta kosti jafn mikið á móti. Fólk þreytist ekki á að skoppa milli sjálfskipaðra valkosta í leit að lausnum. Ef einn flokkur stenst ekki væntingar, þá hlýtur lausnin að liggja hjá þeim næsta. Ef hægri pakkinn virkar ekki þá hlýtur vinstri pakkinn að hafa svörin. Og ef ekki, þá má alltaf prófa hægri pakkann aftur eftir nokkur ár!

Þetta kerfi minnir mig alltaf á spurninguna úr sjö ára bekk,"Hvort myndirðu borða kúk eða drekka piss ef þú YRÐIR að velja". Allir sem hafa snefil af sjálfsvirðingu svara þeirri spurningu með vandlætingarfullum löðrungi í hvert skipti.

Sannleikurinn er auðvitað sá að enginn af þessum smjaðrandi, meðalgreindu, tækifærissinnum á skilið eitt einasta atkvæði frá neinum. Réttast væri að þeir stæðu einmana uppi á kassa einhversstaðar, í ljótu ímyndafræðilega völdu jakkafötunum og drögtunum sínum, og gögguðu upp í vindinn þar sem enginn þyrfti að heyra í þeim. En því miður hefur sú hugmynd verið rækilega markaðssett að það sé í alvörunni mikilvægt að mæta í kjörklefa á fjögurra ára fresti og velja einn af fjórum fyrirfram samsettum hópum til að ljúga að sér næstu árin. Þessvegna sitja allir límdir við kassann þegar frambjóðendum er raðað upp til að sýna fimi sína í undanbrögðum. Og þessvegna mæta allir á kjördag og kjósa sinn uppáhalds valdasjúkling. Eins og það skipti einhverju máli.

Flokkapólitíkin er eins og amerískt wrestling og kjósendur eru eins og tólf ára strákurinn úti í sal sem trúir ennþá að þetta sé ekta. Atvinnupólitíkusarnir eru alltaf rosalega ósammála þeim sem eru í hinum flokknum en eiga samt mikið meira sameiginlegt hvor með öðrum en öllum hinum sem eru ekki inni í hringnum með þeim. Alveg sama hversu harkalega þeir rífast, þá eru sameiginlegu hagsmunirnir öllum deilumálum yfirsterkari. Því hressilegri sem rifrildin eru, þeim mun meiri áhorf fá þeir. Sameiginlegir hagsmunirnir eru að við höldum áfram að veita þeim athygli, trúa á kerfið eins og það er, og kjósa einhverja af þeim á fjögurra ára fresti til að vera aðal. Auðvitað vilja þeir allir fá fleiri atkvæði en hinir en það er samt aukaatriði. Aðalatriðið er að halda leikritinu gangandi. Það er hvort eð er lítið mál að fá vel launað og rólegt innidjobb út kjörtímabilið ef menn komst ekki að í eitt og eitt skipti.

Sjálfur sveifla ég mér ekki á eftir stjórnmálamönnum lengur. Í mesta lagi væri ég til í að sveifla fætinum af afli í punginn á þeim (eða þar sem pungurinn væri staðsettur ef ekki væri fyrir fléttulista). Ég held ekki með neinum og get verið sammála hverjum sem mér sýnist svo lengi sem hann hefur rétt fyrir sér eins og ég. Svo get ég verið heima á nærbuxunum að leika mér í tölvuleik á meðan aðrir herða bindi um háls og skunda á kjörstað til að velja skásta lygarann.

Nú um stundir halda rosalega margir að Jóhanna Sigurðardóttir sé hæfur leiðtogi af því að Geir var vanhæfur luri. Ég vil endilega færa ykkur smá fréttir. Jóhanna er vanhæf líka. Kannski ekki endilega af nákvæmlega sömu ástæðum og Geir, en vanhæf engu að síður. Hún er fælin og óákveðin og virðist ekki skilja margt ofan í kjölinn miðað við fátæklegu frasana sem koma frá henni þá sjaldan sem hún hefur tíma til að taka sér pásu frá því að gera ekki neitt og tjá sig. Hún er heldur ekki með jafn mikið bein í nefinu og hún heldur og var næstum farin að skæla um daginn þegar einhver barnungur fréttamaður spurði hana um eldgamlan ólöglegan brottrektsur á einhverju pólitísku smáseiði sem öllum var skítsama um. Vinstra fólk er hungrað í leiðtoga en Jóhanna er álíka mikill leiðtogi og læmingi með kvíðaröskun. Margir segja svo að ekkert af þessu skipti máli vegna þess að "hún sé með hjartað á réttum stað" hvað sem það nú þýðir. Aðallega sýnist mér hún vera með hjartað í buxunum.

Svo hljómar hún eins og gufuketill. Gufuketill sem getur blásið samfleytt í tíu tíma. Ég ætla að setja litla mynd af Jóhönnu á Mute takkan á fjarstýringunni minni.

Steingrímur Joð er svo önnur fígúra sem margir eiga enn eftir að sjá í gegn um. Hann myndi örugglega komast á pall í Morfís ef hann væri ekki eldgamall, en hann hefur aldrei gert nokkurn skapaðan hlut af viti sem neinn getur bent á. Og það þrátt fyrir krónískan gorgeirinn. Lofaði stórkostlegri lendingu í Icesave málinu en dró svo allt í land án þess að nokkur nennti að ganga á eftir honum með það. Vildi reka IMF úr landi nokkrum dögum áður en hann varð óvænt fjármálaráðherra en hætti allt í einu að vilja rugga bátnum. Skar hvali í tætlur áður en það datt úr tísku en býsnast nú yfir hvalveiðum af hliðarlínunni án þess þó að gera neitt í málinu. Lét hvína í sér yfir eftirlaunalögunum og fagnaði afnámi þeirra, en lét sér ekki leiðast að þiggja fimmtán miljónirnar sem hann græddi aukalega sem formaður stjórnmálaflokks vegna sömu laga. Barðist gegn bjórnum á þeim forsendum að bjórinn myndi steypa æskunni til glötunar en splæsti svo bjór á Hnakkus á barnum fyrir nokkrum árum, skeytingalaus um mögulegar afleiðingar örlætis síns. Ég kýs þig aldrei aftur Dengsi, en takk fyrir bjórinn samt! Hann drap mig ekki í þetta skiptið.

Össur Skarphéðinsson er ráðgáta. Ég skil aldrei af hverju hann fær að vera með. Ég gæti skrifað um hann bók en ég held að hann sé með auka litning og það er ljótt að gera grín að fólki með auka litning.

Öþþuð blóm jáááá!!

Dagur B. Eggertsson og Árni Páll eru innihaldslausari en bloggið hennar Ásdísar Ránar. Frasafrussandi smjörkúkar sem myndu draga niður meðalgreindina á árshátíð FM 95.7. Árni er svo tanaður að Yaphet Kotto lítur út eins og Jóhanna Guðrún við hliðina á honum og Dagur er svo kynferðislega krullaður að hann lætur Rod Stewart líta út eins og Ómar Ragnarsson. Ef tanið hans Árna og greiðslan hans Dags myndu fara í slag þá yrðu það endalok mannkyns. Báðir eru með útpældari handahreyfingar en kung fú meistari. Og eru álíka gagnslausir.

Árni Báll Eggertsson, hið mannlega svarthol

Kolbrún Halldórs veit hvað öllum er fyrir bestu. Kolbrún vill banna mér að boxa af því einhver 14 ára ræfill af suðurnesjum sem æfir box lamdi skólafélaga sinn í skólanum. Þegar ég var í gagnfræðiskóla voru alvarlegar líkamsárásir daglegt brauð þrátt fyrir boxbann og ég man ekki eftir að Kolbrún hafi oft mætt til að draga bólugrafna tíunda bekkjar slánana ofan af mér. Ég myndi boxa tólf lotur við Tyson með báðar hendur bundnar fyrir aftan bak og kjúklingafitu á eyrunum áður en ég kysi Kolbrúnu á þing.

Jón Bjarnason er ævaforn tuðandi bóndatarður sem predikar það að "liðið fyrir sunnan" beri sameiginlega ábyrgð á gjörðum nokkurra tuga bankamanna. Tákngervingur óréttláts kjördæmakerfis sem gæti ekki unnið húsfélagskosningu nema hugsanlega ef hann sæti einn að íbúalistanum.

Ef ég á eftir að drulla yfir einhvern sem heldur að hann skipti máli, endilega látið mig vita. Og munið að vera heima á nærbuxunum á kjördag eins og ég.

Patak's er úr Pacas!

2009-03-15T12:06:00.002Z

Skál!

2009-03-01T20:09:00.005Z

20 árum eftir að bjórbanninu var aflétt skilur ekki nokkur eðlilegur maður af hverju bjór var bannaður til að byrja með eða við hvað menn voru hræddir þegar til stóð að leyfa hann. Nógu vissir voru fýlupúkarnir nú samt um að allt myndi fara í fokk á no time ef landsmenn fengju að sötra einn kaldan.

Rökin gegn því að leyfa bjórinn á sínum tíma voru nákvæmlega þau sömu og fýlupúkarnir nota núna til að bölsótast gegn því að Íslendingar fái að kaupa áfengi í matvörubúðum. Nema að núna er búið að bæta við einum snilldarrökum. Að úrvalið af fíneríi geti aldrei orðið það sama í einkareknum verslunum og í ríkisbúðinni....af því það er klárlega í verkahring ríkisins að halda úti stórfenglegu úrvali víntegunda fyrir sælkera. Eða eitthvað.

Forræðishyggja er álíka töff og móbrúnu ullarjakkafötin hans Steingríms J. Leyfum allt nema fýlupúka.

Dvergakvóta strax!

2009-02-16T22:49:00.002Z

Umræðan um fléttulista og kynjakvóta gleður mitt litla hjarta óskaplega. Með þessarri mikilvægu umræðu er verið að ryðja leiðina að veröld fullkomins réttlætis. Veröld þar sem kynfæri, hörundslitur, hæð eða persónuleiki skipta ekki lengur nokkru einasta máli. Veröld þar sem hægbreytilegum orsakasamhengjum hefur verið sópað burt í skiptum fyrir köntótt réttlæti. Veröld hinna fullkomnu stöplarita.

Sumir skilja ekki mikið í þessarri umræðu og vilja meina að flokkalistar séu óréttlátir til að byrja með, að fleiri þættir en kynið eitt skipti máli þegar valið sé milli einstaklinga, eða jafnvel að það sé óþarfa orkusóun að eltast við að koma á fullkomnu réttlæti milli 6 milljarða eigingjarnra mannapa af 200 þjóðernum, sem þeytast um alheiminn á sæmilega heimilislegum grjóthnullungi.

En slíkt bölsýnisblaður hugnast mér ekki. Ég gleðst yfir því að sjá handvirkar jöfnunaraðgerðir byggðar á meðaltölum og útvöldum áherslum.

Næsta brýna réttlætismál er mér einmitt afar hugleikið og það er hæðarmismunun.

Samkvæmt viðamiklum rannsóknum hefur verið sannað að launatekjur og félagsleg áhrif karlmanna á fullorðinsárum ráðist ekki síst af hæð þeirra. Að vísu er þetta ekki vegna þess að kjarasamingar raði karlmönnum í launaflokka eftir sentimetrafjölda eða vegna þess að meðvitaðar ákvarðanir séu stöðugt teknar gegn þeim pervisnu meðal vor. Engar sannanir hafa heldur fundist fyrir leynilegu alheimssamsæri slöttólfa gegn passlegu fólki og þó hef ég ekki eytt litlum tíma í rannsóknir og óhefðbundnar yfirheyrsluaðferðir í gegnum tíðina.

Ástæðan sem vísindamenn hafa einangrað sem aðalorsök þessa hroðalega misréttis gegn okkur sem jarðbundnari erum, er helst sú að oftar en ekki móti karlmenn í hóflegum hlutföllum með sér lágt sjálfsálit gagnvart sundurteygðum meðbræðrum sínum. Eftir að eyða unglingsárunum í að horfa upp í nasirnar á hrokafullum bekkjarfélögunum er sá lágfætti orðinn svo niðurbrotinn að hann gerir minni kröfur til umhverfis síns en gálgatimbrið í kringum hann. Þegar Langintes heldur út í heiminn og stikar stórstígur milli vinnuveitenda með svimandi háar launakröfur í farteskinu telur sá stutti sig stálheppinn að fá að kjaga um með strollur af bónuskerrum á skítugu bílaplani fyrir strípaðan Dagsbrúnartaxta.

Að þessu leyti er meðalstubburinn í nákvæmlega sömu sporum gagnvart meðaldrjólanum og meðalkonan gagnvart meðalkarlmanninum.

Nú á tímum handvirks réttlætis og sértækra aðgerða hlýtur að vera lag að brjóta þetta óréttlæti á bak aftur. En hvað er til ráða kæru lágbræður? Sumir segja að best væri að skoða rót vandans og athuga hvort hægt sé með tíð og tíma að vinna bug á ranghugmyndum drengja á mótunaraldri um víðtæka kosti þess að reka sig stanslaust upp undir. Reyna kannski að rækta sjálfstraust þeirra þannig að þeir trani sér frekar fram en þeir gera í dag (eða brjóta horrenglurnar niður með linnulausum opinberum áróðri). En hver nennir því. Það gæti tekið tíma og þolinmæði og hver hefur þolinmæði fyrir einhverjum slánapungum sem hrifsa öll lífsins gæði úr höndum lágþýðunnar!

Nei, dvergakvóti er svarið!

Það þarf tafarlaust og án mikillar umhugsunar að setja lög sem skylda stjórnir fjármálafyrirtækja til að virða meðalhæð í landinu. Venjuleg fyrirtæki og störf skipta ekki máli af því þau eru leiðinleg…en stjórnir fyrirtækja sem borga óvenjulega há laun skulu vera nákvæmlega meðalháar. Hvort fyrirtæki leysa þessa þraut með því að skipa lágvaxið fólk til jafns við hávaxið, eða hvort þau ráða einn fótalausan frumdverg til að húrra niður meðaltalinu verður að vera þeirra mál. Svo lengi sem meðalhæð er náð, sigrar réttlætið.

Næsta skref verður svo að bæta inn í jöfnuna fleiri hópum bældra utangarðsmanna og tryggja á endanum jafna dreifingu allra flokkanlegra útlitseinkenna og kennda í gegnum öll æðstu lög samfélagsins. Veröld morgundagsins verður veröld þar sem stamandi, rauðhærðir, tvíkynhneigðir, daufblindir, nýbúar af öllum trúarbrögðum vaða í sjálfstrausti og peningum upp að meðalháum hnjám í skjóli jafnréttisráða.

Nafnleysingi brokkar á Jónasi

2009-02-09T23:13:00.001Z

Jónas Kristjánsson fer mikinn á vef sínum Jonas.is.

Bloggar fimm sinnum á dag, telur hverja heimsókn sem nýjan lesanda.

Telur daglega smelli jafngilda lestrartölum dagblaða.

Bloggar oftar en StebbiFr. Skammar íslendinga eins og hunda, slettir skyri.

Hirðir lítt um rökstuðning, þeim meira um endurtekningar.

Fjasar best um fiskmeti og hross. Kýs ýsuna sína ofnbakaða, án sósu.

Niður með trúfrelsi

2009-02-06T17:36:00.007Z

Trúfelsiskafli stjórnarskrárinnar er rusl og þarf að hverfa eins og hann leggur sig þegar stjórnarskráin verður tekin í gegn. Trúfrelsisklausur í stjórnarskrám verða til þess að allra handa hjarðhugar fara að halda að öðrum finnist ættleiddar ranghugmyndir þeirra um lífið og tilveruna merkilegar.

Trúfrelsi ýtir undir dekur við sérþarfir. Dekur eins og 5 milljarða árlegan fjáraustur í þjóðkirkju sem enginn stjórnmálamaður dirfist að stugga við í dýpstu kreppu íslandssögunnar af því að trúaðir eru orðnir svo gífurlega hörundssárir eftir mörg hundruð ár af trúfrelsisdekri að þeir myndu tryllast ef minnst yrði á það. Fyrst skera stjórnmálamennirnir niður heilbrigðisþjónustuna því Jesú yrði brjálaður ef við færum að taka veikt fólk fram yfir rándýrar kirkjur honum til dýrðar.

Nú halda margir eflaust að ég vilji afturkalla rétt fólks til að trúa hverju því bulli sem er í tísku hverju sinni. Það er mesti misskilningur. Fólk má trúa hverju sem er mín vegna svo lengi sem það heimtar ekki að ég borgi fyrir deleringarnar eða heimtar í nafni laganna að ég beri einhverja virðingu fyrir þeim.

Trúfrelsi er einfaldlega óþarft og skaðlegt hugtak - leifar frá tímum þegar kirkjan var allt í öllu og prestar þóttu klárir. Trúfrelsi er ekkert annað en undirflokkur skoðanafrelsis og með því að gera skoðunum fólks á yfirnáttúru hærra undir höfði en öðrum flokkum skoðana er verið að flækja málin að óþörfu og búa til vandamál. Skoðanafrelsi þarf enga undirflokka.

Öllum á að vera frjálst að hafa hverja þá skoðun sem þeim sýnist sama hversu rétt eða röng hún er. Sú skoðun að í skýjunum búi úrillur og almáttugur fauskur sem vill ekki að kallar í kjólum gifti homma og lesbíur á fullan rétt á sér...en hún er ekki að neinu leyti rétthærri en aðrar skoðanir. Ég hef til dæmis þá skoðun að menn ættu ekki að eyða mörgum árum í háskóla til að læra að klæða sig í gullslegna kjóla og jarma fyrir skattfé og að sunnudagsmorgnum sé betur eytt í þynnku en í kirkju. Þær skoðanir eru engu réttminni þó þær fái ekki sér kafla í stjórnarskránni.

Trúfrelsisdekur veldur því að fólk víða um heim telur að það sé mannréttindabrot að banna því að klæðast grímubúningum að eigin vali í opinberum störfum. Trúfrelsisdekur veldur því líka að einhverjir eiga eftir að mæta sárir í kommentakerfið og skamma mig fyrir að virða ekki stjórnarskrárvarðar tilfinningar þeirra...sem er líklega eina afleiðing trúfrelsis sem ég kem til með að sakna.

Hátt bylur í tómum pungi

2009-02-04T18:34:00.011Z

Jón Ásgeir er mesta grenjuskjóða á Íslandi. Ég hef aldrei vitað nokkurn mann gráta skuldir af jafn mikilli innlifun. Lítið barn myndi ekki gráta svona mikið hjá flogaveikum tannlækni í miðjum jarðskjálfta.

Því meira sem Jón Ásgeir ræpar í eigið möllett, þeim mun meira grætur hann og heldur augljóslega að í veröldinni finnist fólk sem er ekki drullusama um hans fjárhagslegu sjálfskaparvíti. Venjulegt fólk, sem vinnur í heilt ár til að afla svipaðra upphæða og Jón Ásgeir og félagar gætu splundrað í flórídanskar hórur á einu kvöldi, vorkennir Jóni og möllettinu hans ekki neitt þó hann hafi asnast til að glutra niður þúsund milljarða viðskiptaveldi af því hann er gráðugur plebbi. Enn síður missir venjulegt fólk svefn yfir því að sveittar breskar útgáfur af Jóni Ásgeiri eignist skuldirnar hans og borgi jafnvel af þeim framvegis - ólíkt honum. Jón Ásgeir er að verða uppiskroppa með lýðskrumstrix ef hann heldur að við fyllumst örvæntingu yfir því að Philip Green eignist einhverjar skuldsettar búllur í Bretlandi fyrir slikk. Nógu góður þótti Green til að kaupa allt draslið fyrir smápeninga þegar Jón Ásgeir sendi hann á fund viðskiptaráðherrans fyrrverandi til að leppa fyrir sig. Verra er þegar Green ætlar að halda góssinu og skilja Jón Ásgeir út undan. Þá fara tárin að flæða hjá litlum kút.

Ég viðurkenni alveg að það væri ekkert slæmt að geta keypt mitt eigið íbúðarlán af Íbúðalánasjóði fyrir 5% af heildarupphæðinni en ég ætla ekki að liggja beljandi á gólfinu þó ég megi það ekki og ég held ég myndi örugglega ekki skrækja af sjálfsvorkunn hefði ég keypt mér villu á Arnarnesinu á 100% lánum og sýsli væri að bera mig út fyrir að borga aldrei krónu af kvikindinu.

En...þetta er alls ekki alslæmt. Harmakvein Jóns eru talsvert skemmtilegra fréttaefni en áralöng síbylja um kaup hans á hinu og þessu. Það er bara óskandi að hann sé endanlega kominn á hausinn og kaupi aldrei framar neitt sem ratar í fréttir. Og allir sem hafa einhvern tíma stungið lúkunni ofan í rotnandi grænmetisgums í flúorlýstri Bónusverslun hljóta að fá einn stífan við að hlýða á kjökrið vella upp úr stuttum hálsi úfna milljarðarmæringsins fyrrverandi. Ég er að fíla það allavega.

Það sem ég er aftur á móti ekki að fíla er að heyra búðarloku rugla einhverju jafn leiðinlegu og greiðslustöðvun við eitthvað jafn skemmtilegt og pungspark. Ég játa á mig fávísi um smáatriði greiðslustöðvunarferlisins en mér heyrist Jón vita enn minna um pungsparksferlið fyrst honum tekst að þvæla þessu tvennu saman.

En nú er um að gera að hugsa í lausnum.

Ég legg til að ég og Jón hittumst og skiptumst á þekkingu. Ég lofa að hlusta á hann skæla um greiðslustöðvanir í smá stund og í staðinn skal ég gulltryggja að hann skríði burt fyllilega upplýstur um muninn á bókhaldsleiðindum og þéttingsföstu pungsparki.

Skrumburðalyndi

2009-02-02T20:15:00.006Z

Ok, ég vissi að það væri komin lesbía í forsætisráðuneytið og túrhaus í fjármálaráðuneytið...en núna situr nýja dómsmálakvensan í Kastljósinu og talar um einhvern "sérstakan" saksóknara og hversu mikla sérfræðiaðstoð hann komi til með að þurfa.

Er þetta ekki orðið ágætt?

Þreifingar?

2009-01-25T20:33:00.001Z

Er það bara ég eða fá aðrir líka hroll upp og niður bakið við tilhugsunina um allar þessar "þreifingar" sem stjórnmálamenn stunda á heimilum hvors annars þessa dagana?

AMX - Fremsti fréttaskýringavefur landsins, heilt yfir

2009-01-16T18:10:00.003Z

Ýtið til að hlæja

Stríðsglæpir?

2009-01-10T20:30:00.002Z

Af hverju flokkast það sem stríðsglæpur að brenna fólk til bana með fosfóri en ekki að tæta það í sundur með algengari sprengjum?

Ég hlustaði á einhvern valkvæman vælukjóa í fréttunum lýsa því í smáatriðum hversu illa brennheitt fosfór færi með þá sem verða fyrir því, en gat einhvern veginn ekki hætt að hugsa um gráhvíta palestínska hræið sem ég hafði séð á mynd fyrr um daginn. Sá hafði aðeins orðið fyrir ósköp hversdagslegu flugskeyti sem hafði snúið undan honum lappirnar og fyllt hann af brotajárni.

Ég huggaði mig þó við að honum hafi verið lógað á alþjóðlega samþykktan máta.

Blessunarlega var hann ekki brenndur áður en restin af ævinni var tekin af honum. Þá hefði hann líklega fundið til sársauka í nokkrar mínútur og það hefði verið hræðilegt.

Jóla template

2008-12-24T15:08:00.002Z

Mikið var yndislega notalegt að lesa jólahugvekju Stefáns Freys þetta árið. Uppáhalds brekkusnigillinn okkar er í svo ljómandi huggulegu jólaskapi að mann beinlínis vöknar um hjartaræturnar.

Lýsingar hans á huggulegu rölti um Akureyrarbæ í aðdraganda jóla eru svo hugljúfar og traustar að manni finnst maður næstum vera á röltinu við hlið hans, heilt yfir.

Eins og venja er á þessum árstíma líður herra Fr. um í sérdeilis indælum jólafíling, spjallar við kunningja um pólitíkina, sötrar rjúkandi kakó, kynnir sér miðbæjarbraginn og "þefar af nýjum bókum".

Já, hann hringir svo sannarlega inn jólin hann Bókaþefur okkar.

Og hverjum er ekki sama þó hugvekjan sé orðrétt sú hin sama og á Þorláksmessu í fyrra. Jólin eru jú alltaf eins og hví ætti Bókaþefur að bregðast okkur, dyggum lesendum sínum, með óþarfa nýjungasprelli.

Það eina sem ég get séð að hafi breyst á milli ára fyrir utan fyrirsögnina er að í ár er það verslun Eymundsson en ekki verslun Pennans sem er "stórglæsileg eftir breytingarnar" auk þess sem það var jóladiskur Ragga Bjarna sem var "hugljúfur og traustur" í fyrra en ekki jóladiskur Stefáns Hilmarssonar eins og í ár.

Njótið hátíðar ljóss og friðar, elsku lesendur.

Fjölmenning - Reynslusaga

2008-12-23T23:18:00.001Z

Nokkra daga á ári er tilveru minni umturnað af torkennilegum þjóðflokki. Tugþúsundum saman er þeim stefnt ofan af nálægum heiðum til að taka þátt í uppákomum af öllu tagi sem af einhverjum ástæðum eru alltaf haldnar í hverfinu mínu.

