Hnakkus

Ég rakst um daginn á síðu þar sem hægt er að horfa á beinar útsendingar á HM í gegnum ESPN2 sjónvarpsrásina. Af því ég er góður, fallegur og réttlátur maður hef ég ákveðið að deila þessum fjársjóði með ástkærum áhangendum mínum. Mér virðist fólk almennt vera haldið þeirri grillu að það þurfi annaðhvort að borga 365 ljósvakamiðlum þrefaldað áskriftargjaldið að Sýn, eða að sitja á reykfylltum knæpum til að sjá leikina. Það er mikill misskilningur.

Farið á www.viidoo.com. Þar þurfið þið að downloda smáforriti sem heitir TUV player og þá getið þið klikkað beint á hina ágætu rás ESPN2. Þar eru leikirnir sýndir í beinni í lýsingu tveggja amerískra þula sem þrátt fyrir þjóðerni sitt virðast vita muninn á football og soccer nægilega vel til að lýsa leikjunum af stakri fagmennsku. Ef ske kynni að einhverjir lesendur mínir hafi fæðst andvana þá verð ég víst að taka fram að þetta er að sjálfsögðu erlent niðurhal svo að ef þið eruð ekki að borga fyrir ótakmarkað niðurhal, þá mun óhóflegt HM gláp gegnum internetið mjög líklega verða ykkur dýrara að bíltúr af djamminu heim í Árborg. Mig rennir hinsvegar í grun að flest séuð þið klámsjúkar skepnur með öflugustu gerð af internettengingu og þurfið því engu að kvíða.

Nú er ég búinn að redda ykkur fríum fótbolta og finnst að þið ættuð að redda mér fríum bjór í staðinn svo ég geti setið ölvaður fyrir framan tölvuna og glápt á restina af þessu móti, marineraður í eigin góðmennsku og örlæti.

Niður með einokunarkaupmennina!

Nýlega fékk ég senda mynd í pósti af lítilli stelpu sem býr í Chad í Afríku. Ég á víst að heita styrktarforeldri hennar og fyrir það greiði ég 2300 kall á mánuði með milligöngu SOS barnaþorpanna. þetta lítilræði nægir til að borga allt hennar uppihald og skólagöngu og fyrir vikið þá á hún séns á að lifa og vonandi njóta lífsins í stað þess að deyja úr malaríu eða hungri eins og önnur börn í nágrenninu sem eru ekki jafn heppin og hún.

Ástæðan fyrir því að ég er að segja frá þessu er ekki að upphefja sjálfan mig enda er ég engin hetja fyrir það að leggja smá brot af mánaðartekjunum í þetta og ég vil ekki koma út eins og einhver millapungur sem passar sig að láta fréttastofurnar vita í hvert sinn sem broti af tekjunum eru hent í góðgerðarstarfssemi. Það er ekkert afrek að hugsa um eitthvað annað en sinn eigin rass annað slagið. Það sem mig langar að gera hinsvegar er að hvetja aðra sem hafa hugleitt að gera eitthvað svona, til að láta verða af því. Sjálfur hafði ég oft látið mér detta þetta í hug en aldrei látið verða af því fyrr en nýlega.

Það eina sem þið þurfið að gera er að klikka HÉR og láta vaða. Það tekur ekki einu sinni fimm mínútur, og kostar ekki nema 2300 á mánuði að bjarga lífi. Nokkuð cool.

Ef þið þurfið frekari hvatningu þá get ég bent á það að til þess að halda uppi þessum áður óþekkta lúxuslífsstíl sem flokkast undir hversdagslíf hér á vesturlöndum þurfa menn konur og börn í þriðja heiminum gjarnan að eyða sínu lífi í að vinna fyrir sama og ekkert til að sjá okkur fyrir ódýru drasli. Oft hefur maður heyrt að þrjár manneskjur í þriðja heiminum vinni fyrir engu nema brýnustu lífsnauðsynjum alla ævi til að okkar hagkerfi geti haldið hverju einu okkar uppi í nútímalúxus. Þetta er tækifæri til að skila einu lífi til baka fyrir upphæð sem ekkert okkar munar einu sinni um.

Ef fólk vill hinsvegar frekar kaupa eitthvað annað en mannslíf fyrir 2300 krónurnar þá er ég með fleiri hugmyndir. Fyrir 2300 krónur má t.d. fá eitt af eftirfarandi:

Stóra pizzu á Dominos
Tvær kippur af bjór
Bland í poka fyrir 2300
Áskrift að skjánum í mánuð
Tæpa 3 bíómiða
Tvær kippur af bjór handa mér

Ég mæli frekar með mannslífinu samt. Það er ekki fitandi og veldur ekki tannskemmdum. Það er heldur aldrei neitt gott í bíó og skjárinn sökkar...meira að segja eftir tvær kippur af bjór