Í dag er einn slíkur dagur.

Á hverri Þorláksmessu fyllist hverfið mitt af kaupóðum heiðabúum sem leggja myntkörfulánunum sínum upp á allar gangstéttar og strunsa stressaðir um með kreditkortið í annarri og vasapelann í hinni, syngjandi jólalög sem ég hélt að Eyvi og Helga Möller væru búin að lóga fyrir löngu.

Það er eins og allir á heiðinni fatti um kvöldmatarleytið á Þorláksmessu að jólin verði að öllum líkindum þann 24. í ár eins og öll ár á undan, og að kannski sé skynsamlegast að fara að pæla í jólagjafakaupum. Ofan af heiðum rúlla þau. Svo einbeitt. Svo óð í varning. Þennan dag er ekki bílastæði að finna í hverfinu og litla friðsæla gatan mín verður að einni helstu umferðaræð borgarinnar þegar úlpukarlar með kúrekahatta og grenjandi athyglisbresti í aftursætinu rúnta framhjá á tíu mínútna fresti í örvæntingafullri leit að stæði sem aldrei losnar.

Starfsfólk ríkissjónvarpsins ólmast svo á hverju ári við að laða heiðafólkið til byggða með beinum útsendingum frá stórkostlegum skemmtiatriðum eins og Ragga Bjarna að gleyma textanum við jólalög sem jafnvel tregustu börn geta tautað í gegnum rítalínmókið. Og Bogomil Font að geifla geimveruandlitið í átt að heimaplánetu sinni - gefandi frá sér hljóð sem ég giska helst á að séu einhvers konar innrásarkóði.

Á Menningarnótt gerir heiðafólkið börnin að sendiherrum sinnar menningar og sendir þau í bæinn til að velta sér eftir götum miðborgarinnar, lemjandi og gubbandi, við hressandi undirleik Birgittu Haukdal og Páls Óskars. Börnin hafa það að vísu fram yfir foreldra sína að þau skilja bílana eftir heima, en liggja þess í stað sjálf eins og hráviði í öðru hverju bílastæði þegar birta tekur.

17. Júní er ekki skárri því þá minnast börnin fæðingu Jóns Sigurðssonar með því að klína mann fastan við götuna með kandíflossi að deginum til en koma svo gólandi út úr rökkrinu þegar kvölda tekur og sulla á mann landa og kirsuberjabríser þar sem maður liggur hjálparvana í sykurklístrinu og bíður dauðans.

Mér finnst eins og sífellt bætist við nýjar afsakanir fyrir heiðafólkið til að umkringja mig. "Menningarnótt". Handboltalandslið sem vinnur stundum leiki. Allt er notað sem afsökun til að elta næsta skutbíl ofan í miðbæ og fagna. Fagna og fagna! Ég óttast að brátt muni þau aldrei fara heim á milli þess sem þau fagna.

Ég held að það væri þjóðráð að halda þessa ómissandi stórviðburði í Grafarholtinu stöku sinnum, þó ekki nema til að spara fólkinu ferðakostnaðinn. Skutla Ragga Bjarna og Gittu þess í stað upp á heiði og leyfa heiðafólkinu að dansa í kringum þau fjarri ys og þys stórborgarinnar. Ég gæti jafnvel sýnt fjölmenningalega viðleitni og látið sjá mig. Mætt blindfullur í vatteraðri úlpu, sungið eitthvað leiðinlegt, grátið í símann, lagt þversum í öll stæði sem ég finn...og skrækt þindarlaust án sýnilegs tilgangs uns röddin brestur eða gambrinn ber mig yfirliði. Hvort sem gerist fyrst.

Gleðileg Jól by the way.

Á þvæluveiðum með Hnakkusi - Englaheilun

2008-12-10T22:47:00.005Z

Ég ætti að vera farinn að sætta mig við þá augljósu staðreynd að nákvæmlega helmingur mannkyns er undir meðalgreind en alltaf tekst mér samt að láta þetta fara í taugarnar á mér. Þó gætir ákveðinnar tvöfeldni hjá mér því að á sama tíma og ég er ekki beinlínis vinur heimska mannsins og gríp ófá tækifærin til að hlæja á hans kostnað, þá er mér enn verr við þá sem reyna stöðugt að græða peninga á honum.

Margar gerðir blóðsjúgandi kuklara og bullustampa eru svo algengar að fæstir velta þeim mikið fyrir sér dags daglega og má þar nefna miðla, árulesara, þjóðkirkjupresta og stjórnmálamenn. Oft vekja ýktustu dæmin þó kátínu manna og mér var einmitt bent á eitt slíkt um daginn.

Kona nokkur heldur úti heimasíðu þar sem hún falbýður dulræna hæfileika sína. Samkvæmt vörulista eru hæfileikar hennar aðallega tvíþættir. Annars vegar getur hún fært viðskiptavinum sínum skilaboð frá englunum með því að lesa í englaspil og hins vegar getur hún "fjarheilað" viðskiptavini.

Ef þið eruð að velta fyrir ykkur hvernig "fjarheilun" virki, þá er hér ítarleg útskýring af heimasíðunni:

"Hefur þú einhvern tímann velt fyrir þér hvernig þú nærð mynd á sjónvarpið hjá þér, nærð sérstakri rás á útvarpinu, eða hvernig hægt er að hringja í gemsann þinn?

Það er ekki á svo ólíkan hátt sem að hægt er að framkvæma fjarheilun."

Þar hafið þið það!

Stærsti kosturinn við þjónustuna er svo sá að hvorki hún eða kúnnin þurfa að fara úr húsi. Það er nóg að senda henni E mail og millifæra svo sambærilega upphæð og menntaður iðnaðarmaður myndi taka fyrir að koma heim til þín með fullan bíl af verkfærum og vinna fyrir þig í klukkustund.

Jafn einfalt og að leysa út arf eftir nígerískan afa sem þú vissir ekki að þú ættir!

Svona kostaboð gat ég ekki látið framhjá mér fara en þar sem ég er stálheilbrigður sjálfur, ákvað ég að búa til einstakling sem á við ögn fleiri vandamál að stríða en ég. Vandamál sem aðeins fjarheilari á internetinu gæti læknað.

Lofið mér að kynna Begga. Aðdáendur - Beggi....Beggi - aðdáendur.

Beggi, sem er hið mesta grey settist niður með mér og saman skrifuðum við félagarnir heilaranum lítið bréf:

"Sæl og takk fyrir a´hugaverða síðu

ég hef mikin áhuga á andlegum málum og er mjög spentur yfir því hvað þú hefur að bjóða líkt og englaheilun og fjarheilun. ég fer sjaldan út þannig fjarheilun er góð fyrir mig. ég er öryrki og þjáist af kvíða og þunglyndi og held að þetta með orkustöðcarnar gæti verið málið ég er samt svo spentur fyrir englaheilunini líka afþví´eg er mjög trúaður og finnst englarnir svo huggandi alltaf. er hægt kanski að fá hjá þér heilun sem væri fjarheilun en líka englaheilun eða svona blanda af tvemur?

besta kveðja beggi"

Örskömmu síðar barst Begga svarbréf:

"Komdu Sæll

Já ég get blandað þessum tveimur heilunaraðferðum saman, það er ekkert mál.

Og mér finnst mjög líklegt að orkustöðvar þínar séu mjög blokkeraðar vegna þess er þú nefnir.

Ég ráðlegg alltaf fólki að taka 3 daga í röð í heilun, því það er yfirleitt lágmark sem það tekur að hreinsa stíflurnar. En auðvitað ræður fólk hvað það vill gera. Það munar um hvern tíma.

Ég tek 2500 kr. fyrir hvert skipti og 7500 kr. fyrir heilunartíma 3 daga í röð.

Svo ef þú hefur enn áhuga eru greiðslu upplýsingarnar hér:

xxxx - xx - xxxx kt. xxxxxx -xxxx

Þegar lagt hefur verið inn er best að senda mér email og láta mig vita, hvenær þú vilt fá heilunina. Það er best að viðkomandi sé útafliggjandi á meðan. Það er mjög misjafnt eftir fólki hvort það finni fyrir nærveru minni á meðan. Fer eftir því hversu næmt fólk er á orku. En árangurinn er alltaf sá sami.

bestu kveðjur

xxxxxxx"

Beggi var í ákveðnu tilfinningaróti eftir að hafa stautað sig í gegnum svarið. Vissulega var sjokk að heyra að "orkustöðvarnar hans væru mjög blokkeraðar" en að sama skapi fannst honum hughreystandi að heyra að allt væri þetta læknanlegt með handhægri blöndu af englalestri og fjarheilun sem yrði heimsend rétt eins og slorug Dominos pizza.

Verandi í heimskari kantinum, náði Beggi að skauta gjörsamlega framhjá partinum þar sem hann var krafinn um klípu af örorkunni fyrir herlegheitin. Kampakátur sendi hann svarbréf til að tilkynna hvenær honum hentaði best að vera handfjatlaður af englaher:

"Þetta er virgilega gott að heyra og me´r hlakkar til að prófa þetta. á hádegi á morgun væri góður tími fyrir mig og þá ætla ég að legjast útaf í sjónvarpstólnum mínum og fá heilunina frá þér og englonum. geturu svo sagt mér hvaða skilaboð englarnir koma með handa mer?
takk fyrir allt. þinn beggi"

Hún svaraði ögn stressuð til að árétta að þjónustan væri ekki frí, en þá var vel liðið á kvöld og Beggi farinn að sofa án þess að líta meira á tölvupóstinn sinn það kvöldið:

"Já, sæll ég get gert það, en það þarf að vera búið að leggja inn fyrst 2500 kr. á xxxx - xx - xxxx kt. xxxxxx - xxxx

Ég mun svo senda allar upplýsingar á emaili sem ég fann fyrir hjá þér í heiluninni og koma með skilaboð til þín frá englunum.

Svo þú færð 2 fyrir 1 í dag.

kv. xxxxxxx"

Strax eftir þetta höfðinglega boð um tvo tilbúninga á verði eins, barst Begga annað bréf :

"Sæll aftur

Ég gleymdi einu, ég þarf líka að fá fullt nafn, heimilifang og staðsetningu svo ég geti tengst við þig í heiluninni.

kv. xxxxxxx"

Vitanlega virkar tilbúið bull ekki nema fyrir tilstilli nákvæmra persónuupplýsinga. En Beggi er ekki maður sem flækir hlutina fyrir sér. Hann vaknaði morguninn eftir, fullur af þessarri hreinu gleði sem aðeins þeir einföldustu meðal okkar eiga kost á að kynnast. Hann fékk sér gúlsopa af blómadropunum sem hann hafði fyrst heyrt af í kæfupósti viku fyrr, lagðist með lokuð augun í skítuga sjónvarpsstólinn sinn og bjó sig undir læknandi englastóðið. Lyfleysuáhrifin létu ekki á sér standa og Beggi stóð að lokum upp á ný, hressari en hann hafði verið í langan tíma.

Síðar um daginn hjálpaði ég honum að skrifa þakkarbréf til fjarheilarans:

"sæl og takk ofsalega vel fyrir heilunina ég fann svo rosalega góða tilfiningu streima um mig og ´mér l´iður betur núna ég fann eins og straum af velíðan um mig og það var eins og englarnir væru að strjúka mér að innan og utan og mérleið eins og þú værir hjá mér að passa upp a mig. svo fann ég líka góða tilfinningu á stöðum sem mér hefur ekki liðið vel á í langan tíma og ég vil þaka þér fyrior að hugsa svona fallega til mín
ég f´ór meira að segja út í dag eftir heilunina og fór á kaffihús sem er í hverfinu mínu og fékk mér caco og köku. ég hef ekkert farið út lengi í svona lagað af því ég er ekki svo góður í sálinni fyrr en núna.

p.s. sögðu englarnir þér eithvað um mig? eg er mjög spentur að heyra skilaboðin"

Ég beið æsispenntur eftir næsta svari frá fjarheilaranum. Ég hlakkaði til að sjá hvort hún væri nógu harðsvíruð til að eyðileggja skammvinna gervigleði fyrir minnipokamanni í þeirri von að kría út örfáa þúsundkalla. Það krefst svosem talsverðs siðferðilegs sveigjanleika út af fyrir sig að pretta pening út úr vesalingum sem á annað borð trúa svona vitleysu, en eftir þetta hroðalega aumingjalega bréf frá Begga hefði hún þurft að vera steindauð að innan til að halda þessu til streitu. Sem hefði auðvitað gert þessa færslu enn betri. En því miður beygði hún af fyrri stefnu og sendi Begga copy paste skilaboðin sín frá englunum alveg frítt.

"Sæll

Það er gott að heiluninn hafði þessi áhrif á þig. Það komu 3 englar með skilaboð til þín:

Fyrstur kom sjálfur Gabríel Erkiengill og vildi segj þér þetta:

Þú hefur mikilvægan tilgang með lífi þínu í sambandi við samskipti og listir. Ekki leyfa óöryggi að halda aftur af þér. Ég mun hjálpa þér.

Ég er með þér sem einn af þínum verndar englum. Þú ert kannski undrandi á því, af hverju að Erkiengill fylgi þér. Ég hjálpa mörgu fólki samtímis og þú ert ein af þeim. Ég hjálpa þeim sem hafa lífstilgang í samskiptum og listum. Ég mun hjálpa þér að fægja og treysta þínum náttúrulega tilgangi. Síðan mun ég opna dyrnar fyrir þér til að tjá þessa hæfileika á þann hátt að það hjálpi öðrum.Það sem ég vil fá frá þér í staðinn er heiðarleiki og samvinna. Segðu mér frá því sem þú hræðist, vonum þínum, ringulreið, óöryggi og draumum þínum. Biddu mig um að hjálpa þér. Og þá, vertu svo góð að ganga inn um dyr tækifæranna sem ég opna fyrir þér. Ég er við hlið þína 100%. Ég er eins og þjálfarinn þinn,og sem slíkur mun ég hvetja þig áfram. Taktu eftir, að ég er aðeins að ýta á þig vegna þess að ég veit að þú þarft smá spark handann frá.

Næst kom engillinn Raye og vildi segja þér þetta:

Að stunda jóga og æfingar eru frumskilyrði svo að þér líði vel, hafir frið innra með þér,og þroskist á andlega sviðinu núna.

Þú hefur fengið máttugan leiðbeinanda til að tengjast í jóga og öðrum formum af æfingum og þetta spil er staðfesting á því.Líkamleg hreyfing er hluti af því að gera sér grein fyrir draumum sínum, þrám og markmiðum. Það gefur þér orku og lífskraft, sem hjálpar þér að byrja og klára verkefnin þín. Það opnar fyrir nýjar og skapandi hugmyndir. Og jóga hreinsar og hleður orkustöðvar þínar svo þú munt heyra leiðbeiningar okkar englanna hátt og skýrt. Jóga leyfir einnig, hinum hávaðasama huga að hafa hljótt og hugleiða svo þú heyrir raddirnar á himnum. Jafnvel þó að þér finnst tilhugsuninn um jóga eða æfingar hræðileg, þá mun ég hjálpa þér að létta á því. Ef þú biður mig, mun ég hjálpa þér að finna prógramm sem að hentar þér í sambandi við tíma, áhuga og getu þinni. Þú munt fá leiðbeiningar í gegnum ágengnar hugsunar og tilfinninga, en einnig í gegnum upplýsingar um jóga og æfingar sem koma til þín eins og út í bláinn. Ég veit að þú ert upptekinn manneskja, en ég lofa því að eftir að þú hækkar orku stuðulinn þinn eftir svona æfingar mun það jafngilda því að þú bætir við nokkrum klukkustundum í sólahringinn.

Síðust kom engillinn Astara og vildi segja þér þetta:

Þú átt skilið það besta. Teygðu þig upp til stjarnanna, með drauma þína og þrár.

Í fortíðinni, hefur þú sætt þig við minna en þú vildir. En ekki lengur. Ég er hér til að hækka standardinn hjá þér. Ég er hér líka til að sýna þér að þú þarft ekki að þjást á neinn hátt. Það er ekki sjálfselska að vilja betra líf. Því meira sem þú færð , því meira getur þú gefið til annarra. Þegar þú leyfir okkur að gefa þér, er þér einnig gefinn öll þau tól sem þú þarft til að fylgja tilgangi þínum. Þú ert líka öðrum hvattning, þegar þú sýnir öðrum að andlega leiðin gefi þér allt sem þú þarft. Guð og englarnir vilja að þú njótir lífsins. Hamingja er heilagur partur af þínum Guðlega tilgangi. Hvað sem við getum gert til að gleðja þig, þá endilega biddu okkur. Við höfum tekið eftir því að þú hefur hikað við að biðja okkur um hjálp. Kannski fannst þér þú ekki eiga það skilið, eða að þú værir að taka frá einhverjum öðrum ef þú bæðir okkur um hjálp. En Guð þekkir aðeins allsnægtir,og mannkynið eru þau einu sem trúa á skort.

Þetta er ábending um að Guð og englarnir geta aðeins hjálpað þér ef þú biður okkur um það.

Þetta voru skilaboðin til þín

kv. xxxxxxx"

Hvað klikkaði á lokasprettinum? Kannski var seinasta bréfið frá Begga aðeins of aumkunarvert…kannski þótti fjarheilaranum Beggi ekki líklegur til að feta sig í heimabanka…kannski vöruðu englarnir hana við gildrunni í tíma? Líklega munum við aldrei komast að því.

Af Begga er það að frétta að eftir englaheilunina var hann eins og nýr maður. Alveg þangað til hann fékk massíft kvíðakast tveimur tímum seinna útaf alvöru sjúkdómnum sem þykjustu englunum mistókst að lækna, kleif upp á bókahillu og kastaði sér á vit englanna sinna.

Sú aðgerð mistókst eins og annað sem Beggi hefur tekið sér fyrir hendur um dagana. Líðan hans er nú svipuð og þegar við kynntumst honum en hann bindur aftur á móti miklar vonir við læknandi hendur höfuðbeina og spjaldhryggsnuddara sem hann kynntist á Herbalife samkomu.

Nú?

2008-11-21T19:37:00.000Z

Þegar kjararáð hefur ítrekað gefið ráðamönnum launahækkanir langt fram yfir almenna launaþróun í landinu hafa ráðamenn alltaf vísað allri gagnrýni á bug. "Það er kjararáð sem ákveður þetta. Við höfum ekkert um þetta að segja", segja þeir og leysa út tékkann.

Svo núna sendir Geir kjararáði allt í einu bréf og segir þeim vinsamlegast að lækka sig örlítið svo fólk hætti að vera reitt út í hann fyrir að skemma Ísland.

Var þetta þá ekki flóknara allan tímann?

Ef þessir vanhæfu vínabrauðssvelgir halda að fólk kætist gríðarlega yfir höfðingsskapnum þá er það misskilningur. 100% launalækkun er lokatilboð.

Fréttafölsun

2008-11-15T20:55:00.000Z

Ég eyddi tveimur stöfum úr upprunalegu fréttinni. Mér finnst hún skemmtilegri svona.

ESB

2008-11-15T13:01:00.001Z

Ég viðurkenni að ég veit ekki rassgat um ESB frekar en flestir og þess vegna hef ég held ég aldrei skrifað stakt orð um ESB. Fæstir viðurkenna þó að þeir skilji ekki upp né niður í þessu og láta það ekkert stoppa sig í að vera með eða á móti.

Fáir gera þetta samt jafn skemmtilega og ESB sinninn og stjórnarandstæðingurinn Jón Frímann sem notar flestar vökustundir í að sannfæra almenning um kosti þess að ganga í ESB:

Næsta færsla á eftir þessarri fer svo í að rakka niður þá sem efast um ESB:

Smassettímask

2008-11-14T20:25:00.003Z

Eruð þið róleg og glöð eftir múgsefjunarfund dagsins? Ekki ég. Ég ætla að mæta niður í bæ á morgun. Ég ætla ekki að mæta til að hlusta á Hörð Torfa sulla úr botnlausum viskubrunni þess sem kann á kassagítar. Ég ætla ekki að hlusta á Einar Má halda sjö klukkutíma ræðu um að stjórnvöld hafi brugðist á meðan útlimirnir á mér deyja hægum dauða úr frostbiti. Ég ætla heldur ekki að lemja saman ísköldum fingrunum í takt við ærandi gjallarhornsgarg Kolfinnu Baldvinsdóttur. En ef einhver er til í að gera eitthvað sem mögulega skiptir máli...þá er ég til.

Hvernig væri að labba að stjórnarráðinu, sparka upp hurðinni, ná í ráðherrastólana og smassa þá í mask á Lækjartorgi. Lygarassarnir sem verma þá á virkum dögum vita þá að þeir verða í stólunum næst ef þeir hætta ekki að ljúga, leyna og tefja. Löggan er fámenn og getur ekki neitt. Við sendum þá bara heim enda engin ástæða til að vera að slást við láglaunafólk nema þeir endilega vilji.

Pant mölva stólinn hennar Imbu. Hún fer alveg sérlega í taugarnar á mér þessa dagana. Imba skiiiiilur ESB. Henni finnst ósköp skiljanlegt að ESB þjóðir sem við töldum áður til vinaþjóða kúgi mig til að borga skuldir einkafyrirtækja sem komu mér ekkert við. Ætli Imba myndi sýna handrukkara skilning á meðan hann væri að stompa fjölskylduna hennar út af eiturlyfjaskuldum fjarskylds frænda? Örugglega. Imbu langar svo að vera með í ESB að hún skilur þetta allt saman! "Skuldsetjið ykkur í gjaldþrot eða sveltið" segja þeir og Imba kinkar kolli...skilningsrík. En hey...við fáum leifarnar af Landsbankanum til að selja og það hlýtur að duga upp í skuldirnar...jafnvel þótt engin gögn komi fram sem staðfesti það og þó enginn virðist vita hvaða eignir þetta eru til að byrja með. Ef þessar eignir eru svona verðmætar, af hverju geta þá bretar ekki bara haldið þeim upp í skuldir? Til hvers að flækja málin. Kannski af því það þær hrökkva skammt? En Imbu er sama. Hún vill fá að vera með í ESB.

Fokking Imba. Hún hangir eins og hrúðukarl með þráhyggjuröskun á utanríkisráðuneytinu þó hún sé óstarfhæf svo vikum skipti í miðri alvarlegustu utanríkissdeilu íslandssögunnar. Hún hangir af því hana langar að vera ráðherra. Og eðlilega gengur það fyrir starfhæfu ráðuneyti og framtíð Íslands.

Og hvar eru allir rándýru sendiherrarnir í rándýru sendiherrabústöðunum? Allir þessir kláru, vel launuðu kallar sem voru svo ómissandi að vinnandi fólk var látið borga undir þá hundruða milljóna híbýli til að þeir héldust í vinnu? Fullir ofan í kjallara líklega. Allavega virðast þeir ekki hafa náð að redda miklu. En þetta hlýtur að reddast núna. Imba er búinn að skipa vinkonu sína sem yfirsendiherra á sama tíma og hún sker niður nánast alla okkar þróunaraðstoð við alvöru fátæk lönd. Ísland grátbiður umheiminn um hjálp. Stóru upphituðu íbúðirnar okkar og bílarnir eru í hættu. Þægilegi lífsstíllinn okkar er í hættu og við þurfum að skera niður. Og hví ekki að byrja á að skera niður þróunaraðstoð til landa þar sem fólk á ekki skó og deyr ef það fær ræpu. Fokking Imba.

Samt fíla rosalega margir Imbu. Finnst hún skynsöm og sniðug. Rosalega margir fíla líka Magna. Það segir nákvæmlega ekki neitt um Magna og það segir heldur ekki neitt um Imbu. Ef þú fílar Imbu þá hefurðu rangt fyrir þér. Útrætt mál.

Af hverju er svo verið að semja við Breta og Hollendinga og Fjarskanistana? Af hverju ekki að segja þeim að fokka sér og segja okkur svo úr Nató. Sjá hvað þeir segja þá? Af hverju á ég að borga tap einhvers liðs sem kaus að eiga viðskipti við IceSave. Ekki var ég í viðskiptum við IceSave eins og þessir sauðir. Mín eina sök er að hafa komið undir í sama landi og plebbarnir sem settu alla á hausinn. "Hvar eru peningarnir mínir Íslendingar!" Segja þeir sárir. "Þeir eru væntanlega uppi í nefinu á glæpalýðnum sem þið sjálf kusuð að treysta fyrir þeim" segi ég á móti. En hver hlustar? Ekki Geir og svo sannarlega ekki Imba.

Ef ég fengi að ráða yrði Arnold ráðinn til að sjá um diplómasíuna fyrir hönd Íslands.

Arnold þekkir muninn á réttu og röngu

Mætið á morgun og ekki hlusta á eitthvað jarm um friðsæl mótmæli. Imba og Geir vilja að þið séuð friðsæl. Þessvegna róa þau ykkur alltaf á föstudögum með hálfkveðnum vísum og halda svo kjafti þess á milli.

Reddí fyrir mótmælin!

2008-11-01T12:38:00.000Z

Búinn að búa mér til skilti og allt.

Bréf frá fórnarlambi kreppunnar

2008-10-26T22:35:00.000Z

Kæri Hnakkus.

Margir barma sér nú um mundir og telja á sér brotið. Á síðunni hjá eineltisseggnum Agli Helga má reglulega lesa harmþrungin bréf frá fólki sem telur sig hafa misst mikið. Ég er orðinn alveg hundleiður á þessu væli. Sjálfur hef ég misst milljón sinnum meira en allt þetta fólk. Og það eru ekki einu sinni ýkjur!

Ég var vellauðugur áður en þetta sama vælandi hyski skemmdi allt fyrir mér með gegndarlausu flatskjáafylleríi, gasgrillabruðli og bílakaupum. Hvað er að túbusjónvörpum,kolagrillum og strætó?? Heldur þetta lið að það skipti einhverju máli hvort það hökti um á skuldsettum Musso eða með leið 14? Heldur það að Guiding light veiti þeim meiri lífsfyllingu í widescreen eða að rónasteikin bragðist betur ef þau brenna hana við með gasi? Það er hreint út sagt óþolandi að þetta lið sé að eltast við lífsgæði þegar það veit ekki einu sinni hvað alvöru lífsgæði eru. Svo kann þetta ekki einu sinni að skammast sín og dirfist að hreyta ónotum í menn eins og mig sem hafa raunverulega áorkað einhverju í sínu lífi? Ef það hefði drullast til að láta mig og mína um lífsgæðarallýið þá væri ég núna að súpa orginal 17. aldar koníak úr nafla sjö stjörnu vændiskonu á einni af snekkjunum mínum úti fyrir ströndum sólbakaðrar skattaparadísar. Eða að horfa á sænska fyrstu deildar blakliðið mitt rústa einhverjum aumingjum mér til dýrðar.

Græðgi þessa fólks og sjálfsvorkun er ógeðsleg.

Svo skæla þessir durtar yfir að missa einhverja leiðinlega vinnu sem borgar í mesta lagi 100.000 kall á mánuði? Sjálfur lyfti ég ekki símtóli fyrir minna en milljón og myndi ekki lyfta því til að hlusta á væl yfir einhverju klinki. Hvað þá að ég nenni að hlusta á einhverjar fáránlegar ásakanir í minn garð!

Ég eignaðist mína milljarða alveg sjálfur. Ég þurfti að hafa fyrir því að láta lögfræðingana mína stofna ótal aðskilin eignarhaldsfélög utan um sjálfan mig. Þannig dreifði ég ábyrgðinni á gjörðum mínum í sem flest hólf af einstakri útsjónarsemi og elju til að geta óhræddur dælt lánuðu fé inn í landið. Ég þeyttist heimshorna á milli í mörg ár í einmanalegum en sérlega smekklega innréttuðum einkaþotum (hef þurft að selja aðra þeirra síðan takk fyrir!) til að drekka kókaínblandað kampavín með viðskiptafélögum, lánadrottnum og einhverjum gömlum súrum allaballa sem var alltaf að elta okkur út um allt. Og til hvers?? Til að láta pöpulinn kaupa sér fjöldaframleidda tjaldvagna eða kúldrast á almennu farrými til Costa Del Sol fyrir allan peninginn?? Það er sárara en tárum taki að horfa á margra ára vinnu gufa upp vegna græðgi og heimsku aula sem myndu ekki þekkja Ora kavíar frá Ora grænum.

"Frystið eigur auðmanna!" grenja þau í kór. Hvernig væri frekar að frysta þau í litlu ljótu kommóðuskúffunum sem þau kalla íbúðir og selja hitann og rafmagnið til erlendra stórfyrirtækja með minni milligöngu? Þá fæ ég kannski brot þeirra verðmæta sem ég hef tapað til baka! Eða frysta myndina á litlu ógeðslegu Elko flatskjánum þeirra svo þau snáfi kannski á fætur og fari að gera eitthvað af viti?? Þá kannski gætu þau einhvern tíma borgað mér til baka allt sem ég hef tapað á veiklyndi þeirra og eyðslusýki!

Fjárhagslega tapið er þó ekki það sem svíður sárast, Hnakkus. Vanþakklætið er verra. Undanfarin ár hef ég látið milljónir renna til athyglissjúkra gjörningalistahópa, fullorðinna manna í boltaleik og fárveikra gríslinga sem ég þekki ekki neitt. Ég hef meira að segja lagt heilsu mína í hættu með því að leyfa fjölmiðlunum mínum að mynda mig með gjafirnar á lofti innan um hóstandi gemlingana! Fólk mætti líka þakka mér fyrir að hafa nennt að halda úti smávöruverslun í þessu litla ljóta landi af einskærri góðmennsku þó það tæki því varla fyrir mig! Hvar annars staðar var þetta lið að plana að fá hóflega verðlagt og lítið skemmt grænmeti lengst úti í rassgati?

Nei, íslensk alþýða kann ekki að skammast sín. Hún ætti að biðja mig afsökunar og þá kem ég kannski seinna og gef henni góð ráð til að krafsa sig út úr örbyrgðinni. Kannski.

Mótmælarýni

2008-10-25T23:08:00.003Z

Ég fór á mótmælin í dag og frysti af mér stórutærnar og eyrun til einskis. Ekkert var brennt og engum var bylt. Geir og Imba sátu örugglega heima í rólegheitum og horfðu á Dr. Phil með meirihluta þjóðarinnar á meðan baulað var á tóman ráðherrabústaðinn.

Það er nauðsynlegt að koma ógrynni af vígreifu fólki út á göturnar en það mun aldrei gerast undir þessarri forystu. Ómar Ragnarsson er frábær gaur. Það er varla neitt neikvætt hægt að segja um Ómar. Hann er bjartsýnasti orkubolti sem til er og það er varla til sá maður sem kann ekki vel við hann. En hann er ekki byltingarleiðtogi. Hann er of bjartsýnn og jákvæður. Besta mómentið var þegar hann valsaði í ræðupúltið til að flytja lag því eitt augnablik hélt ég að hann myndi taka fugladansinn. En mér varð ekki að þeirri ósk. Hann söng eitthvað frumsamið bjartsýnislag sem kom engum í skap til að brjóta neitt. Og hann söng það tvisvar. Sem var ekki sterkt múv.

Kolfinna Baldvinsdóttir var þarna í fylgd foreldra. Gömlu hjúin stóðu skammt undan á meðan hún ýmist gargaði í lánsgjallarhornið eða í míkrófón. Hún gargaði og stappaði að leikrænum lýðskrumarasið og tilgerðarreiðin var allt annað en sannfærandi. Tennurnar á mér glömruðu orðið af kulda þegar þarna var komið sögu. Eða var þetta bjánahrollurinn? Ég fékk á tilfinninguna að Baldvin gamli og Bryndís væru að undirbúa löngu fullorðna dóttur sína fyrir pólitískan feril. Þau minntu óneitanlega á mörgæsapar þar sem þau stóðu í síðu skinnkápunum sínum og fylgdust stolt með unganum sínum kvaka á lýðinn.

Arnþrúður Karlsdóttir steig í pontu og hreytti nokkrum illa völdum klisjum í átt að hópnum sem reyndi að klappa í sig stemmningu. Eða var bjánahrollur viðstaddra kannski orðinn svo ofsafenginn að hendleggir þeirra lömdust tilviljunakennt saman í hamaganginum og sköpuðu stundarkorn tálsýn fagnaðarláta? Arnþrúður Karlsdóttir er ekki manneskja sem fólk vill fylgja. Hún er ómarktækur skipstjóri á rugludalli. Ef hún fengi að ráða væri frjálslyndi flokkurinn í meirihluta. Meira þarf ekki að segja.

Jón Baldvin gamli fetaði í fótspor dóttur sinnar og hélt blaðlausa tölu. Eftir áralanga útlegð í vínkjöllurum sendiráðsins í Washington hefur hann risið upp eins og fönix með svörin við öllum lífsins gátum. Hann þrumaði skammir til ráðamanna og allt hitti í mark. Hann lét þetta virka auðvelt. Enda er þetta frekar auðvelt held ég. Ég heyrði samt minnst af því sem hann var að segja því ég var svo upptekinn að pæla í því af hverju einhver kýs að ganga um með tveggja rúmmetra loðhúfu sem nær svo ekki einu sinni yfir eyrun. Það meikar bara ekkert sens! Að hlýja sér á eyrunum er markmiðið með húfum!

Snorri Ásmundsson átti bestu ræðuna. Ekki bara af því að hann kallaði Geir H. Haarde gungu, heldur líka af því hún var cirka 30 sekúndur að lengd.

Meðalaldur mótmælenda var alltof hár. Ungt fólk lætur varla sjá sig á svona samkomum og maður getur vart láð þeim það. Hver vill eyða æskunni í að hlusta á Arnþrúði Karlsdóttur spúa eitri. Eldri kynslóðin er glerfín en hún er settleg og brýtur ekki neitt né bramlar. Meðalaldurinn þarna var líklega 45 ár og fólk mætti í fínu fötunum. Það byltir enginn neinu í fínu fötunum.

Einhver rígur virðist svo kominn upp milli tveggja hópa skipuleggjenda sem gera sitt besta til að aðskilja sinn mótmælendahóp frá hópi hinna. Í athyglissýki sinni finnst þeim mikilvægara að tryggja að kastljósið beinist eins rækilega og hægt er að þeim sjálfum en ekki að verkefninu sem við stöndum frammi fyrir. Að moka þaulsetnu hyski úr stjórn landsins sama hvað það kostar. Ég lagði á mig að standa úti í kulda og hlusta á steikur röfla af því ég vonaði að eitthvað myndi gerast. Er til of mikils mælst að skipuleggjendurnir sjálfir parkeri athyglissýkinni rétt á meðan við byltum þessu drasli?

Það þarf eitthvað alveg nýtt að gerast ef hlutirnir eiga að breytast. Hvar er allt alvöru klára fólkið sem gæti gert eitthvað af viti? Af hverju eru bara kjánaprik og sérvitringar í forgrunni í öllum umræðum og aðgerðum?

Mín tilgáta er að sálardrepandi, óheiðarlegi og tímafreki viðbjóðurinn sem íslensk flokkapólitík er hafi löngu hrakið allt almennilegt fólk í vel borguð störf langt frá heimskulegu glamrinu. Til að fá almennilegt fólk þurfum við að losna við kasúldið kerfið og til að losna við kasúldið kerfið þurfum við almennilegt fólk.

Erfið klemma.

Rifið utan af blórabögglum

2008-10-25T13:10:00.000Z

Mótmælin í dag fá samþykkis stimpil Hnakkusar og verða því líklega fjölmennari en síðast. Það fór í taugarnar á mér síðasta laugardag að verið væri að beina allri reiðinni að Davíð einum (stefnuföst reiði?). Ekki af því að hatur mitt á Davíð sé af skornum skammti heldur af því hann skiptir litlu máli einn og sér á þessum ákveðna tímapunkti. Það er skæð sjálfsblekking að ímynda sér að allt myndi lagast ef guðfaðirinn færi á eftirlaun. Boðskapur dagsins í dag er skárri. Ekki fullkominn, en nothæfur. Við þurfum að mæta og við þurfum að vera mörg. Það skiptir meira máli en samrýmdur boðskapur.

Framvegis mætti samt tóna niður kellingalega nýaldartóninn í hvatningartextanum:

"Mætum öll á Austurvöll, til að sýna fram á að við höfum rödd, sýnum hvert öðru samhyggð, að við stöndum saman, og ef ekki einfaldlega til að finna að við erum ekki ein og að við finnum til. Kyndla er hægt að kaupa í Rúmfatalagernum (en búast má við að kyndlar verði til sölu á Austurvelli, ekki komið á hreint). Okkur vantar gjallarhorn, ef einhver á slíkt."

"Samhyggð"? Hvað erum við...tárvotir þjóðkirkjuprestar? Við mætum bara og látum helvítin heyra það eða fá það óþvegið eftir hversu góð stemmning myndast. "Sýna að við finnum til"? Látum frekar andstæðinginn finna til! Og þetta með gjallarhornið er veikt og á ekkert erindi á forsíðu. Kaupa bara gjallarhorn eða fá það lánað þegjandi og hljóðalaust. Ekki láta ráðamenn halda að það sé ofverkið að redda einu gjallarhorni. Þeir verða ekki hræddir við lið sem getur ekki reddað gjallarhorni og vill bara sýna samhyggð. Ekki auglýsa þeir eftir lánsgasi og lánskylfum á sínum heimasíðum.

Ekki misskilja þetta sem niðurrifs gagnrýni á framtakið. Það er nauðsynlegt, og gott að einhver sé að eyða tíma í að plana. Útfærslan fer batnandi en þarf pússun (megið alveg hóa í gamla ef ykkur vantar meira krassandi texta).

Það verður nóg af fólki að marsera þarna í dag sem ég er venjulega ekki sammála um margt, og líklega slatti að fólki sem fer í taugarnar á mér fyrir hitt og þetta. En það skiptir ekki máli í dag. Í dag marsera allir hlið við hlið. Sultuhundar og internet-ofurhetjur.

Það þarf að moka öllu helvítis pakkinu út. Í stjórnarráðinu sitja drýldnir stjórnunarfíklar sem líta á það sem kosmískt hlutverk sitt að fá að stjórna öðru fólki sama hversu illa þau klúðra. Þau eiga afsakanir og útúrsnúninga á lager. Ríkisstjórnin er eins og illa upp dregið barn sem hefur ræpað af afli í bleyjuna sína og heimtar að fá að skipta á sér sjálft. Ef maður leyfir slíkt þá endar maður með kúkaklessur í sófanum eins og Britney. Þau vissu ekkert hvað þau voru að gera þá og þau vita ekkert hvað þau eru að gera núna. Út með þau strax.

Blaðamannafundurinn í gær var ekki góður eins og sumir virðast halda og hann rauf ekki þögnina. Það kom nánast ekkert nýtt fram og það sem kom fram var kyrfilega naglhreinsað. Þau voru bara að kaupa tíma. Það á ekkert að segja okkur fyrr en búið er að ákveða og undirrita framtíð okkar. Þinginu kemur þetta ekkert við heldur. Þingmennirnir sitja bara á Alþingi og rausa um að koma áfengi í búðir sem verða bráðum ekki til.

Við eigum að vera stillt. Við eigum ekki að benda. Bara að þegja og borga. Sýna samstöðu með föngurum okkar og ekki leita blóraböggla. Leyfa þeim að halda áfram að klína kúk í sófann.

Fokk that sjitt segi ég.

Mætum og tætum!

p.s. Ég sá Össur Skarphéðinsson vera að brjóta lög í gær með því að tala í farsíma undir stýri án handfrjáls búnaðar. Það var gaman.

Á tali með Árna Matt

2008-10-24T02:01:00.000Z

- Dag einn á skrifstofu Árna Mathiesen. -

Árni situr á skrifstofunni sinni. Tómleg, friðsæl augu hans stara út í loftið þar sem hann situr og handfjatlar tólið. Hann slær inn símanúmer. Það mistekst. Eftir ófáar tilraunir í viðbót tekst honum loks að slá inn númerið sem hann hafði skrifað á handabakið á sér daginn áður. Hann lyftir tólinu að eyranu:

ÁMM: Árni Mathiesen hér, dýralæknir frá Íslandi.
AD: Já sæll, Alistair Darling hér, enskur ráðherra með grátt hár en svartar augabrúnir.
ÁMM: Já blössar! Hvað segir'ann?
AD: Ha?
ÁMM: Kjellinn hrezz?
AD: Ha..já já svosem. En hvað viltu mér, dýralæknir? Hljóma ég eins og ég þurfi á ormalyfjum að halda? Er ég kannski litla kisan þín?
ÁMM: Æi ég átti að hringja í þig útaf einhverjum pening. Smááá vesen. Cash flow problem á gamla Fróni! Þú skilur.
AD: Alls ekki. Ég skil ekki orð sem þú segir, Dýralæknir. Ekki storka mér og heimsveldinu frekar.
ÁMM: Vó, rólegur. Ég átti bara að hringja til að segja þér að við getum kannski borgað ykkur eitthvað sem við skuldum ykkur kannski. Skiluru?
AD: Ég skil ekki einu sinni þetta asnalega tungumál sem við erum að tala hvað þá að ég skilji sveitalegt rausið sem bergmálar úr þínum hola gómi, skrælingi.
ÁMM: Tsjill out, Darling. Við fáum allvega einhvern pening seinna kannski og þá borgum við kannski. k?
AD:Borgaðu bara strax eða ég smassa þig í mask! Ég smassa ljóta punginn á þér í fokking mask ef þú borgar ekki strax! Heyrirðu það!
ÁMM: Rólegur gamli! Ég fæ hreðjaverki af að hlusta á þetta.
AD: Ha? Sagðirðu "hryðjuverki"?
ÁMM: Já var það ekki? Allavega þá þarf ég að fara. Youtube myndbandið af hnerrandi pöndunni var að klára að hlaðast og ég ætla að fara að horfa á það. Later gamli!
AD: Þú ert dauður, kotbóndi. Þú og allir sem þú hefur hitt á þinni lítilsverðu ævi. Máttur bresku krúnunnar mun mylja þína litlu aumu þjóð. Drottningin mun nota handritin ykkar sem tehettur og spólgraðir, hrímhvítir félóþursar munu streyma úr iðrum kolanáma hennar hátignar og flykkjast í ódýrar kynlífsferðir til Reykjavíkur til að skíta út genamengi ykkar til frambúðar. Þú hefðir betur sleppt því að ögra krúnunni.
ÁMM: HAHAHAHAHAHAHHAAHA pöndur hnerra svo sætt! HAHAHAHHAHA...*fruss*(Leggur á)

Nýju fötin hryðjuverkamannsins

2008-10-23T11:02:00.001Z

www.indefence.is

Leggðu frá þér pennann, Björgvin.

2008-10-22T02:25:00.002Z

Þetta má ekki gerast.

Ríkisstjórnin virðist vera komin á fremsta hlunn með að skuldbinda Íslendinga til að borga allar innistæðuskuldir Landsbankans sáluga þó enn sé ekki fullkannað hvort okkur beri einu sinni lagaleg skylda til þess. Og þetta virðast þau ætla að gera án þess einu sinni að segja okkur af hverju þau eru að þessu.

Hvað býr að baki? Eru þetta IMF skilmálarnir sem koma okkur ekki við? Eru bretar að hvísla hótunum um gjaldþrot og yfirtöku lands og auðlinda í eyru ráðherra? Hótanir sem má ekki að segja okkur frá? Horfði Gordon Brown á Benna Olsara í Kompás og tók nótur? Hvað veit maður svosem. Ýmislegt flýgur í gegnum hugann þegar örfáir ráðherrar álíta framtíð 300.000 manns vera sitt einkamál.

Hverjar verða afleiðingarnar og hvers konar fordæmi setur það að lúffa þegjandi og hljóðalaust fyrir bullum? Hverjir koma næst með vafasamar kröfur?

Af hverju ættum við að samþykkja að ríkisstjórn sem telur trúnað við alþjóðlegar stofnanir mikilvægari en trúnað við eigin kjósendur, samþykki afarkosti fyrir okkar hönd? Af hverju ættum við að láta það yfir okkur ganga að sömu bjánarnir og sátu aðgerðarlausir við stjórnvölinn meðan landið var rænt, sitji enn og í gjaldkerastólnum og moki seðlum yfir borðið.

Þetta er álíka lýðræðislegt og rafræn kjörvél í blökkumannahverfi í Flórída.

Ef þau ætla að samþykkja þessa risaskuld fyrir okkar hönd án þess að tala við okkur þá eru bara tveir kostir í stöðunni sýnist mér. Að smíða fleka og sigla til Zimbabve, eða láta þau tala. Ég myndi kjósa seinni kostinn enda aldrei verið góður í að slá nagla.

Hvað ætli þurfi marga fullsadda eyjaskeggja til að fylla hjörtu verðandi landráðamanna af auðmjúkum ótta, og brækur þeirra af ylvolgu hlandi?

5.000? 10.000? 20.000? Tékkum á því.

Af hverju éta þau ekki bara álpappír?

2008-10-19T11:48:00.003Z

Ef einhverjir eru eftir þarna úti sem eru ekki farnir að sjá í gegnum atvinnukrúsídúlluna Dorrit Mússajeff þá mæli ég með þessarri grein.

„Ég elska Ísland en hingað til hef ég getað unnið Íslandi meira gagn erlendis en hér heima. Ekki hefur verið eins mikil þörf fyrir mig hér, en ég hef samt lagt áherslu á að fá áhrifamikla útlendinga til landsins, einkum í markaðssetningu í hverri grein. Það er mér mikilvægt.“

Ég hef einmitt verið að velta þessu fyrir mér. Hún og "Úlafúr!" hafa verið á spani um heiminn síðustu ár undir því yfirskyni að þau séu að koma "Íslandi á framfæri" og "afla okkur mikilvægra sambanda".

Hvar eru öll þessi sambönd núna? Æ já, þau eru ekki til. Öllum er sama. Nema Dorrit og "Úlafi" sem eru allt í einu komin heim með fullan bíl af umhyggju eftir að hafa teikað möllettið á Jóni Ásgeiri í gegnum gjálífi heldri borgara í mörg ár . Og við eigum að falla í stafi af því einkaþoturnar fóru á uppboð og þau komu heim á almennu farrými. Grátstafi helst. Eins og vangefin börn með þörf fyrir viðurkenningu. Nigga please!

Ég vona að fólk sjái í gegnum þetta en er ekkert alltof vongóður því miður.

Áfram heldur Frú Dorrit:

"Og forsetafrúin gagnrýnir efnishyggju Íslendinga: „Þjóðfélagið er orðið mun peningadrifnara og fólk er ekki eins meðvitað um arfleifð sína – það var svo ánægt með landið og stolt af sögu þjóðarinnar en gildin urðu óljósari og viku sumpart fyrir efnishyggjunni. Kannski er það augljósara þeim sem horfir gestsaugum á samfélagið. Alltof margir tóku peninga að láni til að kaupa hluti sem þeir þurftu ekki. Bíll þarf bara að vera á fjórum hjólum til að komast á milli staða og tilgangur úrs er að mæla tímann. Ég er reyndar í úrabransanum, þannig að ég ætti kannski ekki að segja þetta!“ segir hún og hlær.

Forsetafrúin leggur ennfremur áherslu á nýtni og sparsemi: „Ég hef lagt áherslu á það hér á Bessastöðum að endurnýta allt sem hægt er, litla hluti eins og álpappír, og stundum er gert grín að mér fyrir vikið."

Gagnrýnir efnishyggjuna??? Ef hún er svona klár í úrabransanum þá ætti hún að vita að það er haltu kjafti tími!

Ef Dorrit er svona flink í að lifa á álpappír þá ætti hún að gefa alla milljarðana sína í sjóð til að aðstoða þá sem eru að missa heimili og atvinnu útaf bröltinu í djammfélögum hennar.

Dorrit hefur alltaf verið moldrík en hún vildi vera drottning líka. Núna lifir hún heimatilbúnu hirðlífi á okkar kostnað og les yfir okkur um sparsemi frá Bessaversölum á meðan allt skolast niður í klósettið.

Stórasti hræsnari í heimi.

Niður með Davíð!

2008-10-18T16:44:00.003Z

Mótmælabransinn er snúinn á Íslandi. Oftast mæta fáir fyrir utan Albaníu Valda, Elías Davíðsson og Geir Jón. Eins og sumum finnst hressandi að góla Nallann á hálf sofandi sumarlöggur, þá höfðar það ekki til hins venjulega Íslendings og fólk fær gjarnan bjánahroll á íslenskum mótmælum. Ef meðaljóninn slysast á mótmæli þá mætir hann oftast ekki nema einu sinni. Og þá aðeins ef hann fær bílastæði nálægt.

Þetta á samt allt eftir að breytast mjög fljótlega þegar annar hver maður verður atvinnulaus og fólk fer að finna áhrifin af hruninu á eigin skinni. Þá verður skipulagning óþörf og fólk mun mæta með eitthvað annað en spjöld.

Mótmælin í dag voru líklega ágætis æfing fyrir það sem koma skal en höfðu alltof þröngt markmið til að ná fjöldanum út úr húsi. Þó vil ég taka fram að ég fullkomlega sammála kröfunni sem slíkri því Davíð er vissulega auli eins og árvökull mótmælandi benti á. Hann ber mikla ábyrgð og ætti auðvitað að vera löngu farinn að drekka út þessi fínu eftirlaun sem hann skammtaði sér. En hann ber ábyrgðina alls ekki einn og óstuddur og hann er ekki síður en svo allt vandamálið. Að einblína of mikið á hann einan er tiltölulega gagnslaust og í versta falli hættulegt. Hættulegt af því að ef fókusinn á Davíð verður of sterkur er hætt við að aðrir fari sínu fram á meðan lýðurinn fær útrás (haha útrás) á Davíð. Hættulegt af því að stór hluti fólks verður aldrei sammála svona þröngri greiningu vandans og mun sniðganga mótmæli byggð á henni. Hættulegt af því að þeir sem þó mótmæla gætu litið á það sem fullnaðarsigur þegar gamla flónið hrökklast loks á brott. Það myndi henta mörgum öðrum ákaflega vel.

Ég myndi vilja sjá mótmæli gegn öllu helvítis pakkinu. Gegn öllu kjaftæðinu en ekki bara hluta þess. Ráðherrum sem voru annaðhvort of heimskir eða of óheiðarlegir til að gera íslendingum grein fyrir ástandinu og reyna að afstýra því. Þingmönnum sem þrösuðu um fánýti og tóku heimsins lengstu sumarfrí á meðan fjárdólgar skuldsettu þjóðina til að reisa pappírspýramída. Nýskipuðum bankastýrum sem voru vel launuð tannhjól í svikamyllunni en skarta nú bleikum geislabaugum í hærri stöðum. Eftirlitsaðilum sem eiga að rannsaka sjálfa sig. Konungsígildi sem breyttist á einni nóttu úr alþjóðlegu útrásarpartíljóni í auðmjúkan alþýðumann eftir að ríku vinir hans stungu af. Spilltu kerfi sem þarf að opna upp á gátt

Líklega telja sumir varasamt að reyna að skipuleggja mótmæli með of víðtæk markmið en ég held að það virki betur. Mótmæli með almenn markmið leyfa hverjum og einum að mæta og mótmæla á sínum forsendum. Hópurinn er vel fær um að stilla sig saman þegar á hólminn er komið en aðalatriðið er að fá nógu marga ósofna íslendinga út á göturnar til að hné ráðamanna fari að skjálfa.

Leiðarvísir fyrir reiða og ráðvillta

2008-10-15T23:48:00.002Z

"Lýðræðið er rotnandi hræ"
- Eitthvað rotnandi hræ -

Áður en lengra er haldið vil ég ganga úr skugga um að allir átti sig á því að við erum fucked. Það er ekkert að fara að gerast sem bjargar okkur fyrir horn, við erum ekki "bara að ganga í gegnum alþjóðlega niðursveiflu eins og allir hinir" , Pútín er ekki hingað-til-vanmetinn jólastrumpur sem ætlar að gefa okkur pening í skóinn svo allt verði aftur eins og það var í sumar og Alþjóða gjaldeyrissjóðurinn lumar ekki á rewind takka. Tarðarnir sem voru við stjórn á meðan allt skolaðist undan okkur eru ennþá á sínum stað. Ekki það að aðrir valkostir væru vænlegri. Við erum screwed. Fátæk og fyrirlitin. Gleymd og grafin. Höggbylgjan er bara á leiðinni ennþá og þess vegna líður okkur bærilega akkúrat núna, þrátt fyrir að vita innst inni að við sitjum föst á kaldri, afskekktri eyju með afskráðan og verðlausan gjaldmiðil á ríkisbankabókum.

Innst inni áttar lýðurinn sig á þessu og vill vita hverjum sé best að kenna um kreppuna á meðan örfáir meðvirknisjúklingar fussa og sveia yfir fingrabendingum á tímum samstöðu og stubbaknúss. Meðvirkni og sáttfýsi er aftur á móti fyrir aumingja og ekkert er eðlilegra en að vilja vita hvern sé réttast að berja fyrir að breyta manni í fátækling. Leitin virðist aftur á móti vefjast merkilega mikið fyrir fólki, líklegast vegna þess að of mikið kapp er gjarnan lagt á að finna einn vel innpakkaðan sökudólg. Einn ljóta kall sem ber höfuðábyrgð á inngöngu Íslands í þriðja heiminn. Einn staðgengil illsku og ósóma sem framar öllum hefur keppst við að varða veginn röngum ákvörðunum. En ég kem aftur að Davíð Oddssyni á eftir. Það sem ég er að reyna að segja er að það er engin þörf á að láta sér nægja eitt skotmark. Það þarf að moka vel út úr fjósinu svo núna er rétti tíminn til að gera vel við sig í hatri og bræði.

Tugir ef ekki hundruðir manna eiga beina sök á ástandinu. Fólk sem er ekki einungis sekt um að fljóta sofandi að feigðarósi í fáfræði sinni og óskhyggju eins og við flest, heldur fólk sem beinlínis hefur þegið greiðslur fyrir að gæta hagsmuna almennings á einn eða annan hátt, en brugðist annaðhvort óvart vegna vanhæfni, eða viljandi vegna eiginhagsmuna.

Fjármálaeftirlitið, Bónus grísir, Bjöggar (mínus feiti fótboltabjögginn), S-hópar, Bakkabræður, bankastjórar, sjóðsstjórar, skeiningadeildir, sofandi þingmenn og sjálfumglaðir ráðherrar, rannsóknarblaðamenn sem eltast við heimska smáglæpamenn í stað stórglæpamannanna sem greiða þeim laun, Tjallapungar í atkvæðaveiðum á hálfvitamiðum...

Listinn af fólki sem þarf að fokka sér er langur.

Baugsliðið og sjálfstæðisliðið bítast hinsvegar fyrirsjáanlega um það þessa dagana hvor beri ábyrgð á kreppunni, Davíð eða Jón Ásgeir. Eins og valkostirnir á hlaðborði hatursins séu bara tveir! Smásálirnar vilja nota ástandið til að skerpa línuna milli kúks og skíts í von um endanlegan sigur í ævafornu nöldurstríði. Ég býð betur.

Davíð Oddson, faðir frelsisins, mætir í Kastljósið og sefar hálfa þjóðina með föðurlegum lygavaðli og einhverri illskiljanlegri fjármálavisku frá ömmu sinni og allt er gott í einn dag. Þjóðin kastar öndinni og skilur ekki hvernig allur þessi kreppumisskilningur fór eiginlega af stað. Alveg þangað til daginn eftir þegar allir frá flokksbræðrum Davíðs, til rússneskra og breskra embættismanna, keppast við að leiðrétta þvæluna í gamla og endurræsa kreppukvíða landsmanna.

Jón Ásgeir mætir svo í Silfrið sviplaus af siðblindu og hálf þjóðin fyrirgefur honum nánast samstundis fyrir að hafa steypt öllum landsmönnum í skuldafen af því að hann "hélt ró sinni" og "kom svo vel út úr þessu miðað við". Meðvirknin er svo sterk í landanum að Egill greyið fékk svo á baukinn fyrir að hafa byrst sig við skíthælinn fyrir hönd okkar allra. Er fólk ekki að fokking grínast? Ég skil ekki einu sinni ennþá hvernig Egill fór að því að hoppa ekki á kúkalabbanum vel fram í næsta dagskrárlið. Ég væri ennþá að hoppa ef ég væri hann.

Til hvers að velja segi ég? Af hverju ekki bara að gera vel við sig og berja bæði Davíð og Jón? Það væri til dæmis hægt að berja annan með hinum og gera alla glaða.

Að vísu myndu vopnuðu ríkislífverðirnir hans Dabba mögulega skemma þetta fína plan. Flott að nota síðustu krónurnar í ríkiskassanum í að tryggja að Davíð verði alveg örugglega með okkur til eilífðarnóns. Það er nefnilega einmitt það sem við þurfum mest núna. Líklega er bara til of mikils mælst að búast við betri forgangsröðun í ríkisfjármálum þegar við erum með fjármálaráðherra sem er menntaður í að hnefa kýr í og handfjatla sauðfé í stað hinsegin fés.

Svo er það Jónas Fr. Jónsson, hlandhausinn sem er yfir fjármálaeftirlitinu, og öllu bankakerfinu núna (væntanlega vegna stórkostlegs árangur í starfi seinustu ár). Árið 2006 bentu sérfræðingar á að "FME væri að mestu ómeðvitað um helstu áhættuþætti íslensku bankanna". Jónas kallaði þetta sleggjudóma. Í águst 2008 gaf hann bönkunum heilbrigðisvottorð og tveimur mánuðum seinna voru þeir allir á kúpunni. Pabbi hans, Jón Magnússon í Frjálslynda flokknum, ætti að gleðjast yfir árangri sonar síns núna þegar allt erlent vinnuafl í landinu er niðri í fjöru að smíða sér fleka. Er annars örugglega búið að umbuna Jónasi nóg eftir að allt bankakerfið hrundi á hans vakt? Er ekki hægt að stofna "Fjármálaeftirlit alheimsins" til að hæfileikar hans séu örugglega fullnýttir?

Allskyns gagnslaust hyski gjammar svo á kantinum og reynir að reynir að hagnast á eymdinni...

Guðni Ágústsson og Halldór Ásgrímsson halda að allir séu vangefnir kalkhausar nema þeir tveir þegar málum virðist einmitt þveröfugt háttað. Þeir blása sig nú upp af heilagri vandlætingu og blammera stjórnvöld fyrir að klúðra öllu, augljóslega búnir að steingleyma að þeir sátu sjálfir í ríkisstjórn í tólf af síðustu þrettán árum.

Biskupinn hringsólar yfir hræi allsnægtasamfélagsins sífrandi um kærleika, huggun og sáluhjálp á erfiðum tímum í þeirri von að engan rámi í að þjóðkirkjan kostar okkur FIMM MILLJARÐA á ári. En hvern munar svosem um fimm milljarða í miðri dómsdagskreppu þegar hægt er að fara í messu fyrir allan peninginn og hlusta á hálaunaðan ríkisstarfsmann í grímubúningi delera um allskyns drasl sem er ekki til.

Hans hágöfgi herra Ólafur Ragnar er svo á fullu spani um bæinn á tíu milljón króna bíl með einkabílstjóra í þeim tilgangi að angra vinnandi fólk í matartímanum með ómarkvissu froðusnakki um bjarta framtíð. Maður fólksins er skyndilega mættur aftur eftir nokkur kampavínslegin ár í útrás, öllu innihaldslausari en svínfeitt launaumslagið sitt.

Listinn af fólki sem þarf að reka, kæra, eða lumbra á er of langur til að það taki því að þylja hann upp. Það þarf klárlega byltingu til að rusla út öllum afdönkuðu sultuhundunum sem hafa keyrt allt í klessu hérna og halda svo að þeir hafi einhverja burði til að hirða upp eftir sig skítinn.

Ef einhver er að plana byltingu þá er bannað að skilja mig útundan. Látið mig endilega vita og ég mæti með öll mín bestu garðverkfæri. Það verður bara að passa að leka engu í staðlaða mótmælagengið því þá verða gasvæddar óeirðalöggur okkar síðasta áhyggjuefni. Albaníu Valdi og allir hinir viðbrunnu kommarnir mæta með gamla magnarann og reka alla heim á leið með Nallagauli löngu áður en múgæsingin kemst á almennilegt skrið.

Ísland brennur

2008-10-06T17:00:00.000Z

Neró spilaði að minnsta kosti á fiðlu! Geir röflar bara eins og aumingi.

Alþýðuhetja snýr aftur úr útlegð

2008-10-03T19:11:00.002Z

Betlarar éta það sem býðst

2008-09-30T19:21:00.001Z

Er mig að misminna eða seldi ríkið ekki fyrirtækið sem nú kallast Glitnir fyrir nokkrum árum? Margfaldaðist ekki virði fyrirtækisins og skapaði eigendum ofsagróða (til skamms tíma allavega)? Hvers vegna vill Jón Ásgeir þá meina að það sé einhver heilög skylda ríkisins að hlaupa undir bagga með bankanum þegar lánaboltinn springur mörgum árum seinna? Þegar maður kaupir eitthvað, þá ber fyrri eigandi ekki ábyrgð á eigninni þar eftir. Gróði eða tap sem hlýst af eigninni er á ábyrgð nýs eiganda. Ekki fer ég og garga á starfsmenn Bónus þegar bananinn sem ég keypti í síðasta mánuði byrjar að mygla í ísskápnum hjá mér og heimta pening til að endurfjármagna bananann. Af hverju á fólk að öfunda Jón Ásgeir af snekkjunum og einkaflugvélunum þegar vel gengur en vorkenna honum og borga hann út úr klípu þegar hann offjárfestir og hefur hægðir í eigin brækur?

Jón Ásgeir keypti í Glitni í von um gróða. Glitnir ætlaði að borga lán með láni en fékk ekki lán af því banki sem þeir kusu að treysta fyrir lífi sínu fór á hausinn. Glitnir bankaði upp á með betliskál hjá ríkinu, ríkið setti afarkosti...og afarkostirnir voru samþykktir. Hversu valkvæm þarf hugsun manna að vera til að fá það út að núverandi staða sé á ábyrgð einhverra annarra en stjórnar og eiganda Glitnis?

Hefði verið sanngjarnara að skattpeningarnir mínir hefðu verið notaðir í að bjarga trilljörðunum hans Jóns? Ætli Jón vorkenni mér vegna kjaraskerðingarinnar sem ég hef orðið fyrir meðal annars vegna áhættufjárfestinga hans og félaga hans? Ætli hann vorkenni mér nógu mikið til að láta Bónus taka á sig gengisfall íslensku krónunnar í stað þess að velta því óskiptu yfir á mig? Ég efast um það.

En hvað veit ég svosem um peningamál. Ég er enginn Lárus Welding.

Það versta við kreppuna er samt tvímælalaust að núna er uppskeruhátíð hjá öllum grautfúlu kommúnistunum sem halda að nú sé sannað að grautfúlir kommúnistar hafi rétt fyrir sér um allt af því þeir höfðu rétt fyrir sér um ofsafengið fjárfestingabrölt nýríku plebbanna. Það er misskilningur hjá grautfúlum kommúnistum. Allir hafa rétt fyrir sér um eitthvað. StebbiFr er til dæmis sammála mér um Glitnismálið.

Það næst versta við kreppuna er að flestir sem lesa þessa færslu munu ákveða að ég sé í einhverju liði. Af því að á Íslandi eru bara tvö lið. Baugsliðið og Sjálfstæðisliðið. Asnalega land.

Góði serðirinn

2008-09-28T18:55:00.002Z

Í fréttunum var einhver kona að væla yfir því að hún hefði keypt köttinn í sekknum. Eða klámmynd í Grease hulstri hjá Góða hirðinum nánar tiltekið. Fyrir þá sem hafa verið á tunglinu síðustu daga og því misst af dramastorminum, þá keypti þessi kona notaða vídeóspólu í kaótískri skranverslun, tók svarta ómerkta spóluna úr hulstrinu og henti henni óskoðaðri í tækið fyrir framan börnin sín og var svo alveg steinhissa og bálreið yfir að fá ekki akkúrat það sem hún borgaði 50 kall fyrir. Venjulega er ekki orðum eyðandi á svona heimsku en núna er ég búinn að vera að sjá væl um þessa hóflega verðlögðu klámmynd í fjölmiðlum í marga daga og mér er nóg boðið.

Hvað vill þessi kona eiginlega? Hver er tilgangurinn með því að ólmast í fjölmiðlum yfir þessum tittlingaskít í marga daga og troða sér loks í aðalfréttatíma stöðvar tvö með vælið? Heldur hún að ekkert merkilegra sé að gerast í heiminum? Vill hún fá fimmtíu kallinn sinn aftur? Á góði hirðirinn að splæsa í áfallahjálp fyrir börnin hennar af því þau sáu rassgatið á einhverjum pervert í nokkrar sekúndur í stað hökuskarðsins á John Travolta? Vill hún fá opinbera afsökunarbeiðni? Eða loforð um að starfsfólk Góða hirðisins horfi hér eftir persónulega á hverja einustu spólu af þeim hundruðum sem þeir selja vikulega svo að foreldrar þurfi örugglega ekki að taka neina ábyrgð á ruslinu sem þeir mata börnin sín á? Þá fyrst færi verðið á kláminu í Góða hirðinum að nálgast það sem gengur og gerist á hinum almenna markaði.

Ég myndi skilja þetta drama ef hún hefði keypt sér klámmynd í dónabúð á mörg þúsund krónur og fundið Grease í hulstrinu. Þá fyrst væri ástæða til að rjúka kveinandi í fjölmiðla!

Baráttan um arfinn er hafin

2008-09-09T08:33:00.001Z

Svarthol heimskunnar

2008-09-02T19:56:00.000Z

Á Barnalandi ríkir mikill ótti þessa dagana. Ótti við ragnarök!

Á stórskemmtilegum spjallþræði á Barnalandi er þingað um dýrustu og metnaðarfyllstu vísindatilraun sögunnar. Að vísu aðallega út frá miður skarpri og þunnri frétt um málið af Vísi.is. Í fréttinni er fjallað á afar stuttaralegan og villandi hátt um heimsendaótta nokkurra vitleysinga vegna ræsingar fyrirbæris sem ber nafnið "The Large Hadron Collider". Ekkert er minnst á mótrök þeirra sem að tilrauninni standa en þann hóp skipa meðal annars um 8000 eðlisfræðingar og þónokkur lönd. Ekkert er heldur minnst á að ríkjandi skoðun vísindaheimsins sé að tilraunin sé fyllilega örugg og að þeir sem mótmæla henni séu flón. Óttinn við hið óþekkta selur enda betur en langdregið röfl um vísindi sem enginn skilur hvort eð er.

Þinghaldið á Barnalandi hóf "Lúsifer" nokkur. Hún ber augljóslega meira traust til blaðamanna Vísis en vísindaheimsins því hún slær því föstu að við eigum nokkra daga eftir ólifaða. Hún kvíðir eðlilega dauðanum og finnst forvitnisfikt vísindanna ósanngjarnt í sinn garð og mannkyns.

Forviða barnlendingar vilja náttúrulega vita meira um yfirvofandi dauða sinn og umræðurnar fara því hratt og örugglega af stað. Ekki eru allir barnlendingar nógu duglegir að lesa sér til gagns á Vísi.is því spurningum um ástæður tortímingar okkar rignir inn. "Magzterinn" stekkur sem betur fer til og greinir lesendum frá því að til standi að kveikja á "hverfli" eftir nokkra daga og að talið sé að hann gæti myndað svarthol sem muni gleypa jörðina.

"Valkyrjan" bendir á að það væri alveg eftir mannkyninu að "eyðileggja heiminn sjálf" og Magzterinn tekur undir þessa greiningu Valkyrjunnar og bætir við að það væri nú "alveg típískt". Sjálfur hef ég ekki orðið var við að mannkynið hafi eytt sjálfu sér og jörðinni áður, en það má vel vera að ég hafi ekki verið að fylgjast með og að þetta sé mjög dæmigerð hegðun. Þær stöllur komast svo sameiginlega að þeirri skynsamlegu niðurstöðu að það eina sem sé hægt að gera í stöðunni sé að krossleggja fingur. Því ekki einu sinni svarthol bíta á krosslögðum fingrum.

"Bíba" kemur sterk til leiks:

"Úff, og ætla þeir bara að taka þann séns sí svona?
Hver er tilgangurinn með þessu? Veit það einhver? Hvað er það frábærasta sem gæti gerst í þessu "verkefni"?? :/"

"Séns sí sona" kallar hún Bíba það þegar átta þúsund eðlisfræðingar taka höndum saman, reikna eitthvað út í tuttugu og eitthvað ár og spandera hundruðum milljarða í rannsóknir. Gott og vel. Öll höfum við misjafna standarda. Skiljanlega vill Bíba fá útskýringar á áhættusækni fiktsjúku vísindamannanna og hvar er betra að fræðast um hvað færustu vísindamönnum heims gengur til en akkúrat á Barnalandi.

"Charmed" hefur því næst upp raustina og greinir veröldinni frá sinni vel ígrunduðu og upplýstu skoðun á tilrauninni. Henni finnst "fáránlegt að ætla að kveikja á þessum hverfli og vita í rauninni ekkert hvaða afleiðingar það hefur". Eins og Lúsifer finnst henni súrt að kyngja því að hennar stórbrotna tilvera gæti að engu orðið vegna ónauðsynlegrar tilraunar (sem að vísu gæti útskýrt tilurð alheimsins og ollið byltingu í skilningi mannkyns á náttúrulögmálunum). Ég verð að taka undir með Charmed hérna. Hvað höfum við með þekkingu, framfarir og ævintýri að gera þegar við höfum Charmed!

"Tuborg" sýnir af sér kurteisi sem aðrir barnlendingar mættu vel taka til fyrirmyndar og biðst afsökunar á heimsku sinni áður en hún spyr viðstadda hvað "Hvirfill" (sic) sé. Með þeim orðum lýkur þáttöku Tuborg að mestu, án mikilla áhrifa á umræðuna til eða frá.

Charmed viðurkennir á þessum tímapunkti í umræðunni að hún "skilji ekki tilganginn með þessarri rannsókn". Þessi yfirlýsing Charmed kemur eins og þruma úr heiðskíru lofti þar sem Barnlendingar höfðu fram að þessu stólað verulega á hennar innsæi inn í heim framsækinnar eðlisfræði.

Valkyrjunni finnst kaldhæðnislegt að leit að svörum við uppruna heimsins muni mögulega verða sama heimi að aldurtila. Magzterinn tekur undir þessa athugasemd og finnst skrýtið að þetta sé leyft þegar margir vísindamenn telji þetta ógna öryggi manna eða jafnvel mannkyns alls. Undir þetta tekur "Honey Bee".

Honey Bee varpar svo nýjum vinkli á umræðuna og veltir upp spurningunni um "hvernig geti orðið til bara allt í einu svarthol og allt horfið eins og smellt sé fingri".

Magzterinn svarar með link á grein um svarthol á vísindavefnum. Væntanlega skrifuð af traustverðari vísindamönnum en þessum siðblindu galgopum sem halda til inni í einhverju fjalli í Sviss.

"Líla" hughreystir Honey Bee með því að benda á að líkast til væru "moggin og fréttabalið"(sic) búin að skrifa um þetta "ef eitthvað vit væri í þessu". Reyndar hafa allir fjölmiðlar fjallað nokkuð ítarlega um þessa tilraun nú þegar en líkast til lesa barnlendingar ekki margar fréttir um flóknar eðlisfræðitilraunir nema orðinu "ragnarök" sé skellt í fyrirsögnina.

Honey Bee veltir svo reyndar upp áhugaverðri spurningu sem vill svo til að ég get svarað fyrir hana. Hún spyr "hvar allir miðlarnir séu?". Svarið við þeirri spurningu er einfalt. Þeir eru uppteknir við að ræða við hana Sigríði/Guðrúnu, látna ömmu þína - frænku - eða ekki frænku, um draslið í geymslunni þinni, fyrir 5000 kall á tímann.

Þinghaldið fer skyndilega að snúast um hver gefi eiginlega leyfi fyrir óábyrgum fíflagangi eins og þessarri tilraun. "Twighz" sótbölvar "nördunum" sem standa fyrir þessu og lýsir því yfir að andstætt þeim gæti henni ekki verið meira sama um hvernig heimurinn varð til. Charmed leiðir að því líkum að nördarnir sjálfir samþykki þetta og að hér sé komið að einhvers konar "hefnd nördanna". Þið vitið...eins og í bíómyndinni þarna. Líla spyr hvort það eigi að leyfa þeim að gera þetta og spyr líka "af hverju ættu einhverjir vísindamenn að vera að hógna (sic) heiminum". Hún bara skilur það ekki. Sem er skrýtið því að hún virkar á mig eins og manneskja sem skilur flest annað.

"Asco" gengur til pontu og krefst svara:

"hver samþykkir svona og borgar 600 milljarða til að búa til tæki sem (okkur hérna virðist) allavega vera tilgangslaust og gæti "í versta falli" eytt heiminum.

Garg !"

Góð spurning! Hver samþykkir 600 milljarða vísindatilraun sem BARNLENDINGUM finnst vera tilgangslaus???! Kjarnorkurannsóknasamtök Evrópu og þau tuttugu lönd sem eiga aðild að samtökunum hefðu átt að kanna jarðveginn AAAÐEINS betur áður en peningunum var ausið í verkefni sem nýtur svona lítils fylgis á spjallvef fyrir mæður með of mikinn frítíma. Það er ekki nóg með að þetta vísindahyski viti ekkert um vísindi...þetta kann ekkert með peninga að fara heldur!

"Tipzy" leggur kalt mat á dæmið og bregður upp samanburði við annað vísindaverkefni:

"Finnst þetta bara ein versta hugmynd mannkynsins síðan atom sprengjan var fundin upp."

Japanir væru örugglega sammála Tipzy. Hún ætti að skreppa þangað og segja þeim af hverju öreindahraðall sem er byggður til að svara spurningum og auka framfarir í vísindum er verri en risastór sprengja sem var hönnuð í þeim tilgangi einum að flambera forfeður þeirra. Það yrðu örugglega lærdómsríkar samræður fyrir alla viðstadda.

"Addags" sem virðist vera örlagatrúar róar mannskapinn og bendir á að við ráðum ekki eigin örlögum. Að hvert okkar geti dáið hvenær sem er af völdum bíla og hárblásara.

"Við vitum aldrei hvenær okkar dagur kemur, kannski dey ég á morgun í bilslysi á Kringlumýrarbraut. Eða kannski eftir tvo daga dettur blásarinn minn ofan í baðkerið meðan ég ligg í því. Eða eða eða..."

Ef þú lest þetta á næstu tveimur dögum Addags....hættu að blása á þér hárið í baði! Ef þú lest þetta ekki á næstu tveimur dögum....þá skal ég íhuga þetta með örlögin. Díll?

Charmed tekur undir örlagaþvaðrið en lýsir enn og aftur frati á þetta "asnalega og tilgangslausa verkefni". "Eini tilgangur þess að að fróa fróðleiksfíkn örfára hræðna sem eru að fara yfir um af hugsunum "hvað er alheimurinn og bla bla" "- Segir Charmed skjálfandi af bræði yfir því að ekki séu allir jafn hógværir í þekkingarleit sinni og hún sjálf.

Lúsifer sem hóf umræðuna mætir því næst aftur á svæðið, nú orðin örvingluð af ótta:

"en ef það er hægt að komast hjá því!!! ég vil ekkert deyja!! ég er ekki tilbúin í að deyja!! hver er með mér í að fara uppí flugvél og fara þangað og stoppa þetta madness!!!"

Það eina sem stendur á milli Lúsifer og endaloka 600 milljarða fjölþjóðlegs verkefnis virðist vera ein flugferð. Ætli meiri líkur séu á að Lúsifer hverfi inn í manngert svarthol þann 10. september eða farist í flugvél á leiðinni til Sviss? Ég er enginn tölfræðingur en ég myndi mæla með að leyfa vísindunum að hafa sinn gang.

Umræðurnar leysast svo upp í gerð áætlana fyrir síðustu daga tilverunnar. Nammiát og vísakortaþjark virðist ofarlega á lista Barnlendinga yfir hluti sem þær vilja áorka áður en þær deyja.

Barnlendingar eru reyndar ekki einir um að óttast vísindin. Ekki ómerkari menn en Magnús Þór Hafsteinsson fyrrverandi þingmaður er t.d. sammála þeim um að Guði einum sé ætla að vita eitthvað um heiminn.

Reyndar hefur þessi manngerð alltaf verið til. Takmörkuð í getu sinni til að hugsa út fyrir hellinn og heiftúðug út í þá sem það geta. Fólk sem vill grilla nornir á flatri jörð. Það skondna er að nú til dags lýsir þetta fólk frati á vísindin með aðstoð rafmagns, tölvu og internets.

Að fá Stein inn um gluggann

2008-08-31T22:09:00.000Z

Síðasta sumar var brotist inn hjá mér á meðan ég var í útilegu eins og glöggir lesendur muna kannski. Þjófurinn hafði rifið upp stormjárn á glugga, klöngrast inn, haldið á brott með þrjár áfengisflöskur og skilið allt eftir opið upp á gátt.

Lögreglan sendi tæknimann á staðinn sem dustaði eftir fingraförum með prýðilegum árangri. Þegar fingrafari sem fannst á innanverðum gluggakarminum var flett upp í gagnagrunni lögreglunnar dúkkaði upp góðkunninginn Steinn. Steinn þessi hefur áður gert garðinn frægan meðal annars fyrir að aka um miðbæinn í lyfjamóki og sofna loks værum svefni undir stýri á Hverfisgötunni.

Fingrafarseigandinn var boðaður í yfirheyrslu og kæra lögð fram í framhaldinu. Lögreglan spurði hvort ég vildi leggja fram fjárkröfu vegna tjónsins sem ég varð fyrir meðfram innbrotskærunni og að sjálfsögðu gerði ég það. Fjárkrafan sem var afar hógvær, hljóðaði upp á 14.500 krónur vegna stuldar á þremur mistómum áfengisflöskum og skemmdum á gluggajárni. Verandi annálaður öðlingur ákvað ég að rukka ekki fyrir verkjatöflurnar tvær sem hurfu úr lyfjaglasi í skápnum hjá mér.

Tæpu ári eftir innbrotið var mér svo loks tilkynnt að málið sé á leið fyrir dóm. Ég var orðinn spenntur að sjá hvað kæmi út úr þessu öllu saman enda aldrei kært neinn fyrir glæp áður.
Dagarnir liðu hægt en loks datt bréf frá embætti lögreglustjóra inn um lúguna. Í bréfinu stóð að málið hafi verið fellt niður sökum þess "hversu ólíklegt það þótti til sakfellingar". Mér þóttu þetta afar skrýtnar fréttir þar sem fingraför eru líklega frægasta sönnunargagn í heimi og þar sem ég stóð fastlega í þeirri trú að glæpalýður væri í djúpum skít ef fingraför þeirra prýddu vettvang glæps.

Í bréfinu var ekkert útskýrt nánar í hverju ólíkindin fælust, en tekið var fram að ég hefði rétt á að óska sérstaklega eftir því að fá að sjá rökstuðninginn fyrir niðurfellingunni ef ég hefði áhuga. Mér fannst pínu bjánalegt að rökstuðningurinn fylgdi ekki bara með í sama bréfi svona fyrst að ég mátti alveg sjá hann hvort eð er. Ég tók mig að sjálfsögðu til, sendi tölvupóst á embætti lögreglustjóra og bað um rökstuðninginn sem síðan barst í gamaldags pósti nokkrum dögum síðar.

Ég beið spenntur eftir enn einu bréfinu og bjó mig undir að heyra af djúsí smáatriðum úr rannsókn málsins sem myndu varpa nýju ljósi á það sem gerst hafði. Ég bjóst jafnvel alveg eins við því að skilja ástæður lögreglustjóra fyrir niðurfellingunni eftir lesturinn. Í bréfinu hlyti að vera eitthvað sem gæti útskýrt af hverju fingrafar manns sem ég hef aldrei boðið í heimsókn var innan á glugganum sem brotist var inn um! Kannski hafði Steinn unnið í gluggaverksmiðju áður en hann varð lyfjakokteilum að bráð? Kannski hafði einhver fundið Stein í lyfjamóki og ákveðið að "freima" hann með því að draga hann hálfan inn um gluggann hjá mér og planta þar fingrafari!

Mér til mikilla vonbrigða voru ástæður niðurfellingarinnar alls ekki eins spennandi og ég hafði vonað og síður en svo gáfulegar. Steinn hafði sagt löggunni að hann vissi ekkert hvar hann hefði verið þessa helgi eða hvað hann hefði verið að gera. Ástæða minnisleysisins var að eigin sögn óhófleg neysla á allskyns eiturlyfjum. Fyrst Steinn vissi ekki hvar hann hafði verið þótti lögreglustjóra engin ástæða til að gefa sér neitt í þeim efnum eða kafa dýpra í málin. Honum þótti ekki einu sinni ástæða til að láta reyna á fingrafarið fyrir dómi gegn algerum skorti á fjarvistarsönnun Steins. Engin flétta, engin djúsí smáatriði. Ekki neitt.

Dæmdur afbrotamaður skilur eftir fingrafar á vettvangi glæps og hans eina málsvörn er að hann hafi ekki hugmynd hvað hann var að gera á þeim tíma sem glæpurinn var framinn vegna þess að hann var búinn að graðka í sig svo miklu magni af ólöglegum eiturlyfjum? Ég efast um að Matlock hefði misst þvag yfir þessarri málsvörn en Lögreglustjóra fannst hún augljóslega ekki árennileg. Minnisleysið var því verðlaunað með skilyrðislausri niðurfellingu málarekstursins.

Persónulega finnst mér ekkert að því að gera ráð fyrir því að Steinn hafi verið sá sem klöngraðist inn um gluggann hjá mér og stal frá mér, svona fyrst fingrafarið hans fannst inni á gafli hjá mér og hann sjálfur hafði engar betri uppástungur um staðsetningu sína. En þar sem ég er hvorki dómari eða lögreglustjóri hef ég kannski ekki nægilega sérþekkingu á þeim margslungnu ástæðum sem lyfjaunnendur hafa fyrir að teygja langa fingurna inn um glugga samborgara sinna.

Ofurhundur og kanamella

2008-08-25T17:54:00.002Z

Oft eru það litlu hlutirnir í lífinu sem færa manni mestu gleðina.

Myndbönd mánaðarins er gæðarit

Heppilegasti fonturinn?

Handbolti

2008-08-22T20:47:00.004Z

Það eina sem væri skemmtilegra en að vinna gull á morgun væri ef Ólafur fyrirliði myndi labba upp að franska fyrirliðanum fyrir leikinn og gefa honum dollu af silfurpússi. Það væri fokking töff.

Leikurinn var æði, en svo ég missi mig ekki í jákvæðni þá var margt sem fór í taugarnar á mér líka. Til dæmis glöðu börnin sem rætt var við eftir leikinn og þeirra hamingja. Börn í dag hafa það of gott. Þau eru ekki fyrr komin úr móðurkviði en íslenska landsliðið er farið að rústa ólympíuleikum eins og ekkert sé sjálfsagðara! Sjálfur hef ég þurft að bíða eftir þessu í áratugi og megnið af minni barnæsku fór í að horfa á Staffan Olson maukrústa landsliðinu trekk í trekk. Stærsti sigurinn sem ég fékk að upplifa sem barn var þegar landsliðið vann eitthvað skítugt "B heimsmeistaramót"...hvað sem það nú var. Á mínum uppvaxtarárum hefði það verið skref upp á við ef strákarnir hefðu komist á pall á ólympíuleikum fatlaðra.

Svo skildi ég ekki alveg af hverju var verið að taka viðtal við konuna hans Kristjáns Arasonar í hálfleik en ekki hann sjálfan. Þetta var samt ekki alslæmt því það var gaman að sjá starfsmenn menntamálaráðuneytisins skítölvaða, þambandi kampavín í beinni útsendingu. Það er ekkert slor að vinna fyrir hið opinbera greinilega. Dagdrykkja og dólgslæti á kostnað skattgreiðenda.

Það fyndnasta var samt þegar konan hans Kristjáns Ara mætti í Kastljósið og sagði að Ólafur Stefáns væri okkar besti handboltamaður fyrr og síðar! Kann einhver að stafa "Skilnaður"?? (fyrir utan mig augljóslega).

Svo náði Dorrit næstum að skemma fyrir mér leikinn! Ég var í þvílíku stuði eftir rústið þangað til Frú athyglissjúk stal athyglinni af landsliðinu og fór að góla þvælu í myndavélina. Dorrit fer nefnilega mikið í taugarnar á mér þó flestir virðist falla fyrir alþýðlegum skrípalátunum. Alltaf þegar myndavél er til staðar mætir Dorrit og gerir eitthvað flippað til að vinna hylli landsmanna því hún veit að allir taka hressa flippara fram yfir milljarðamæringa sem lifa glamúrlífi á kostnað almennings.

Einu sinni klifraði Dorrit í grjóti og hrópaði..."ÚÚLAFÚR! ÚÚLAFÚR!". Einu sinni var hún í opinberri heimsókn í krummaskuð og reyndi að stinga einhverjum börnum undir kápuna sína. Einu sinni reyndi hún svo meira að segja að ræna sjálfri myndavélinni af myndatökumanninum! Stelsýki eða bráðhressandi flipp? Dæmi hver fyrir sig.

Af hverju falla allir fyrir þessu leikriti? Meira að segja Ólafi forseta finnst hún vera steik. Ég sé það á svipnum á honum...eins og í gær þegar hann var að moka henni frá myndavélinni, vandræðalegur á svip...

Ég mæli með að við leyfum Dorrit að spila í vörninni á morgun. Leikurinn yrði jafnari fyrir Frakka og þar af leiðandi meira spennandi, auk þess sem Dorrit fengi alla þá athygli sem hún þráir...í mjög skamma stund að vísu. Stóraukinn sparnaður ríkissjóðs næstu fjögur árin væri svo bara bónus.

Win-Win!

Áfram Ísland!

Grænjaxlabræði

2008-08-20T22:28:00.003Z

Ung vinstri græn eru ennþá með mig á póstlistanum sínum. Í dag barst mér reiðilegt bréf frá þeim:

Gleymdist að segja þessum krökkum að ungt fólk eigi frekar að verja tímanum í landafyllerí á Fredda í stað þess að vera að æsa sig yfir því hvaða andlausi sérhagsmunapotari sitji aðgerðalaus í borgarstjórastólnum á hverjum tíma?

Þótti "helvítis framsóknarflokkurinn" annars ekki hin besta hækja fyrir ekki svo löngu síðan? Súr eru berin. Ekki síst þessi grænu.

Ársuppgjör

2008-08-10T16:45:00.002Z

Hreinlæti

2008-07-22T21:57:00.003Z

Ef loftslagið í Kenía er nógu svalt til að aftra Ramses frá að þrífa sig, hvað yrði þá um vesalings manninn á Íslandi?

Kannski er þetta allt fyrir bestu.

Hasar í háloftunum

2008-07-13T13:56:00.004Z

Nýlega átti ég leið til útlanda og eins og svo oft áður varð ég þeirrar gæfu aðnjótandi að fljúga með Iceland Air. Fluginu út seinkaði ansi hressilega svo í stað þess að leggja af stað um eftirmiðdaginn var ekki lagt í hann fyrr en um miðnætti. Ég og mitt samferðafólk vissum af seinkunni fyrir fram svo að við þurftum sem betur fer ekki að hanga á flugvellinum í tíu klukkutíma eins og ungu mennirnir tveir sem sátu hinu megin við ganginn í vélinni. Engu að síður sótti að mér mikil þreyta um það leyti sem við héldum til vélar enda komið fram yfir reglubundinn háttatíma vinnandi fólks.

Áætlaður flugtími var ekki nema rúmir tveir tímar en ég hafði ákveðið að nýta tímann vel til svefns þar sem seinkunin yrði augljósalega til þess að seinni hluti nætur yrði að mestu varið í þvæling með þungar ferðatöskur og skrykkjótt samskipti við ofsóknarbrjálaða flugvallarstarfsmenn í terroristaleit.

Ég kom mér því óþægilega fyrir í sætinu við undirleik lyftutónlistar og bjó mig undir sálardrepandi forleikinn sem fylgir hverri flugferð. Í gegnum illa stillt og hávært kallkerfi vélarinnar þuldi flugfreyja með frekjulega hvella rödd upp öryggisleiðbeiningarnar sem eiga að bjarga okkur öllum ef flugvélin steypist í hafið úr 40.000 feta hæð. Ég beið óþreyjufullur eftir að upplestrinum lyki enda kann ég þessar lífsnauðsynlegu leiðbeiningar svo vel utanbókar núorðið að ég hlýt að verða nánast ódrepandi um leið og ég stíg um borð í flugvél.

Eftir skerandi upplestur á tveimur tungumálum og stuttaralega afsökun á töfinni skall loks þverrifa upplesarans aftur, og á sama augnabliki skullu augnlokin á mér í lás. Ég leið inn í draumalandið þar sem mig dreymdi fjarlægar lendur og ævintýr. Mig dreymdi frið á jörð, bjarta framtíð og bræðralag manna....og einhver ógurleg öskur og óróa sem ég áttaði mig illa á. Svo vaknaði ég með andfælum.

- "GÓÐIR FARÞEGAR, VIÐ MUNUM NÚ SELJA VARNING ÚR SAGA BOUTIQUE!" gól kallkerfið hvellri röddu. Það tók mig augnablik að átta mig á hvar ég var staddur en napur raunveruleikinn var ekki lengi að síast inn. Ég var í Flugleiðavél um miðja nótt með stírurnar í augunum og slefuna í munnvikunum, umkringdur háværum atvinnuflugdólgum staðráðnum í að selja mér sólgleraugu, jólaskraut, ferðaútvörp og geisladiska með Garðari Korters hvað sem það kostaði!

- "SAGA BOUTIQUE!? SAGA BOUTIQUE!? SAGA BOUTIQUE!?" hvein í flugfrenjunum sem stormuðu upp og niður gangana í kapítalískum tryllingi, veifandi bæklingum í allar áttir með svo miklum ákafa að ég bjóst við súrefnisgrímu niður úr loftinu á hverri stundu.

- "VANTAR ÞÉR (sic) BÆKLING!?" spurði ein og hallaði sér yfir mig. - "Nei takk. Það er einn slíkur í vasanum fyrir framan sætið mitt eins og fyrir framan öll hin sætin í vélinni reyndar." sagði ég of fannst ég vera nokkuð sniðugur, sérstaklega miðað við að vera nývaknaður. Flugfrenjunni fannst ég hinsvegar ekkert sniðugur og þeysti áfram niður eftir vélinni veifandi bæklingum framan í aðra nývakta næturferðalanga áður en ég kom meiru að. Þar með missti hún af betri brandaranum mínum sem gekk út á að spyrja hvort hún gæti selt mér eyrnatappa og tímavél.

Meiri svefn reyndist ekki mögulegur í ferðinni því enn átti eftir að servera hálf þiðna brauðbollu og hlusta á flugstjórann segja okkur veðurfréttir frá áfangastað og að flugvélin væri ofsalega hátt uppi í loftinu.

Sá eini sem svaf um borð

Á heimleið var ég svo aftur vakinn með gargi úr kallkerfi vélarinnar. Í þetta skiptið snerist gargið um hvað Flugleiðum væri annt um mig sem manneskju og hvort ég vildi vinsamlegast fylla út einhverja könnun um gæði þjónustunnar og um allt sem betur mætti fara. Ég tók það glaður að mér og hripaði niður eitthvað á þessa leið:

"Ekki vekja mig til að reyna að selja mér drasl eða til að láta mig fylla út kannanir. Takk."

Hvort Flugleiðum hafi tekist að rétta af hallareksturinn í þessarri ferð með vasklegri sölu á glingri til þreyttra og pirraðra viðskiptavina skal ósagt látið. Þó myndi maður ætla að það væri lélegur bissnes í það heila að draga dagflug fram á nótt og halda síðan allri vélinni vakandi með gargi og óhefluðu prangi sem ætti varla við í kolaportinu. En hvað veit ég svosem um rekstur Flugfélaga. Ég er enginn Hannes Smárason.

Hringsnúningur Stefáns

2008-06-01T15:26:00.006Z

Eftir að ég benti lesendum á óvæntan og skemmtilegan viðsnúning Stefáns Stefánssonar bloggara í gærkvöldi, stökk Stefán til og breytti færslunni sem ég vísaði í. Svo heppilega vill til að ég tók skjáskot af færslunni eins og hún var áður en hún var klædd í nýjan búning og samræmd fyrra röfli Stefáns um bílslysamyndbirtingar.

Fyrir

Eftir

Og að lokum er hér nýjasta myndin af Stefáni Stefánssyni sem hringsnýst í afstöðu sinni til bílslysamyndbirtinga...

Stingandi tvískinnungur að norðan

2008-05-31T22:02:00.006Z

Stefán Stefánsson bloggari hefur ósjaldan bloggað af krafti gegn myndbirtingum fjölmiðla af vettvangi slysa eins og sjá má hér.

Það er því óneitanlega sláandi að sjá hvernig Stefán vísar beint í youtube myndband af vettvangi alvarlegs slyss í nýlegri færslu og gengur meira að segja svo langt að dásama nútímatæknina sem gerir fólki kleift að fá ófögnuðinn beint í æð. Stefán segir hreint út að myndir bæti miklu við frásagnir af slysum og skili meiru en orðin einsömul.

Þessi viðsnúningur er óneitanlega umhugsunarefni.

Einfalt mál.

Myndbirting af viðsnúningi Stefáns

Fyrir - Eftir

Skáldlegt réttlæti

2008-04-18T15:08:00.006Z

Þessi frétt á DV.is kallaði fram stærðar bros á annars steinrunnu andliti mínu. Vaskir borgarstarfsmenn í átaki gegn veggjakrotsplágunni í miðbænum máluðu víst yfir einhver skíta listaverk sem eigendur búðarinnar Nakta apans höfðu fengið "götulistamenn" til að mála á veggina sína.

Af hverju gleðst ég svo ótæpilega vegna yfirgangs borgarinnar? Ástæðan er sú að verslunin Nakti apinn selur einmitt spreybrúsana sem veggjakrotshyskið notar til að sóða út annað hvert hús í miðbænum. Stelpunni í Nakta apanum sem kom grenjandi í fjölmiðla yfir þessum yfirgangi finnst allt í lagi að líta í hina áttina og hagnast á skemmdarverkunum dags daglega, en sárnar þegar hennar eigin veggir fá ekki að vera í friði. Vesalings litli hræsnarinn ;´(

Af heimasíðu Nakta apans

Vælið í eiganda Nakta apans fæddi hjá mér þá stórskemmtilegu hugmynd að mæta með stóra dós af Flugger málningu og endurtaka leikinn um leið og götulistamennirnir eru búnir að skreyta veggina aftur. Mér finnst nefnilega ekkert fallegra en skjannahvítir veggir og það er minn listræni réttur að tjá mig hvar sem mér sýnist eins og hundur í spreng. Allavega samkvæmt heimsku veggjakroturunum sem konan í Nakta apanum græðir á. Besta lækningin við stjórnlausri hræsni er stór skammtur af gljáandi hvítri Flugger.

Kúkur og piss

2008-04-13T20:21:00.002Z

Sturla Jónsson vörubílstjóri þráir það heitast að kúka og pissa á kostnað skattborgara í skjóli nætur ef marka má yfirlýsingar síðustu daga. Núna vill hann láta þéttraða ríkisreknum kömrum meðfram þjóðvegum landsins svo trukkabílstjórar geti losað sig við pylsurnar og sómasamlokurnar að næturlagi án þess að krjúpa rymjandi úti í vegakanti. Ef ríkið skaffar ekki skíthús fyrir Sturlu og félaga ætla þeir að stoppa alla umferð inn og út úr borginni í allt að sólarhring. Þá skulum við vona að þeir muni eftir að fara á klósettið fyrst.

Almenningur er smátt og smátt að átta sig á því að frekjukast vörubílstjóra og ofbeldi gagnvart vegfarendum á ekki nokkurn rétt á sér. Olíugjaldið dugir ekki fyrir vegagerð í landinu og bensínverð ætti með réttu að vera mun hærra en það er. Hvíldarlögin sem bílstjórar hafa grenjað hvað mest undan eru fullkomlega eðlileg eins og komið hefur fram. Það var ljóst frá upphafi að langflestir sem studdu þetta rugl í bílstjórunum gerðu það bara af því að "loksins var eittkver að gera einhvað" eins og heyrðist ósjaldan sagt á Barnalandi. Um leið og staðreyndirnar fóru að detta í hús þagnaði klappliðið. Staðreyndir virðast þó ekki eiga jafn greiða leið í gegnum þykkar höfuðkúpur bílstjóranna því þeir sveifla sér af einu hálmstráinu yfir á annað í stað þess að sjá að sér og skammast sín fyrir frekjuna og leiðindin.

Sturla Jónsson fór af stað í þennan leiðangur í miklum frjálshyggjuham. Helvítis ríkið skyldi stoppað í að klína á hann sköttum og andskotans ríkisstjórnin skyldi pínd til að "gera eitthvað". Menn yrðu sko að fá að vinna heiðarlega fyrir sér án þess að verið væri að gera þeim erfitt fyrir! Frjálshyggjan er hinsvegar á bak og burt þegar hér er komið við sögu og við er tekinn einhverskonar klósettkommúnismi.

Það varð frægt þegar Sturla var spurður út í allskyns staðreyndir málsins í viðtali í sjónvarpinu og svaraði því til að hann hefði "ekki sest niður og kynnt sér þetta". Ég legg til að hann drífi endilega í því áður en lengra er haldið. Hann gæti meira að segja notað tímann og kúkað á meðan.

p.s. Vinstri grænir svöruðu og vilja meina að ég sé ekki einn á póstlistanum. Ætli maður verði ekki að mæta á ljóðakvöld í Sandgerði til að sjá hver hinn er.

Hippakæfa

2008-04-10T22:08:00.002Z

Undanfarið hefur mér borist talsverður kæfupóstur frá vinstri. Vinstri grænum nánar tiltekið. Þau hljóta að halda að ég sé rýr ljóðaunnandi því þau senda mér boðskort á allskyns vakningasamkomur oft í viku. Ég mætti ekki á kaffihúsaspjallið á Akureyri, ég mætti ekki á fundinn sem átti að dýpka umræðuna um Tíbet og ég mætti ekki í stjórnmálaskólann í Kópavoginum. Samt ákváðu þau að bjóða mér að mæta á stofnfund Vinstri grænna í Reykjanesbæ sem stendur til að halda á neðri hæðinni á einhverju sem heitir "Paddy's".

Ég svaraði þeim til að láta vita að ég kæmist ekki því ég vil ómögulega að þau fari að hafa fyrir mér.

"Takk fyrir að láta mig vita hvenær stofnfundur Vinstri grænna á Reykjanesi er. Ég var einmitt að pæla í því hvar og hvenær hann væri haldinn af því mig langar svo rosalega á hann þó ég búi í miðbæ reykjavíkur og sé ekki einu sinni í vinstri grænum.

Hvernig komst ég annars á þennan póstlista? Er ég einn á honum?"

Ætli Tíbet reddi sér án mín?

Charlton Heston er dáinn!

2008-04-06T10:07:00.003Z

...sem er svosem ekki mikil frétt í sjálfu sér miðað við að kallinn var kasúldinn af elli. Það sem er merkilegra er að ég er á undan Stebba að skrifa um þetta! Það er ótrúlegt kikkið sem fylgir því að hafa betur en sá besti í einhverju!

En fyrst Stebbi er ekki búinn að þýða wikipedia greinina um Hestinn ennþá ætla ég að grípa niður í hana og reyna að giska á hvar penna Stefáns muni bera niður.

Mín spá er að eftirfarandi atriði komi fram:

*Hann fæddist 4. október 1924 í Evanston í Illinois*
*Hét fullu nafni John Charles Carter en tók sér leikaranafnið Charlton Heston*
*Hann var 83 ára þegar hann dó*
*Vakti mesta athygli í stórmyndum á borð við "Boðorðin tíu, Apaplánetan og Ben Hur*
*Hann var ávallt virkur í pólitískum baráttumálum, var virkur í mannréttindabaráttunni og talaði gegn kynþáttahatri*
*Á efri árum gengdi hann formennsku í NRA, félagi byssueigenda í bandaríkjunum*
*Fékk umdeilda meðferð frá kvikmyndagerðarmanninum Micheal Moore í Bowling for Columbine*
*Þjáðist af Alzheimer og krabbameini og dró sig út úr sviðsljósinu síðustu ár ævinnar*
*Var giftur konu sinni Lydiu í 64 ár*

Salatið verður að sjálfsögðu mun matarmeira í meðförum meistarakokksins að norðan svo ég er ekki að skemma eftirvæntinguna fyrir neinum vona ég.

Reykjavík,
6. apríl 2008 kl 10:30

Vörubílstjórar

2008-04-01T20:23:00.000Z

Á leið heim úr vinnu í dag neyddist ég til að ganga í gegnum bílalest vörubílstjóra sem mótmæla þessa dagana þverrandi magni olíu í jörðu með tilheyrandi flauti, frekju og yfirgangi. Ég sýndi einum þeirra miðjufingurinn á leið minni yfir gangbraut og uppskar ekkert í bíttum nema sljótt augnaráð enda ólíklegt að opinmynntur hlunkurinn kunni að telja svona hátt.

Vörubílstjórar halda að þverrandi olíubirgðir jarðar og hækkandi heimsmarkaðsverð olíu sé ríkisstjórninni og olíufélögunum að kenna. Þeir átta sig ekki á því að hluti ríkisins af olíuverði fer í að byggja vegi og að ef þetta gjald verður lækkað verður peningurinn bara tekinn annars staðar frá og fólk sem ekki keyrir stóra bíla þarf að bera stærri hluta byrðarinnar en í dag. Vörubílstjórar gera líka þau mistök að halda að einhverjum sé ekki drullusama um einhver hvíldarlög sem þeim er gert að sæta og sem þeim væri nær að ræða í einrúmi á einhverjum verkalýðsfundi.

Vörubílstjórar teppa göturnar í hugsunarlausu frekjukasti eins og sælgætissjúkur krakki sem liggur gólandi á gólfi stórmarkaðar og teppir för eðlilegs fólks. Rétt eins og maður myndi sparka krakkanum kæruleysislega til hliðar ætlast ég til þess að lögreglan láti kylfur og stígvél tala og að olíuspúandi vörubílunum verði rutt af vegum með jarðýtum. Öðruvísi læra treggáfaðir bílstjórarnir aldrei neitt.

Félag gegn pólverjum

2008-02-13T11:42:00.008Z

Það hefur varla farið framhjá neinum að nýlega var stofnað félag gegn pólverjum á netinu sem ört fylltist af reiðum ljósabrúnum unglingum. Mér til mikillar undrunar uppgötvaði ég að forsprakki og stofnandi félagsins er enginn annar en "Danni Súkkó" úr hljómsveitinni "Busta Bitches" sem ég gerði einmitt góð skil hér um árið. Danni er augljóslega orðinn leiður á að horfa upp á pólska rappara stela frá sér vinnunni og hefur snúið vörn í sókn.

Það kom mér þó óneitanlega á óvart að heyra að Danni vinur minn væri í forsvari fyrir félag sem berst gegn útlendingum á Íslandi. Ekki síst vegna þess að Danni á sjálfur að baki líflegan feril sem nýbúi og glæpamaður í erlendu landi eins og lesa má milli línanna í laginu hans, "I'm a hustla":

"L.A.P.D. chasing me/
Acting like they can arrest a B'/
i´ma gangster somthing like that/
Don´t go around not bringing a gat/

Síst vil ég þó saka Danna um tvískinnung í þessum efnum enda veit ég að hann er útvörður og kyndilberi alls þess sem íslenskt er, þrátt fyrir að hann hafi um hríð gert lögreglunni í Los Angeles lífið leitt með glæpsamlegu líferni sínu.

Félagið gegn pólverjum er hinsvegar úr sögunni að nafninu til. Svo virðist sem baráttumóður unglinganna hafi dvínað hratt eftir að félagið fékk auglýsingu í fjölmiðlum, og flestir meðlimirnir fengu vel útilátinn kinnhest frá foreldrum sínum. Danni er búinn að breyta nafninu á félaginu í "félag kristintrúa" og þurrka út allar fyrri umræður ungmennanna um hvað pólverjar séu hroðalegt fólk. Mér brá þegar ég sá þessa breytingu og viðurkenni fúslega að ég hef áhyggjur af Danna sem virðist vera á hraðferð til glötunar. Hann byrjaði að fikta í útlendingahatri fyrir helgi og núna aðeins örfáum dögum síðar hefur fiktið leitt hann út í kristni. Með þessu áframhaldi verður hann búinn að skrá sig í Framsóknarflokkinn fyrir mánaðarmót og kominn á samning hjá Einari Bárðar fyrir árslok! Ég vona að foreldrar Danna grípi inn í þetta sjálfseyðingarferli og ljái honum eyrnafíkju allra tíma! Ekkert minna dugar á ögurstundu. Til að auka líkurnar á téðri eyrnafíkju læt ég fylgja þessa mynd af glaseygðum Danna með alíslenskan bjór í hönd (Nei, hann er ekki að halda á honum fyrir vin sinn):

Danni...þetta er fyrir þig.

~~~

Þrátt fyrir að félaginu hafi formlega verið breytt úr rasistaklúbbi yfir í kristilega kærleikgrúppu, láta sumir meðlimanna sér ekki segjast og skenkja okkur enn af visku sinni um útlendinga. Eftirfarandi gullkorn á til dæmis hún "Sigga Elsa", 17 ára stúlka frá Ísafirði:

Sigga vísar í náttúrufræði og mannkynssögu máli sínu til stuðnings og ljóst er að hún er jafnvíg á báðar greinar. Nútímasaga pólsks aðflutts vinnuafls hringir viðvörunarbjöllum í huga Siggu þegar hún ber hana saman við þekkingu sína af sögu afrísk-ættaðra bandaríkjamanna. Hún vegur og metur alla sína þekkingu á efnisatriðunum og skilar hárbeittri greiningu. Niðurstaðan er sláandi.

Afrískir þrælar komu frá öðru landi rétt eins og pólverjarnir og þeir unnu frekar ódýrt (eins og þræla er von og vísa). Og núna eru sumir þeirra ríkir og frægir eins og Oprah og Obama. Lexían sem Sigga Elsa vill að við meðtökum er einföld. Annaðhvort losum við okkur við pólverjana eða þeir enda á þingi með sand af seðlum og aðal sjónvarpsefnið eftir fjögur hundruð ár verður "Sunnudagskvöld með Gorbúslövu"!!

Svo minna pólskir verkamenn Siggu á glæpagengi hörundsdökkra bandaríkjamanna og það bara gengur ekki. Burt með pólverjana svo Sigga sofi rótt! Þetta er hennar land því það vill svo til að hún fæddist hérna. Peningarnir sem íslensk fyrirtæki greiða pólverjum fyrir þeirra vinnu eru hennar líka...af einhverjum óútskýrðum ástæðum.

Pólverjar og glæpagengi þeldökkra vestanhafs klæða sig gjarnan upp til hátíðabrigða svo vart má greina á milli.

Ég vil enda þetta á að þakka Al Gore fyrir að hafa ekki fundið internetið upp fyrr en eftir að ég sleit barnsskónum. Unglingar eru betur settir á Hlemmi með poka af lími upp á gamla mátann en eftirlitslausir á internetinu þar sem þeir stofna rasistaklúbba og skipuleggja stefnumót með ungum stúlkum sem heita Ágúst Magnússon.

Meðmæli dagsins

2008-02-01T19:32:00.000Z

Ég ætlaði að skrifa eitthvað hrikalega sniðugt og skemmtilegt um bolludaginn sem er á næsta leyti en komst að því mér til mikilla vonbrigða að uppáhalds bollan okkar allra, hann Stefán Stefánsson er búinn að segja allt sem segja þarf um málið. Syndsamlega góður pistill.

Opið bréf til Björns Bjarnasonar

2008-01-24T20:05:00.001Z

Kæri Björn,

Ég sem skattgreiðandi vil mótmæla harðlega framgöngu lögreglunnar í Ráðhúsinu í dag. Ef mér skjátlast ekki dregur hið opinbera háar upphæðir af laununum mínum mánaðarlega og er hluti þess fés notaður til að greiða laun þessarra lögreglumanna. Auk þess er háum fjárhæðum eytt í tækjabúnað og þjálfun til að þeir séu færir í að berja niður óeirðir og ber gífurleg stækkun vel þjálfaðrar sérsveitar þessarri stefnu vitni. Ég spyr því Björn, sem skattgreiðandi og sem áhyggjufullur borgari:

Af hverju voru þessir gólandi hippar ekki settir á fljótandi fæði fram á vorið?? Fyrir hvað er ég að borga eiginlega!?

Til hvers er ég að þræla fyrir heilu fjöllunum af óeirðakylfum og fyrir áskrift að RÚV ef mér er meinað að sitja í makindum og horfa á ofdekraða skrópara í byltingaleik lamda í harðfisk í beinni af fílefldum þjónum réttvísinnar? Hvað lýsir meiri réttvísi en að aðstoða heilan hóp af skrækjandi pabbastelpum og mömmustrákum við að kyngja hálfri milljón af tannréttingum? Mér dettur allvega ekkert í hug!

Björn Bjarnason, í dag brástu mér. Ég stóð í þeirri meiningu að þú værir eini stjórnmálamaðurinn eftir sem ekki er fáviti. Þó þú líkist kartöflukarlinum og segir stundum skrýtna hluti þá deilirðu hatri mínu á tilgerðarlegum krakkaormum í rándýrum skræpóttum fötum sem ganga um með þá grillu að þau séu Mel Gibson í Braveheart um leið og þau finna nokkra aðra apaketti sem nenna að góla einhverja þvælu með þeim. En í dag brást þér kjarkurinn Björn og það sem verra er....þú brást mér.

Hefði ég verið við stjórnvölinn í dag hefði ég orðið við óskum unglinganna og sent fúlustu fantana í vopnabúrinu til að lumbra duglega á þeim og grýta þeim svo beint í tjörnina. Þetta afvegaleidda hyski hoppaði þarna upp og niður, rjótt í kinnum af múgæsingu eftir hávært andlegt hóprúnk, með augasteinana þanda, og sagðist "sko ekki fara fet nema löggan henti þeim út"! Stuttu síðar röltu þau svo út hjálparlaust enda örugglega orðin of sein í upptökur á Gettu betur. Eða á ljóðakvöld á Mokka. Þetta unga fólk er ekki bara vitlaust og óþolandi heldur er enginn töggur í því. Við vitum það báðir Björn, að fyrir svona slytti dugar fátt eins vel og að vera troðinn niður af illvígum hópi brynvarinna rudda á vegum hins opinbera.

Ég vil samt ekki að þú misskiljir mig Björn og haldir að ég sé eitthvað hlynntur þvælunni sem er í gangi þarna niðri í ráðhúsi. Mér er jafnilla við alla þá sem voru niðri á gólfi og þá sem voru uppi á pöllum. Ég er jafnréttissinni og hata alla jafnt. Pólitíkusa þoli ég samt sérlega illa en jafnréttissinninn í mér leyfir mér ekki að gera upp á milli flokka í þeim efnum eins og ég gerði á mínum yngri árum. Eins og þú veist snúast stjórnmál um það eitt að ljúga, smjaðra og blaðra nógu lengi til að vera skipaður sendiherra af einhverjum félaganum svo maður geti eytt ellinni í heitu landi einhversstaðar með milljón á mánuði og ótæmandi bar.

Hverjum er ekki tussusama hver er í borgarstjórn eða ekki í borgarstjórn? Biðlaunin eru vissulega blóðpeningar en það eru venjulegu launin hjá þessum liðleskjum líka.

Sjáðu Dag? Er þessi sjampóauglýsing virði milljónar á mánuði? Maðurinn er með messíasarkomplexa dauðans eins og sást þegar hann stikaði íbygginn í stúkuna í dag til að þagga góðlátlega niður í söfnuðinum, rámur í röddu eftir að hafa líkast til breytt of miklu vatni í kampavín kvöldið áður. Og hvað með besta vin hans, hann Steingrímsson þarna, sem Dagur réði sem einkaritarann sinn fyrir 700 þúsund kall á mánuði? Eru ekki einhverjar reglur sem segja að það eigi að auglýsa hálaunastöður á vegum hins opinbera? Eða gilda þær ekki fyrir þykjustustörf bestu vina pólitíkusa?

Eigum við eitthvað að ræða nýja borgarstjórann hann ÓlaFr? Hann fór að kjökra af því nokkrir menntskælingar búuðu á hann úr öruggri fjarlægð og af því einhver ræfill í mútum sagði að hann væri ekki borgarstjóri? Hvað er svona tussa að gera í valdadjobbi? Ef ég hefði verið hann hefði ég rifið mig úr að ofan og skipað þessum skræka titti að koma niður og endurtaka sig! Ég yrði by the way fokking töff borgarstjóri...en nóg um það.

Svo er það þessi Svandís þarna, sem hreifst svo gjörsamlega af gelgjulegu gólinu, að augun glitruðu og röddin titraði af hrifningu...sem er kannski skiljanlegt enda ekki á hverjum degi sem vinstri grænir heyra fleiri en tvo klappa fyrir sér í einu. Óþarfi að láta það skemma fyrir sér að flestir í salnum megi ekki kjósa fyrr en eftir nokkur ár. Það er samt eitthvað við þessa Svandísi sem ég er ekki að kaupa. Er þetta ekki bara Svavar gamli í dragi? Þetta fá flokkar fyrir að taka upp fléttulista!

Villi...Villi.....ég veit ekki alveg hvað ég á að segja? En það er allt í lagi. Villi veit það oftast ekki heldur.

Björn Ingi er hættur enda fatapeningurinn búinn. Margir eru reiðir útaf því en persónulega er ég feginn að flokkurinn keypti þessi föt handa honum. Ég hefði ekki viljað hafa hann án þeirra í það minnsta! Hann yrði brátt útlits eins og feitur zebrahestur ef hann valsaði um nakinn og leyfði tárunum að flæða óheftum í gegnum allt brúnkukremið! Má ég þá frekar biðja um smá skattsvik.

Ég held samt í hreinskilni sagt að fólk ætti að hætta að eyða orku sinni í að hugsa um stjórnmál og fara að gera eitthvað af viti í staðinn. Það skiptir engu hver af þessum lýðskrumurum er í áskrift að laununum manns. Ég er persónulega hættur að kjósa milli þessarra labbakúta. Ég fer ekki einu sinni til að skila auðu og merkilegt nokk þá ferst heimurinn ekki við það eins og manni er alltaf talin trú um. Tré eru meira virði en pappírinn undir atkvæðið sem enginn fær frá mér. Það að standa inni í kjörklefa í korter til að reyna að velja hvaða hópur af símalandi besserwisserum á að stjórna lífi manns næstu árin er líka ofmetið. Eins og einhver vitur maður sagði eitt sinn..."það er alveg sama hvað maður kýs...maður situr alltaf uppi með einhvern Finn Ingólfsson".

Stjórnmál eru leiðinleg en fíflagangur eins og hefur verið í gangi síðustu mánuði er skemmtilegur. Það er gaman að sjá fólk hringsnúast í hræsni og ljúga sig út úr hverri óþægilegu stöðunni á eftir annarri. Og ef þetta heldur áfram...þá kannski fæ ég að sjá lögguna hoppa á hippum. Ég held í þá von, Björn. Ekki bregðast mér aftur.

Þinn gamli vinur,
Hnakkus

Skák og mát

2008-01-18T15:13:00.001Z

Þær slæmu fréttir bárust íslensku þjóðinni i dag að Bobby Fischer væri látinn. Hann er nú haldinn þann veg sem við öll munum á endanum feta. Yfir móðuna miklu, inn í sali forfeðranna, á bloggið hans Stebbafr.

Annars var ég að renna yfir feril Íslendinga í björgunarmálum fræga fólksins og uppgötvaði að recordið er ekkert alltof gott. Allir frægir sem við björgum úr klóm vondra útlendinga veslast upp frekar hratt eftir komuna til Íslands. Við erum klárlega að gera eitthvað vitlaust og ég vil sjá úrbætur! Fyrst var það Keikó...og nú Bobby Fishcer. Ef ég væri Aron Pálmi myndi mér ekki standa á sama!

Út frá þessu fór eg að hugsa hvort það væri ekki skynsamlegt að fara að gera eitthvað í málum Arons Pálma til að tryggja honum farsæla framtíð. Samkvæmt saksóknaranum Mike Trent er Aron full graður til að ganga laus og ætti helst að vera í búri. Ég er mikill húmanisti og vil ekki ganga svo langt þar sem flest búr óþægileg og illa búin. Það vill hinsvegar svo skemmtilega til að sjókvíin hans Keikó er laus eftir að Keiko hrökk upp af svo ég fékk þá frábæru hugmynd að leyfa Aroni Pálma að búa þar. Hún er rúmgóð og fallega staðsett í friðsælli vík. Hann gæti synt um, leikið listir fyrir ferðamenn og fengið gamla dekkið hans Keikó til að leika sér með svo hann yrði ekki einmana. Hann fengi nóga hreyfingu og yrði því með okkur um ókomna tíð ólíkt forverum hans.

RJF hópurinn virðist hvort eð er vera uppiskroppa með frægt fólk sem þarf að bjarga úr óþægindum svo að þarna væri kjörið verkefni fyrir þá til að spreyta sig á. Aron til Eyja!

Ég legg til...

2008-01-07T10:55:00.000Z

Að Dabbi Grensás verði gerður að þjálfara karlalandsliðsins í fótbolta. Aldrei að vita nema honum takist að berja þá áfram til sigurs.

Rokkað inn í nýja árið

2008-01-01T20:52:00.001Z

Sumir myndu álíta það merki um hrumleika að meika ekki partístand á nýársnótt og kjósa fremur að eyða nóttinni heima við. Ég myndi bjóða slíku fólki allra náðarsamlegast að fokka sér.

Nýársnóttin hjá mér var ein sú villtasta sem sögur fara af í það minnsta og það þrátt fyrir að ég hafi farið heim um svipað leyti og amma. Ég kom heim um tvö leytið og rauk beint í Guitar hero III í nýju playstation 3 tölvunni minni. Eins og sannri rokkstjörnu sæmir kýldi ég í mig einum bjór á mettíma og hófst svo handa við að rokka! Fyrir þá sem ekki þekkja til þá er þessi leikur ansi gagnlegt sjálfsblekkingartól. Maður gleymir því fljótt að í raunveruleikanum heldur maður á litlum plastgítar og hamrar á mislita takka við undirleik rokktónlistar sem aðrir sömdu og léku. Í drukknum huganum var ég að spila öll svölu rokklögin sem ómuðu úr gamla 20 tommu Gigatron sjónvarpinu mínu alveg sjálfur! Áhorfendurnir elskuðu mig og görguðu sig hása af hrifningu við hverja nótu sem ég sló. Jóakim köttur stóð álengdar og horfði á sjóvið, aðframkominn af hrifningu augljóslega.

Í miðju demómísku algleyminu virðist ég hafa rokkað aðeins of óvarlega því allt í einu finn ég hvernig gítarinn dúndrast frekar fast í góðu augabrúnina á mér (ég kalla hana góðu augabrúnina af því hin er örlítið boxaraleg eftir að ég fékk hringspark í augað einu sinni). En ég, verandi vanur slagsmálahundur, finn að augabrúnin muni bólgna ansi illa undan gítarhögginu nema til kælingar komi svo ég hleyp fram í kæli til að finna klaka. Ekki fann ég neinn klaka sama hvað ég gramsaði, og þar sem augabrúnin á mér þandist út á svipuðum hraða og sjáöldrin á Kalla Bjarna á föstudagskvöldi, greip ég næsta poka af frosnum matvælum og skellti á andlitið á mér.

Um þetta leyti var mesta rokkvíman að renna af mér og ég hafði skyndilega tíma fyrir smá sjálfsskoðun. Þarna stóð ég á nærbuxunum um miðja nótt, með bólgið auga, og köttinn vælandi við fæturna á mér (líklega vegna rækjupokans sem þiðnaði óðum á andlitinu á mér). Til að núa salti í sárin höfðu tölvugerðir aðdáendur mínir algerlega snúið við mér bakinu og púuðu á mig í gríð og erg fyrir að stinga af á miðjum tónleikum. Ég ákvað að líklegast væri ekki vitlaust að fara að sofa, slökkti á sjónvarpinu, gaf Jóakim rækjurnar sem ég hafði þiðið með andlitinu á mér, og fór að sofa.

Góðu fréttirnar eru að augabrúnin var fín þegar ég vaknaði enda er andlitið á mér ekkert drasl. Slæmu fréttirnar eru að þegar ég skreið fram úr með vægan hausverk um eitt leytið og kveikti á sjónvarpinu var ennþá verið að púa á mig!...líf rokkstjörnunnar er ekkert grín.

Gleðilegt ár.

Yfirlitsblogg

2007-11-17T17:36:00.000Z

Allir merkustu spekingar landsins skrifa yfirlitsblogg þar sem þeir fara yfir liðna atburði í bútum og ræða daginn og veginn á spekingslegan máta. Björn Bjarnason, Egill Helgason, Stefán Stefánsson...allir hafa þeir skotist upp á stjörnuhimininn og ekki síst vegna þess að þeir skrifa góð yfirlitsblogg. Ég ætla að feta í fótspor þeirra og sjá hvort ég skýst ekki upp til þeirra. Kannski verður vitnað í mig í blöðunum, kannski verð ég ráðherra...kannski fæ ég minn eigin sjónvarpsþátt!

-

Af hverju veit ég hvað "elgspróf" er? Af hverju veit ég að jeppategund sem kallast Toyta Hilux stenst ekki fyrrnefnt elgspróf, heldur veltur út í móa ásamt flóninu sem reynir að beygja skrjóðnum snarlega á 60 kílómetra hraða á klukkustund?? Af hverju er ég að pirra mig á þessu? Það er af því að undanfarnar vikur hafa fréttamenn þvaðrað um það trekk í trekk að þessi jeppatuðra, ein tegund af milljón, standist ekki eitthvað helvítis elgspróf sem snýst um að keyra ekki á elgi og að vegna þess þurfi að innkalla draslið. Gæti verið að það væri einfaldara að senda bara tölvupóst á þá 10-20 einstaklinga sem hafa keypt sér Hilux og hafa í hyggju að keyra ekki á elgi og láta þá vita að þeir þurfi að skila ruslinu á fá það endurgreitt? Gæti verið að öllum öðrum sé alveg drullusama hvort Hilux eigendur keyri yfir elgi eða endi í logandi hrúgu úti í móa??! Eru elgir í áhrifastöðum á fréttastofum landsins!

-

Ég heyrði nýlega af einhverju fyrirbæri sem kallast "Just4kids". Fyrst hélt ég að Ágúst Magnússon hefði verið að fá sér nýtt einkanúmer á bílinn sinn en svo er þetta víst bara enn ein rándýra leikfangaverslunin sem þykist vera ódýr. Þvílíkt antí klímax! Verslunin reynir að upphefja sig í fjölmiðlum með því að auglýsa sérstaklega að starfsfólkið þar tali íslensku og kallar sig svo "Just4kids". Mér finnst það frekar lummó sem þýðir sjálfkrafa að það er lummó. Börn eru samt svo heimsk að þau fatta ekki kaldhæðnina í þessu.

-

Í vikunni heyrði ég vandamálafræðing (takk fyrir töff nýyrði jonas.is) mása og blása yfir einhverri könnun sem sýndi að einhver viss prósenta íslenskra barna sé ekki ánægð með útlit sitt og gefi sér ekki háa einkunn í sjónrænu deildinni. Einnig kemur fram að sum börn telji sig vera of feit. Eins og Mengella heitin benti svo réttilega á eru mörg börn feit og ljót svona rétt eins og við fullorðna fólkið. Það að börnin séu raunsæ er blásið upp sem vandamál og talið vera merki um "vaxandi útlitsdýrkun". Ég spyr á móti...hvort er meira merki um útlitsþráhyggju, að örfá börn í hverjum bekk meti það svo að þau séu ekki vænleg stofustáss, eða að harðfullorðið fólk tryllist af áhyggjum yfir þessum skorti á útlitsöryggi? Er eitthvað möst að allir séu handvissir um að þeir séu fagrir á að líta? Skiptir það máli? Kannski hafa þessi börn nóg annað að lifa fyrir en útlitið eitt. Ef ég væri t.d. beðinn um að leggja kalt mat á getu mína í körfubolta þá myndi ég gefa mér falleinkun án þess að hiksta. Ég hef bara svo margt annað að lifa fyrir svo það skiptir mig engu máli hvað ég sýg mikið í körfubolta. Ég er til dæmis ekki fokkljótur eins og sum þessi börn í könnuninni! Lífið er málamiðlun börnin góð.

-

Að lokum langar mig að deila með ykkur kvörtunarbréfi sem ég sendi Nóatúni í dag eftir að ég kom heim úr verslunarleiðangri. Ég hef nefninlega tekið upp þá stefnu að kvarta undantekningalaust yfir öllu misjöfnu sem ég verð fyrir í viðskiptum við hin ýmsu fyirtæki. Ekki bara af því mér finnst gaman að nöldra og gangrýna heldur af því ég tel að aðeins með því að láta vita af lélegri þjónustu sé einhver von á að hún batni. Kvartanirnar mínar eru líklega ögn lengri en gengur og gerist en að sama skapi vona ég að þær séu pínulítið skemmtilegri en röflið sem verslunarstjórar þurfa venjulega að hlusta á. Ef kvartanir eru læsilegar eru meiri líkur á að einhver taki mark á þeim. Þakkið mér því næst þegar þið farið í Nóatún og fáið bestu afgreiðslu í heimi frá starfsmanni sem er ekki 11 ára!

"Komið sæl.

Ég er ósköp venjulegur neytandi [hér feika ég lítillæti til að fá viðkomandi á mitt band] sem hef tekið upp þann sið að láta vita í hvert sinn sem ég fæ óviðunandi þjónustu hjá fyrirtækjum. Með þessu vil ég leggja mitt af mörkum til að bæta þjónustu og viðmót íslenskra fyrirtækja og deila upplifunum mínum með þeim sem hafa með þessi mál að gera hjá hverju fyrirtæki fyrir sig.

Í dag var ég að kaupa í matinn í verslun ykkar í smáralind. Fyrst fór ég í fiskborðið þar sem ég bað um 200 grömm af laxi. Afgreiðslustúlkan greip laxaflak úr borðinu og skar af því heljarinnar flykki sem augljóslega var mun þyngra en 200 grömm. Vigtin staðfesti grun minn. "350 grömm?" spurði stúlkan þegar úrslitin voru í höfn. "Nei, ég ætla bara að fá 200 grömmin sem ég bað um" sagði ég, þrátt fyrir að uppástunga stúlkunnar um að kaupa nærri tvisvar sinnum meira af laxi en ég bað um væri vissulega athyglisverð. Hún skar því næst einhverja ræmu af flykkinu og spurði hvort ég vildi 264 grömmin sem lágu á vigtinni. "Já já", sagði ég þar sem ég nennti ekki að eyða meira tíma í að þjálfa starfsmanninn í að vigta og skera lax. Ég vil alls ekki vera of smámunasamur en þegar maður stendur frammi fyrir einu hæsta kílóverði í heimi þá fara taugarnar að titra og maður verður nákvæmari en ella . Auk þess finnst mér ekkert óeðlilegt við það að viðskiptavinur sem biður um 200 grömm fái 200 grömm.

Næst víkur sögu að samskiptum mínum við kassastarfsmannin Snjólf Adam (nafni breytt til að vernda starfsmann frá árásum æstra áhangenda minna). Snjólfur ,sem er afar ungur að árum og því forvitinn og fróðleiksfús eins og börn eru gjarnan, handlék avókadó ávöxt sem ég hugðist festa kaup á og spurði.."kaeretta?". "Þetta er Avókadó!" sagði ég, alltaf jafn uppveðraður yfir því að fá tækifæri til að fræða æskuna um lífið og tilveruna. Snjólfur ýtti á einhverja takka, lauk því að rukka mig og afhenti mér strimilinn sem ég ákvað að þiggja hjá honum. Á leiðinni út varð mér litið á strimilinn og sá að ég hafði verið rukkaður um 199 krónur fyrir Alfa Alfa spírur sem ég kannaðist ekki við að hafa keypt. Avókadóið dularfulla var hinsvegar hvergi sjáanlegt á strimlinum.

Mér varð ljóst að færðslustörfum mínum væri hvergi nærri lokið og hélt aftur inn til að benda Snjólfi á þessi mistök. Snjólfur hafði hinsvegar útskýringu á reiðum höndum..."þetta kostar sko svipað"...sagði hann og lét ekki fylgja sögu hvort "svipað" þýddi meira eða minna, nokkuð sem einstaka neytendur láta sig varða við og við. "Já en eru ekki Alfa Alfa spírur seldar skv. stykkjaverði, þ.e. verð per kassa en ekki per kíló eins og avókadó?..þetta er ekki kíló af avókadó?" spurði ég Snjólf Adam. "Já en sko þetta er sko ekki til á blaðinu" sagði Snjólfur til nánari útlistunar á málinu og veifaði laslegum bunka af a4 blöðum sem væntanlega geymdu nöfn ýmissa matvælategunda Snjólfi til glöggvunar. Mér varð ljóst að frekari fræðsla væri aðeins sóun á tíma mínum og Snjólfs þannig ég ákvað að kveðja hann og halda heim með 199 króna avókadóið mitt og 264 grömmin af laxi.

Ég vona að þið hafið haft gagn og gaman að þessari stuttu sögu og að þið veltið fyrir ykkur hvort dýrasta matvöruverslun á Íslandi ætti ekki að íhuga að bjóða upp á ögn fágaðri þjónustu en þetta? Þó börn séu vissulega liðtæk í vissum starfsgreinum, eins og til dæmis í skóverksmiðjum erlendis, þá skortir þau oft þá lipurð í mannlegum samskiptum sem nauðsynleg er í háklassa þjónustufyrirtækjum.

Ég vil enda þetta á að taka það sérstaklega fram að hvorki stúlkan í fiskborðinu né Snjólfur Adam bera neina ábyrgð á stöðu mála í mínum huga, heldur eiga þau vafalaust bæði eftir að ná langt þegar þau slíta barnsskónum.

Ég þakka þeim sem þetta lesa og býð ykkur öllum gleðileg jól.

Kveðja
H."

Meðmæli dagsins

2007-11-12T12:00:00.000Z

Í dag mæli ég með hárbeittum pistli Korntoppsins um múslima. Hér er á ferðinni skörp greining á málefnum miðausturlanda þar sem höfundur fléttar saman sagnfræði, trúmálum og pólitík á skemmtilegan máta. Lesið, og lærið.

Praypride

2007-11-09T19:37:00.000Z

Sögur af andláti mínu kunna að vera stórlega ýktar en það sama er því miður ekki hægt að segja um ungan mann sem var stappaður til dauða í Hafnarstræti fyrir nokkrum árum af óðum krakkhausum. Á morgun ætlar annar morðingi mannsins, Baldur Freyr Einarsson, í náinni samvinnu við þjóðkirkju Íslands og fleiri söfnuði biblíuberjara að leiða "Bænagöngu" frá Hallgrímskirkju og alla leið niður í bæ. Þar verður alþingismönnum afhent einhver áskorun hverrar innihald ég hlakka til að sjá. Ætli áskorunin snúist ekki um bágan hlut kristinna á Íslandi? Kannski vilja þeir fá tvær þjóðkirkjur! Ein er náttúrulega ekkert rosalega mikið.

Hugmyndina að göngunni átti fyrr téður morðingi, Baldur Freyr, en hann kom fram á sjónvarpsstöðinni Omega fyrir nokkru og tjáði trúbræðrum sínum að samkynhneigðir væru ógeð, að Gay pride væri ullabjakk og að það vantaði mótvægi við þessa ógisslegu gleðigöngu samkynhneigðra því eins og allir vita er miklu verra að knúsa einstakling af eigin kyni en að stappa einstakling af sama kyni til dauða útaf engu. Baldur stakk upp á því í framhaldinu að haldin yrði "Praypride" ganga. Nú er gangan orðin að veruleika (HALLELÚJA!) og mun sérann í Hallgrímskirkju, Jón Dalbú (rofl), blessa viðstadda í umboði íslenska ríkisins og Alþingi Íslendinga mun væntanlega í framhaldinu taka við áskorun frá morðingjanum og ímyndunarveikum fylgismönnum hans.

Finnst ykkur þetta ekki æðislegt??!

Auglýsingarnar sem bulið hafa um praypride gönguna á útvarpsstöðvunum eru samt það besta við þetta allt saman.

"Hefur þú orðið fyrir fíkniefnaneyslu! Einelti! Skuldum! Sjálfsmorði!!"

Já, ég lenti í því að verða skuldugur krakkhaus nýlega og varð þar af leiðandi fyrir slæmu einelti. Síðan skaut ég mig í hausinn og dó. Má ég koma í gönguna ykkar???!

Við lifum á umbrotatímum

2007-10-08T12:43:00.000Z

...og í tilefni þessarar stórkostlegu tímamótafærslu Stefáns Stefánssonar um nöfn og blogg hef ég ákveðið að breyta um nafn. Þetta er heilt yfir mikið notalegra. Það er einfalt mál.

Fyrirmæli til aðdáenda minna

2007-09-08T15:50:00.000Z

Ljósmyndaverslunin Beco á Langholtsvegi er okurbúlla og ykkur er hér með bannað að versla þar. Þangað fór ég áðan til að kaupa hreinsigræjur fyrir myndavélina mína og labbaði út átta þúsund krónum fátækari með nokkra hreinsipinna, litla flösku af hreinsilegi og lítinn fýsibelg úr gúmmíi. Af hverju lét hinn mikli bjóða sér slíka vanvirðu? Af hverju löðrungaði ég ekki afgreiðslumanninn fyrir ósvífnina og neyddi hann til að éta innkomu dagsins beint upp úr búðarkassanum? Af hverju tók ég ekki tvöfalt hringspark með heljarstökki og skrúfu beint upp í okrandi anusinn á öllum þarna inni???!

Þannig er mál með vexti að ég fékk að vita með mjög stuttum fyrirvara að ég sé á leið til Kína að sinna mikilvægum sérfræðistörfum og þurfti því nauðsynlega að hreinsa myndavélina mína og linsurnar svo það væru ekki einhver punghár á öllum myndum sem ég tek í alþýðulýðveldinu. Fyrirvarinn er stuttur og ég fann svona hreinsisett ekki í öðrum verslunum en var sagt að þetta fengist í Beco. Þangað fór ég og þaðan kom ég, misnotaður og reiður.

Ósvífni hundingjanna í Beco takmarkast ekki við að níðast á þjóðhetjum eins og mér heldur nær hún slíkum hæðum að þeir dirfast að kalla það tilboðsverð þegar þeir leggja nærri 500% á vöru. Ég fann sama hreinsisett á erlendri heimasíðu á cirka 1200 kall en á heimasíðu beco er það flokkað sem tilboðsvara þó verðið sé skyndilega komið upp í 5490 krónur. Lítinn fýsibelg úr plasti seldu þeir mér svo á 2500 krónur þó hann kosti ekki nema 500 kall á erlendum heimasíðum. Mér líður óneitanlega dálítið eins og Beco hafi átt mök við anusinn á mér en þið áhangendur góðir getið hjálpað mér að endurheimta fyrri reisn og að ná fram hefndum. Ef þið hjálpið mér öll að sniðganga þessa tussuverslun það sem eftir er, þá tapa þeir á endanum á því að hafa okrað á mér. Segið öllum sem þið þekkið að Hnakkus mæli svo fyrir að verslunin Beco sé bannsvæði. Ef einhver sem þið þekkið kaupir eitthvað í Beco, dragið hann út í port og skjótið hann. Dragið hann svo inn aftur og skjótið hann aftur bara til að sýna honum að þið séuð ekkert að grínast! Ég tek það fram að þessi regla er ekki afturvirk svo ég frábið mér að vera margskotinn af aðdáendum mínum fyrir innkaup dagsins.

Hámark kaldhæðninnar er svo uppgötvun sem ég gerði þegar ég opnaði hreinsisettið dýra og rak augun í lítinn hvítan miða sem á stóð...."Made in China". Djöfull er ég pirraður!

Fokkaðu þér Beco!

Veðurfræði götunnar

2007-08-04T06:53:00.000Z

Nýjustu fréttir af einelti á veðurstofunni eru hræðilegar. Veðurstofan er greinilega hart pleis. Oft hafa veðurfræðingar gefið mér góð ráð varðandi veður svo ég ætla að launa þeim greiðann og bjarga þeim frá einelti.

Fyrsta daginn sem nýr veðurfræðingur hefur störf á veðurstofunni þá þarf hann að labba beint upp að stærsta og massaðasta veðurfræðingnum og lemja hann í klessu eða stinga hann nokkrun sinnum með ydduðum hitamæli. Það er eina leiðin til að fá virðingu og frið á svona hörðum stað. Ef þetta klikkar þá er hætta á að viðkomandi veðurfræðingur verji restinni af dvöl sinni á veðurstofunni sem tík annars veðurfræðings.

Hver er ég?

2007-07-25T20:21:00.001Z

Ég er Albert Jensen trésmíðameistari.

Ofbeldisjöfnun

2007-07-21T10:33:00.002Z

Núorðið kannast flestir við hugtakið "kolefnisjöfnun". Fæstir hafa nennt að kynna sér hvað þetta hugtak þýðir og gera sjálfkrafa ráð fyrir því að hér sé á ferðinni einhverskonar tískuhippahugtak fyrir miðstéttafólk með samviskubit. Það er vissulega skarplega ályktað en svo ég útskýri í stuttu máli hvað þetta gengur út á nákvæmlega, þá er þetta sjóður sem þú borgar í ef þig langar að gera yfirbót fyrir mengunina sem jeppinn þinn veldur. Þá ferðu á síðuna Kolviður.is, lætur fé af hendi rakna í samræmi við umhverfissyndir þínar og greiðir þannig laun einhvers framkvæmdastjóra sem eflaust eyðir þeim í sinn eigin jeppa. Þegar laun framkvæmdastjórans hafa verið greidd fer eitthvað af peningunum í að gróðursetja tré til að bjarga heiminum því eins og allir vita er allt í lagi að menga svo lengi sem samviskan er friðuð með því að borga öðrum fyrir að planta trjám fyrir sig. Eða eitthvað.

Eins bjánalegt og þetta allt hljómar varð þetta engu að síður kveikjan að snjallri hugmynd. Þannig er mál með vexti að við búum í heimi fullum af óþolandi fólki sem segir og gerir allskyns vitleysu. Hegðun þessa fólks er í öllum tilvikum afleiðing nokkurs sem ég kýs að kalla vanbeldi. Þetta stefni ég á að laga með ofbeldisjöfnun.

Svo ég renni örstutt í gegnum það hvað vanbeldi er, fyrir þá sem hafa ekki lesið visku mína frá upphafi, þá er vanbeldi skortur á hæfilegu magni beldis og hefur oft hræðilegar afleiðingar í för með sér. Aðallega fávitahátt allskyns. Beldi er skilgreint sem það magn líkamsmeiðinga sem hver og einn þarf á að halda til að verða ekki fífl. Hæfilegt magn er áætlað í samræmi við það hversu mikið fífl blundar í hverjum og einum. Ef einstaklingur þjáist af vanbeldi þarf að beita ofbeldi til að jafna um hann. Sé ofbeldið í réttu hlutfalli við fyrra magn vanbeldis verður ofbeldið að beldi. Gæta skal þess vandælega að beita ekki of miklu ofbeldi því þá verður einstaklingurinn fórnarlamb ofbeldis og það er ljótt eins og allir vita. Hafa ber þó í huga, nú sem endranær, að betra er 'of' en 'van'.

Planið er að stofna sjóð til að laga ójafnvægið milli vanbeldis og ofbeldis. Hugmyndin er að láta sjóðinn heita "Klofvið" þar sem pungspörk verða ein helsta söluvara sjóðsins. Sjóðurinn mun virka þannig að menn munu fara á heimasíðu þar sem þeir geta reiknað út hversu miklir fávitar þeir eru með aðstoð reiknivélarinnar okkar. Þeir verða síðan rukkaðir í takt við niðurstöðuna og síðan lamdir passlega í harðfisk eftir þörfum. Ég sé fram á að þetta muni stórbæta veröldina á einhvern óljósan máta auk þess að borga undir mig stóran og mengandi jeppa sem ég ætla svo að keyra í hringi daginn út og inn til þess eins að græta fábjánana í Saving Iceland.

Hér að neðan má sjá spurningalista sem ætlað er að reikna út vanbeldisstuðul hvers og eins á óvísindalegan máta. Því fleiri stig sem þú færð, því meiri barsmíðar þarf til að ofbeldisjafna þig:

Það er ekki eftir neinu að bíða! Láttu jafna um þig strax í dag!

Loksins hefur líf mitt öðlast tilgang!

2007-07-16T00:43:00.000Z

Tilgangur lífs míns er að lifa Stefán Friðrik Stefánssson svo hann skrifi ekki um mig minningagrein korteri eftir að ég drepst.

Af þjófum og ræningjum

2007-07-10T20:16:00.001Z

Ég lenti nýverið í því að þjófar brutu sér leið inn um glugga hjá mér meðan ég var fjarverandi og svívirtu heimili mitt með nærveru sinni. Auk þess stálu þeir frá mér þremur líters flöskum af sterku áfengi sem ég hefði ekkert haft á móti að fá að svolgra í mig við tækifæri, en skildu eftir öll alvöru verðmæti. Ef þú ert að lesa þetta þjófur þá misstirðu af 30 þúsund króna seðlabúnti sem lá á frekar áberandi stað rétt hjá vínflöskunum sem þú tókst. Nei þetta er ekki lygi til að láta þér líða enn verr með tilgangslausa tilveru þína. Þú ert virkilega svona heimsk/ur.

En víkjum aftur að sögunni. Eftir að lögreglan hafði verið hérna og náð fyrirtaks fingraförum og skóförum (já, þú ert verulega heimsk/ur) hófst ég handa við að tryggja að þetta gerðist ekki aftur. Ég setti upp nýjar og betri læsingar á gluggana hjá mér og lét setja upp öryggiskerfi auk þess að leggja drög að djöfullegum gildrum fyrir þjófa framtíðarinnar.

Skemmtu þér á Hrauninu hálfviti. Bið að heilsa Bóbó.

Þegar ég var búinn að tryggja heimilið og restina af vínbirgðunum fyrir frekari árásum (já þú skildir allt besta stöffið eftir smekklausi aumingi) ákvað ég að hafa samband við tryggingafélagið sem ég hef greitt hluta af laununum mínum til síðustu árin. Ég fyllti heiðarlega út það tap sem ég hafði orðið fyrir, þrjár vínflöskur og ónýta gluggalæsingu samtals að andvirði 14200 krónur.

Hér má sjá svarið sem ég fékk tveimur tímum seinna frá honum Jóni sem er tryggingakall hjá Verði:

"Sæll.

Við höfum móttekið tjónatilkynningu frá þér.
Þessu tjóni er hafnað á þeirri forsendu að tjónsbætur ná ekki eigináhættu.

Vakin er shygli vátrygða á því að telji hann niðurstöðu þessa ranga þá er mögulegt að óska álits tjónanefndar vátryggingafélaganna um Kröfu um vátryggingarbætur.Tjónanefnd vátryggingafélaga er starfrækt á vegum samtaka fjármálafyrirtækja (SFF).

Vinsamlegast hafið samband við Vörð tryggingar hf. Til að fá alit nefndarinnar eða frekari upplýsingar um starfsemi hennar."

Þver neitun, án allrar kurteisi, í tveimur línum af vondri íslensku og nokkrar línur í viðbót af enn verri copy peistaðri íslensku með hvorki meira né minna en fimm villum í. Þetta var allt og sumt eftir að hafa borgað þessum hundingjum með svita mínum og tárum í fleiri ár. Ég gerði það sem mig hefur alltaf langað að gera en aldrei fengið tækifæri til sökum hamlandi skorts á samkynhneigð. Ég skrifaði "Kæri Jón bréf" og sagði Jóni upp. Þegar því var aflokið stóð eftir þessi líka fíni rantur sem ég varð að deila með ykkur. Það er ekki hægt að sóa góðum ranti á mann eins og hann Jón.

"Sæll Jón og takk fyrir að vekja "shygli" mína á þessu áhugaverða og skemmtilega atriði úr smáa letrinu ykkar.

Ég var reyndar að muna núna að ég gleymdi að minnast á allar fartölvurnar sem þeir tóku og gullklumpinn stóra sem ég geymdi undir rúmi. Hvað þarf Lalli Johns annars að ræna miklu af mér til að það borgi sig mögulega að vera í viðskiptum við ykkur? Nefndu tölu svo ég muni hvað fartölvurnar voru margar og klumpurinn þungur.

En svona án gríns þá er þetta bara hlægilegt svar hjá ykkur og þá er ég ekki bara að tala um allar mál- og stafsetningarvillurnar. Ég veit vel að ég skrifaði undir einhvern langan og leiðinlegan samning með einhverju smáu letri þar sem þetta stendur allt svart á hvítu en þið vitið vel að enginn les það og að jafnvel þó einhver myndi þræla sér í gegnum þetta torf, þá myndi það engu skipta enda eru öll tryggingafélögin með nákvæmlega eins lélegar tryggingar.

Hvað gerist svo þegar eitthvað þjófahyski brýst inn hjá mér og ég, verandi temmilega eðlilega innréttaður einstaklingur, sendi inn alltof heiðarlega kröfu vegna tiltölulega ódýrs tjóns sem ég vil samt sem áður fá bætt eftir að hafa borgað ykkur samviskusamlega ár eftir ár? Þið sendið mér tvær línur úr smáa letrinu, segið að kröfunni sé hafnað útaf "eigináhættu" og ætlist örugglega til að ég haldi áfram að moka í ykkur seðlum svo þið getið haldið áfram að bombardera mig með auglýsingum um hvað þið séuð æðislega örlátir og ómissandi??

RANGT!

Það sem ég geri náttúrulega í framhaldinu er að segja þessarri svokölluðu tryggingu upp og legg svo í framhaldinu samsvarandi upphæð inn á banka í hverjum mánuði og á bara sjálfur fyrir tjóninu ef einhver af kollegum ykkar í ræningjabransanum ákveður að ryðjast inn til mín í framtíðinni, óður af þorsta og stelsýki. Það eru líklega talsvert meiri líkur á að vextirnir dugi fyrir tjóninu en að þið komið mér til bjargar. Ef Lalli sest svo öllum að óvörum í helgan stein og kemur aldrei til að sækja restina af draslinu mínu þá á ég fullt af pening inn á banka og get keypt mér brennvín fyrir hann allan. Kannski fæ ég þá líka að drekka það sjálfur til tilbreytingar!

Þú ollir mér vonbrigðum í dag Jón. Ég myndi sækja um Jónsbætur ef ég væri ekki handviss um að smáa letrið coveri það eins og annað.

Kveðja,
Þinn fyrrum kúnni

Skrípó

2007-06-27T00:50:00.001Z

Af tvennu illu...

2007-06-25T20:31:00.000Z

Ég sá í blöðunum eftir að ég kom heim að einhver hneykslisumræða hafði átt sér stað um sífellt betlið í Omega mönnum. Þeir eiga auðvitað skilið að fá á baukinn fyrir lygarnar og ruglið en það var ekki það sem vakti athygli mína. Það sem vakti athygli voru ummæli Hjálmars Árnasonar Dómkirkjuprests sem sagði þessa sífelldu fjárplógsstarfssemi Omega manna vera ástæðuna fyrir því að fólk vildi hafa þjóðkirkju.

Hvaðan Hjálmar hefur þessar víðtæku upplýsingar um vilja almennings er erfitt að segja en líklega er hann mest að tala um sinn eigin vilja og yfirfæra hann á almenning til að gefa honum aukið vægi eins og menn gera gjarnan, meðvitað og ómeðvitað. Það vill nefnilega þannig til að samkvæmt skattstjóra er Hjálmar þessi með milljón á mánuði í laun úr ríkissjóði fyrir að vera opinber jarðneskur umboðsmaður sama ofurdraugs og þeir Omega menn þykjast selja aðgang að. Þessa milljón fær hann án þess að ég sem skattgreiðandi hafi nokkuð val um að neita honum um mitt framlag. Ef Omega menn hafa samband við mig hef ég allavega þann valkost að segja þeim að fokka sér.

Af tvennu illu, má ég heldur biðja um betlara en þjófa.

Hættið að skæla, pabbi er kominn heim.

2007-06-24T17:29:00.001Z

Mikið öfunda ég ykkur núna. Að opna síðuna mína og sjá nýja færslu eftir rúmlega þriggja vikna þurrk hlýtur að vera ólýsanleg tilfinning. Ég veit að vissu leyti hvernig þetta virkar því ég les reglulega gömlu skrifin mín þegar ég er hættur að muna eftir að hafa skrifað þau og ég get vottað fyrir að ég er geðveikt skemmtilegur! Þannig fæ ég að það besta af öllu. Ég fæ að vera næstbesti bloggari í heimi með öllum glamúrnum sem því fylgir, og ég fæ samt að njóta eigin skrifa á sama hátt og þeir sem eru ekki ég. Reyndar þarf ég alltaf að bíða í hálft ár svo þetta er pínu eins og að bíða eftir að mynd komi á vídeó af því maður tímir ekki að borga í bíó. Ég er samt mjög feginn að ég er ég. Ef ég væri ekki ég þá væri ég einn af ykkur og það væri frekar glatað. No offence.

Margir velta því eflaust fyrir sér hvar ég hafi verið á meðan ég var ekki hérna að gefa ykkur ástæðu til að fara fram úr á morgnana. Síðustu þrjár vikur var ég að keyra um Bandaríkin og skoða mig um. Leigður var eðalvagn og hann keyrður eina 6800 kílómetra á þremur vikum. Í Bandaríkjunum er allt stórt og bílaleigubílarnir líka. Að leigja þennan bíl hjá Avis í Bandaríkjunum með ótakmarkaðri keyrslu í þrjár vikur kostaði 69 þúsund krónur. Til gamans má geta að Toyta Avensis (sem kæmist líklega fyrir í skottinu á þessu skrýmsli) með 100 kílómetra keyrslu á dag kostar um 170 þúsund í þrjár vikur hjá Avis á Íslandi. Ísland er svo fáránlega dýrt í samanburði við Bandaríkin að samkvæmt mínum útreikningum er ódýrara að búa á hótelum og borða á veitingastöðum í bandaríkjunum en að búa í íbúð í Reykjavík og versla í matinn í Bónus. Það liggur við að maður spari pening á að fara þangað í frí.

Ég fór um miðvesturríkin frá Minneapolis og alla leið til vesturstrandarinnar þar sem ég heiðraði íbúa kyrrahafsstrandarinnar með nærveru minni. Á leiðinni sá ég margt skemmtilegt. Þar á meðal var Kornhöllin í bænum Mitchell í Suður Dakota. Ástæðan fyrir því að ég varð að sjá höllina var sú að auglýsingar um hana voru á skiltum með 500 metra millibili meðfram þjóðveginum í allavega 300 kílómetra áður en komið var til Mitchell. Slagorð eins og..."Ears to you!"...og..."We're all ears!" voru einfaldlega ómótstæðileg. Árlega skreyta bæjarbúar kornhöllina með kornstönglum og halda hátíð í tilefni þess. Starfsfólk gekk um klætt eins og maískólfar og minjagripir úr korni voru til sölu í tonnatali. Einstaklega gefandi og merkilegt allt saman. Ég hef skoðað margar hallir, meðal annars vetrarhöllina í Pétursborg og ég get með góðri samvisku sagt að engin þeirra jafnast á við heimsins einu kornhöll. Ætli Korntoppurinn viti af kornhöllinni? Hann gæti hæglega gert tilkall til krúnunnar og flutt inn.

Höll úr korni. Kornhöll!

Auglýsingar fyrir kornhöllina voru ekki einu auglýsingaskiltin sem stóðu í vegakantinum. Mörg skilti töluðu um ást Jesú á mannkyni og voru sum skemmtilegar staðsett en önnur...

Kristur og klám - tvær af heitustu söluvörum Bandaríkjanna

Skilti sem löstuðu fóstureyðingar mátti einnig sjá út um allt í öllum fylkjum sem við fórum í og greinilegt að andstæðingar þeirra eru fjársterkir og margir.

Í Bandaríkjunum þykir flott að vera tanaður á bumbunni

Suma daga keyrði maður meira en aðra. Á leiðinni yfir gresjur Suður Dakota var ekki margt að sjá og þá var gott að geta blaðað í tímaritinu Country singles sem fékkst á öllum helstu trukkastoppum. Einmana sálir geta nálgast eintak hjá mér.

Stundum vildi ég óska að ég væri kona á hjólum. Eða fangi með mynd.

Ég vil þó ekki láta hljóma eins og þessi ferð hafi verið þriggja vikna stúdía á lágmenningu og hvítu rusli. Það væri fjarri sannleikanum. Ég sá margt og mikið merkilegt. Þjóðgarða, hvirfilbyli, söfn (sem voru ekki úr korni), villidýr af öllum gerðum, baðstrendur, fjöll, gresjur, eyðimerkur og fleira og fleira.

Maturinn er jafn stórbrotin og náttúran. Allavega skammtarnir. Fyrstu dagana svaf ég slitrótt og dreymdi skrýtna drauma vegna þess að ég var haldinn þeirri grillu að maður ætti að klára af disknum sínum á bandarískum veitingastöðum. Það er hinsvegar ekki ætlast til þess sem betur fer og fyrir vikið kom ég ekki heim með sjúkraflugi. Ef maður fékk sér forrétt þá var maður oftast saddur með hálfan forrétt fyrir framan sig áður en kom að aðalréttinum. Rauðvínsflaska kostar gjarnan svipað mikið á veitingastað þarna og hún kostar í ríkinu hér heima svo ég átti að minnsta kosti ekki í erfiðleikum með að skola öllum matnum niður.

Ég komst líka að því að bandaríkjamenn eru almennilegasta fólk í heimi. Það kom svosem ekkert á óvart en það var gaman að sjá hvað almennilegheit eru almenn þarna. Fólk er nánast undantekningalaust hjálpsamt og opið og kaupmenn okra ekki á manni jafnvel þegar maður er úti í miðri eyðimörk þar sem eru 150 mílur í næstu sjoppu. Það er meira en hægt er að segja um íslenska kollega þeirra allavega. Ég mæli eindregið með svona ferðalagi. Það er merkilega einfalt og ódýrt miðað við umfang og magn upplifana. Bandaríkin eru notendavæn ef svo mætti að orði komast og það er þægilegt að vera gestur þar.

Kannski fáið þið að heyra meira seinna ef ég nenni að segja frá. Kannski ekki samt. Sjáum til.

Sumarfríið mitt

2007-06-01T12:04:00.000Z

Ég er farinn í frí. Ég kem eftir þrjár vikur endurnærður á líkama og sál. Ég hef samið við annan bloggara um að leysa mig af á meðan ég verð frá og hann er búinn að lofa að blogga oft og mikið. Ekki gleyma að líta við.

Ef Lalli Johns er að lesa þetta þá vil ég taka fram að ég fékk félaga minn til að passa köttinn minn og íbúðina mína á meðan ég er frá. Hann er nálægt tveimur metrum á hæð og skartar svörtu belti í bardagaíþróttum. Sá sem reynir að brjótast hérna inn næstu þrjár vikurnar mun því mæta risavöxnum, grimmum fanti og verða rifinn í smátt...svona eins og venjulega.

Vegglistamönnum er sömuleiðis ráðlagt að stunda tjáningu sína annarsstaðar nema þeir hafi sérstakan áhuga á að eyða ævinni í föndra á vernduðum vinnustað.

Þar sem ég hef tryggt með viðunandi hætti að ég sé vel leystur af bæði í skrifum og skefjalausu ofbeldi er mér ekkert að vanbúnaði.

Gleðilegt sumar.

Peningar

2007-05-25T12:59:00.000Z

Það nýjasta í bloggbransanum er að bankar borgi vel sóttum bloggurum fyrir að ræpa á internetið í skiptum fyrir að fá að setja auglýsingabannera á bloggið þeirra. Hingað til virðist þessi tíska aðallega vera bundin við moggabloggið eins og allt sem er rangt í þessum heimi og ég bíð spenntur eftir því að Stebbifr fari að fá greitt fyrir að umorða morgunblaðsvefinn. Af einskærri góðmennsku vil ég bara benda tilvonandi styrktaraðila Stefáns á að semja ekki um borgun per orð. Það væru alvarleg mistök. Jafnvel fyrir banka.

Fyrirtæki hafa hingað til ekki haft sýnilegan áhuga á að fjármagna mín skrif sem er kannski ekki skrýtið miðað við það hvað mér finnst gaman að móðga fólk sem ég hef aldrei hitt. Áhugaleysi peningaaflanna á mér helst reyndar blessunarlega í hendur við áhugaleysi mitt á peningum annarra, og það hversu lúðalegt mér fyndist að láta einhvern banka borga mér fyrir að stunda mín áhugamál. Ef ég væri í boði banka ætti ég líka ekki jafn hægt um vik með að gera grín að bankastjórum Kaupþings. Þessum sem líta út eins og Gög & Gokke.

Þessar pælingar kveiktu engu að síður hugmynd í mínu fagra en banvæna höfði. Ætli til sé það fyrirtæki á Íslandi sem væri til í að borga 50 þúsund krónur á mánuði til SOS barnaþorpanna í skiptum fyrir penan auglýsingaborða á síðunni minni? Díllinn yrði þannig að ég myndi vilja fá kvittunina senda í hverjum mánuði og ég myndi áskilja mér þann rétt að sýna hana öllum þeim sem bæðu um það. Einnig yrði skýrt tekið fram að viðkomandi fyrirtæki hefði engin áhrif á það hvað ég skrifa eða hvernig ég skrifa það, og að þeim yrði vinsamlegast bent á að fokka sér ef einhverjir slíkir tilburðir yrðu hafðir í frammi.

Mér finnst þetta ekki slæm hugmynd. Ef viðkomandi fyrirtæki lenti í böggi fyrir að styrkja sóðakjaft á netinu þá væri allavega hægt að benda á að peningurinn færi óskiptur til góðgerðamála en ekki beint í að fjármagna neteinelti á Stebbafr og Guðmund í Byrginu. Þetta væri líka fínt fyrir mig og bloggletina því ef ég hætti að blogga þá deyr fullt af litlum börnum í Afríku.

Netfangið er hnakkus@gmail.com ef einhver hefur áhuga.

Uppeldisstörf í skjóli nætur

2007-05-21T20:49:00.001Z

Veggjakrot er vaxandi vandamál í miðbænum sem og annars staðar eins og margir hafa tekið eftir. Sjálfur er ég einn af þeim sem geng um með mikla heift í hjarta í garð veggjakrotara. Húsið mitt hefur fengið að kenna á krassinu margoft og ég hef jafn oft þurft að gera mér ferð í rándýrar byggingavöruverslanir til að kaupa rándýra málningu vegna óstjórnlegrar listhneigðar mömmustráka í pokabuxum.

Veggjakrotarar eru eins og hvolpar sem er ekki búið að kassavenja og sá fyrsti sem bendir mér á að þetta sé list í kommentakerfinu fær að launum óumbeðna kennslu í annarskonar list. Bargadalist! Krassarar eru ekki þeir einu sem geta verið listrænir á kostnað annarra. Hægri fóturinn á mér getur til dæmis búið til stórkostlegt abstrakt listaverk úr veggjakrotara áður en hann svo mikið sem nær að krota erfðaskrána sína á vegginn hjá mér!

Til að afgreiða þetta list/ekki list argjúment strax þá skiptir náttúrulega engu máli hvort einhverjum finnist eitthvað vera list eða ekki. Ef viðkomandi gerir listrænar þarfir sínar á minn vegg þá er komið upp vandamál. Þetta er ekki spurning um eðli verksins heldur það að veggurinn er minn. Fokking Picasso yrði klínt á gangstéttina ef hann kæmi út úr tímavél og málaði á vegginn minn.

Lengi hefur mig dreymt um afleiðingar þess að standa loks einhvern að verki með spreybrúsa í hendi. Í huganum sá ég fyrir mér í slow motion hvernig ég myndi spóla organdi með risavaxið glott inn í stærðar þvögu af hortugum skoppurum og koma út hinu megin í rauðu mistri, þakinn blóði og bling bling. Ég sá fyrir mér svífandi derhúfur með höfðum innanborðs, pör af nike skóm standandi yfirgefin á stéttinni eftir að eigandinn hefði verið kýldur upp úr þeim og mæður grátandi glötuð tækifæri til almennilegs uppeldis á fyrrverandi sonum sínum. Draumar mínir voru blautir...af blóði.

Síðastliðið föstudagskvöld rann svo stóra stundin upp. Ég sat heima hjá mér með ískaldan bjór og spilaði skotleik sem ég er háður þessa dagana. Ég ímyndaði mér að fórnarlömb mín í leiknum væru unglingar með hegðunarvandamál í stað bandarískra dáta. Skyndilega fannst mér ég heyra skvaldur úti í sumarnóttinni sem var hlý og still og glugginn því opinn upp á gátt. Ég rauk á fætur og skildi skotleikjahnakkus munaðarlausan og bjargarlausan eftir á vígvellinum. Ég læddist út í garð og gægðist yfir vegginn þar sem ég sá veru í risastórri hettupeysu haldandi á spreybrúsa. Hver einasta taug í líkamanum skaut neistum og adrenalínið pumpaðist út í grjótharða vöðvana. Ég stökk jafnfætis yfir vegginn á sokkaleistunum og spændi í átt að listamanninum. Hann nýtti illa þær tvær sekúndur sem hann hafði til að bregðast við, og starði vantrúaður á mig þar sem ég nálgaðist á stökki, froðufellandi. Ég greip lúkufylli af hettupeysu og sneri fast upp á svo andstæðingur minn lyftist upp á tábergið. Hann var ekki að fara neitt. Ég reif spreybrúsann úr hendinni á honum, hristi hann duglega og hófst handa við að spreyja hettupeysuna svarta. Mér til mikillar mæðu rann adrenalínvíman nægilega af mér til þess að ég áttaði mig á því að helvítis peysan var svört til að byrja með. Það var því litla gleði að fá út úr þessu formi hefndar. Það var um þetta leyti sem ég heyrði eitthvað ámátlegt tuð útundan mér og áttaði mig á því að hann var ekki einn. Vinur hans var greinilega með honum í för og þegar ég leit við sá ég strákling sem gat ekki verið eldri en 13 ára. Ég leit betur á þann sem ég hafði í haldi og sá þá að hann væri ekki mikið eldri sjálfur.

"Hvað ertu að gera?" spurði mjóróma vinurinn óttasleginn.
"Hvað er ég að gera!?!" hreytti ég út úr mér og benti á klisjukennt nýklárað krassið á veggnum mínum. "Hvað eruð þið að gera!?!!"

"Átt þú þennan vegg???" Spurði sá fangni þar sem hann dinglaði titrandi úr hramminum á mér.
"Auðvitað á ég þennan vegg!?" frussaði ég forviða út úr mér. "Hver í andskotanum annar ætti að eiga þennan vegg!!?"

"Ég hélt þetta væri eign ríkisins??!" Stamaði hann í örvæntingarfullri tilraun til að bjarga sér frá tortímingu.

"Eign ríkisins??!...Hversvegna í andskotanum ætti þetta að vera eign ríkisins??" Baulaði ég, meira hissa en reiður, enda fáfræði unglingins um eignarétt minn á veggjum gjörsamlega sláandi.

Þá heyrðist meira óttaslegið tuð frá vininum á kantinum..."Bidd'ann bara afsökunar mar....bidda'nn bara afsökunar!"

"Þegi þú það var enginn að tala við þig" sagði ég þar sem ég stóð á sokkaleistunum úti á stétt um miðja nótt með ólögráða, kjökrandi ungling og alla hans framtíð hangandi milli fingra mér.

"Það er best að ég hringi á lögguna strákar" sagði ég eftir örstutta umhugsun og byrjaði að draga þá í átt að húsinu. Það var ljóst að þeir myndu ekki átta sig á mikilvægi eignaréttarins fyrr en eftir nokkur ár á hrauninu.

Þrátt fyrir glæparapparaklæðnaðinn leist honum ekki á vist á hrauninu. "Nei plís mar! Plís ég get ekki lent í þessu núna! þú veist ekki hvernig foreldrar mínir eru!" vældi jólaskrautið og byrjaði að streitast á móti svo ég varð næstum þreyttur í litla puttanum.

"Ekkert rugl strákar" Sagði ég. "Þetta þarf bara að fara sína leið í kerfinu!"
"Nei plís mar plís mar!" Vældi hann svo tárin frussuðust í allar áttir.

Á þessum tímapunkti var ég orðinn frekar þreyttur á þessarri miðnæturbarnapössun og var þar að auki farið að þykja þetta væl allt saman hálf vandræðalegt. Ég sleppti takinu á peysunni og leyfði blóðinu að renna aftur út í fingur mína enda var engin hætta á að listamaðurinn kæmist langt á litlu brauðfótunum sínum.

"Sko...strákar..." sagði ég. "Þetta krass er fokking óþolandi. Þetta er hérna upp um alla veggi og það eru allir orðnir hundleiðir á þessu rugli í ykkur þið hljótið að átta ykkur á því!"

"Já algjörlega!!" Samsinntu þeir í kór af miklum móð. Ég var mátulega sannfærður en nennti ekki skýrslugerð né Herdísi Stoorgaard svo ég ákvað að þeir væru búnir að fá nóg í bili.

"Ef ég sleppi ykkur við lögguna núna, ætliði þá að lofa að gera þetta aldrei aftur?"

"Já mar! Við lofum því! Þetta er algjört rugl sko!" Sögðu þeir með einlægri ákefð og hafa vafalítið trúað sér sjálfir þangað til þeir komu fyrir hornið.

"Ok ég tek þá brúsann og drullið ykkur svo í burtu og látið mig aldrei sjá ykkur hérna aftur" sagði ég og gaf mér tíma til að þiggja frá þeim sitthvort þakkarhandartakið áður en þeir hlupu í burtu sjúgandi upp í nefið.

Upprifinn yfir miskunsemi minni og stórmennsku hélt ég aftur inn til að halda áfram í skotleiknum en fann þá örent hræið af mér liggjandi á vígvellinum og bjórinn flatan á borðinu. Það er ekki ofsögum sagt að laun heimsins séu vanþakklæti.

Sloppy Seconds

2007-05-12T17:35:00.000Z

Frá kosningavöku Hnakkusar þegar úrslitin voru í höfn

Um daginn hringdi í mig kvenmaður og spurði með augljósum aðdáunartón hvort ég væri ekki örugglega hinni eini sanni Hnakkus. Slíkur hversdagsleiki væri náttúrulega ekki í frásögur færandi nema fyrir það að þessi stúlka sem er blaðamaður á fréttablaðinu tilkynnti mér að ég hefði verið valinn næstbesti bloggari á Íslandi, í könnun sem fréttablaðið lét gera meðal 30 sérfróðra internetsjúklinga.

Loks hefur það verið staðfest vísindalega að ég er æðislegur. Ég hef klifað á þessu í áranna rás við dynjandi lófatak þeirra sem kjósa að lifa lífinu án stoðtækja frá Össurri, og lágvært tuð þeirra sem kjósa að lifa á brúninni. Ef einhverjir voru ekki löngu sannfærðir um andlega og líkamlega yfirburði mína þá ætti blaðsíða 50 í fréttablaðinu í dag að taka af allan vafa. Það eina sem spillir trylltri gleðivímunni er að þessi rauðhærði úr silfrinu skyldi lenda í fyrsta sæti. Þó ég sé sé víðsýnn og frjálslyndur á alla kanta þá var ég að vonast til að komast í gegnum lífið án þess að lenda undir Agli Helgasyni. Hvað þá að vera skinkan í samloku með honum og Dr. Gunna!

Eins og vonda stjúpa Mjallhvítar fíla ég ekki að vera settur í annað sætið og Egill veit hvað þessi úrslit tákna fyrir hann. Heyrst hefur að hann sé þegar flúinn úr landi og sé farinn að leigja gamla pleisið hans Salman Rushdie.

Það sem er náttúrulega merkilegast við þessa kosningu er að það finnist 30 manns á Íslandi sem ég hef ekki móðgað persónulega í gegnum tíðina. Til dæmis hef ég móðgað báða þá sem komust á verðlaunapall með mér í þessarri kosningu. Geri aðrir betur. Ég hef síðan móðgað nokkurn veginn alla sem voru á listanum yfir verstu bloggarana og er leti örugglega eina ástæðan fyrir því að ég hef ekki gefið mér tíma til að græta þá alla.

En svo ég endi þetta á íþróttamannslegum nótum þá vil ég þakka þeim úr dómnefndinni sem kusu mig og óska Agli til hamingju með fyrsta sætið. Og ef Dr. Gunni er að lesa þetta.....In your face! HAHAHA! Rúst!!

Umsóknarflokkurinn

2007-05-02T22:14:00.000Z

Spillingin er óvenju sýnileg á Íslandi um þessar mundir....

Sieg hola

2007-04-29T10:55:00.000Z

Grunnskólakennarinn Andrea Marta Vigfúsdóttir ætlar á næstunni að halda til Spánar og að eigin sögn "hafa það gott og lifa á örorkubótum í sex mánuði".

Þetta aldeilis frábæra plan væri varla í frásögur færandi ef ekki væri fyrir þá skemmtilegu staðreynd að fyrir nokkrum árum var Andrea innsti koppur í félagi Íslenskra þjóðernissinna ásamt bræðrum sínum tveimur sem gegndu hlutverki formanns og varaformanns. Á vefsíðu félagsins, sem nú hefur verið tekin niður, mátti finna grein eftir Andreu sem hét "Að vera Íslendingur". Greinin tók á málefnum innflytjenda á svo beinskeyttan hátt, að meira að segja Magnús Þór hafsteinsson hefði snúið sér við í gröfinni við lesturinn....og hann er ekki einu sinni dauður!

Þó greinina sjálfa sé hvergi að finna á netinu lengur er hún enn í fersku minni og finna má búta úr henni á bloggsíðum sem fjölluðu um málið á sínum tíma. Hér eru nokkrir góðir bútar:

"Þó höfum við hingað til verið nokkuð viss um að hér séu fallegustu konurnar, sterkustu mennirnir, fallegasta náttúran, besta vatnið, besta skemmtanalífið"

"Á Íslandi búa jú bara hraustir víkingar, sem geta hróðugir rakið ættir sínar til eigi ómerkari manna en Egils skalla Grímssonar!"

"Það að vera stoltur af því að vera Íslendingur og það hvítur, þykir ekki lengur gott, þaðer ljótt.
Að vísu þykir ekkert óeðlilegt við það að fólk af afrískum uppruna þrammi um jörðina í beltislausum buxum og hrópi hvað það sé stolt af því að vera frá Afríku og hvað hvíti maðurinn sé vondur við það"

"Þessi undirlægju- og væskilsháttur sem íslensk stjórnvöld sýna í hvívetna þegar kemur að þessum málum er með öllu óþolandi. Af hverju megum við bara ekki vera í friði hér á okkar litlu, köldu eyju þar sem engir aðrir en hvítir menn hefðu getað komist eins langt og raun ber vitni?"

"Ef við erum svona vond við útlendinga, afhverju geta þeir ekki bara farið eitthvað annað? Því miður hafa ekki komið fram nein skýr eða gáfuleg svör við þessum spurningum og er það því enn skoðun mín að fólk sem kemur hingað frá fjarlægum löndum til þess eins að lifa á félagslega kerfinu, stunda vændiog eiturlyfjasölu, gerir enga tilraun til að læra tungumálið eða samlagast okkar samfélagi á einn eða annan hátt, ætti bara að drífa sig til síns heima, og það hið snarasta!!"

Síðasti búturinn er í dálitlu uppáhaldi hjá mér. Ég trúi því ekki öðru en að verðandi innflytjandinn Andrea ætli að gera sitt ítrasta til að forðast þessar gryfjur sem innflytjendur falla gjarnan í að hennar mati. Að sleppa vændinu og eiturlyfjasölunni ætti að reynast henni hægur leikur þar sem tryggingastofnun sendir henni hluta af skattpeningunum mínum mánaðarlega til að draga fram lífið. Þar með lifir hún að vísu á félagslega kerfinu, en ekki á félagslega kerfinu í landinu sem hún býr í þannig að hún kemst lipurlega framhjá þeirri gryfju. Þá er aðeins eftir að huga að tungumálakunnáttu Andreu og aðlögun hennar og þar er ég tilbúinn að koma til bjargar. Ég gerði mér lítið fyrir og snaraði einum af bestu frösunum úr greininni hennar yfir á spænsku svo hún geti sagt öðrum innflytjendum til syndanna á lýtalausri spænsku.

"Þetta land var byggt upp fyrir okkur, ekki fyrir fólk frá öðrum löndum!"

Sem á spænsku myndi vera:

"Este pais fue hecho para nosotros, no para la gente de otro paises!"

Hafðu það annars gott í útlandinu Andrea, njóttu launanna minna vel, og láttu þessa skítugu útlendinga heyra það!

Stebbi stóð á ströndu

2007-04-11T11:38:00.000Z

Stefán Friðrik Stefánsson er ókrýndur konungur moggabloggins og þess helsti sendiherra. Á blogginu sínu skrifar eilífðarungliðinn að norðan allt að sjö pistla á degi hverjum, án þess þó í rauninni að segja nokkurn skapaðan hlut. Hann er Íslandsmeistari í andlegu stórsvigi karla.

Stefán er frægur fyrir að klifa á því í annarri hverri setningu að hann hafi skoðanir sem hann sé óhræddur við að tjá. Téðar skoðanir eru engu að síður afar sjaldséðir gestir í pistlunum hans, sem eru mestmegnis endursagðar fréttir úr mainstream fjölmiðlum. Stílfræðilega myndi Stebbi líklega flokkast sem jórturdýr. Hann hefur þann háttinn á að hann tekur frétt sem allir eru búnir að lesa og umorðar í sífellu daufar hugleiðingar sínar um viðfangsefnið. Þannig tvítreður hann, þrítreður og margtreður strýið uns eftir stendur einhvers konar mantra sem lesendur geta kyrjað með sjálfum sér til að öðlast hugarró.

Ég læt hér fylgja uppskrift að Stebba pistli:

1 Stk. frétt af mbl.is.
1 Stk. of mikill frítími.
1 Stk. samheitaorðabók.

Umorðið efni fréttarinnar. Endurtakið eftir þörfum.

Tveir af nýjustu pistlunum hans eru æði og ég verð að minnast á þá sérstaklega(Þessi og þessi). Í þeim fyrri furðar Stebbi sig á athyglinni sem fjölmiðlar veita lífi stjarnanna en í þeim næsta beint á eftir japlar hann á faðernismálum Önnu Nicole Smith af miklum móð auk þess sem hann fellir dóm um ævi hennar, en samkvæmt Stebba var hún ein samfelld sorgarsaga. Þetta fannst mér skondinn dómur komandi frá Stebba þar sem ég er nokkuð viss um að Anna Nicole hefur oft skemmt sér betur á einu kvöldi en Stebbi á allri sinni ævi. Kannski er hann bara súr af því faðernisprufan féll honum ekki í vil.