Hnakkus

Síðast þegar ég bloggaði um rappara fylltist gestabókin á gamla blogginu mínu af allskyns hótunum og djöfulgangi. Áhangendur glæparapparans Móra voru staðráðnir í að myrða mig vegna skrifa minna um kappann ef eitthvað var að marka gallharðar internethótanirnar. Ég er ennþá að jafna mig og því ætla ég að vera jákvæður og uppbyggilegur í skrifum mínum um rappara, bæði í þessarri færslu sem og framvegis því hver vill láta fylla sig af blýi fyrir að tjá sig á internetinu? Ekki ég allavega

Á vafri mínu um internetið rakst ég á íslensku rappsveitina Busta Bitches úr Árbænum. Ef maður rýnir í texta drengjanna í Busta Bitches sést fljótt að þarna eru á ferðinni harðir gangsterar sem gera fátt annað en að flengja kellingar og drepa eða berja þá sem bögga þá. Þetta væri svosem ekki í frásögur færandi nema vegna þess að þeir félagar eru varla 40 kíló að þyngd og ekki kynþroska enn. Þeir eru nefnilega 12 ára.


Við skulum líta á nokkur textabrot af heimasíðu þeirra félaga og byrjum á laginu I'm" a hustler:

"L.A.P.D. chasing me/
Acting like they can arrest a B'/
i´ma gangster somthing like that/
Don´t go around not bringing a gat/

Báðir

I´ma i´ma hustler/
Bonafide...BUSTA/
I'ma i'ma hustler/Bonafide...BUSTA/"

Eins og sjá má er hægt að læra margt af því að hlusta á rapptónlist. Þarna komst ég til dæmis að því að lögreglan í Los Angeles virðist vera með lögsagnarumdæmi í Árbænum þar sem hún eltir 12 ára krakka sér til skemmtunar. Það vissi ég til dæmis ekki áður.

"Yeahh i allways got a pistol in my pant's/
nife in my sock/
and a sticker in my pocket/
to sign these autograph's/
yeahh i'm so toff i only sign breast's with my hands/
Yeah i'm so toff/
to fucking BUFF/"

Af myndunum af Þeim félögum að dæma er engu til logið í þessum texta. Þeir eru hættulegir að sjá og eflaust með sokkana alveg stappfulla af hnífum og öðrum heimilisáhöldum. Auk þess eru þeir svo sannarlega "Too fucking BUFF" báðir tveir. Það er langt síðan ég hef séð svona massaða tólf ára stráka og þeir verða eflaust enn hrikalegri þegar þeir ná kynþroska. Ef áfram heldur sem horfir verða þeir kannski orðnir jafn stórir og sumar stelpurnar í bekknum innan skamms og þá kannski þurfa þeir ekki að standa upp á stól til að árita brjóstin á aðdáendum sínum.

Næsta lag með þeim félögum heitir I know you like me og er ekki síður merkilegt en hið fyrra. Þarna telja strákarnir upp hinar ýmsu ástæður fyrir því að stelpurnar er vitlausar í þá:

"Danni suco rappar

i know you like me cuz i'm rich,pretty and nice/i know you like me cuz always when were to gather we have realy good time’s/i know you like meeee/I know you like me girl when I bang you in my bed/I know you like me when I tung kiss you like that/

fannar rappar/

yeah i'm never going back do L.A./
those bitches never pay/
if you get an tatto it will never go away/
cuz i ain't no gay/
i'm just siting here and i will stay/"

Ýmislegt hefur greinilega breyst síðan ég var barn. þegar ég var tólf ára þá voru stelpur ekki alveg hættar að vera ógeð og það eina sem maður gerði í rúminu var að sofa. Rúmið mitt var ekki beint skakkt og snúið eftir óteljandi nætur af villtu kynlífi. Maður var heldur ekki nógu duglegur að ferðast til LA til að eltast við tíkur og fá sér tattú. Þeir hljóta að fá meiri vasapening en ég var með. Ég þarf að ræða þetta mál við mömmu við fyrsta tækifæri því það er ljóst að ég var hlunnfarinn!

Skýringunaa á drjúgum fjárráðum þeirra félaga má kannski finna í þessarri færslu af bloggsíðunni þeirra:

"20/4/06
Röppuðum á sumardegi 1 .Fengum þúsund krónur á man.."

Tveir dauðir biskupar! Ekki slæmt strákar! Ég veit ekki hvað maður fær mikið af bling bling og tíkum fyrir 1000 kall nú til dags en ef þið haldið áfram að troða upp fyrir stóra seðla þá er þess varla langt að bíða að þið verðið jafn tattúveraðir og Bubbi Morthens og Sigga Beinteins til samans!

En áfram með smjörið!:

"I know you like meee/For beying a G’/I know you like meee/Cuz I get it for free/"

Þarna er rappað um kvenhyllina sem hlýst af því að vera í fríu fæði og húsnæði hjá mömmu sinni. Það er allavega það sem ég held að sé átt við þar sem 12 ára strákar fá varla mikið annað frítt í þessum heimi. Ég tek það fram að það eru liðin nokkur ár frá því ég var lítill strákur svo það er séns á að ég hafi rangt fyrir mér.

Ég rakst síðan á þessa Íslensku rímu þar sem Danni Suco tjáir sig um textasmíðar sínar og lífsstíl:

"ég reini að semja hvað sem er það kemur ekkert/
það eina sem kemur er enskur TEXTI!!/
fólk segir a' eg se að gera brandara úr mér/
þvi eg rappa a ensku og rappa um að eg se hustler/
og þvi að eg klæði mig eins og svertingi spila körfubollta/
og drekk eins og alvöru coce-isti/"

Þarna er nú aldeilis ekki að sjá að það komi eingöngu enskur TEXTI frá rapparanum unga enda er þarna komin þessi líka flotta ríma á gullaldar íslensku. Reyndar mætti hún actually ríma...en hey...það er hugurinn sem gildir! Stay black!

Danni Pí á svo líka texta á móðurmálinu sem slær þeim hér að ofan ekkert við:

"Geng í Gallabuxum og exodus húfu/
Abbast uppá mig/
Mun ég brjóta þína rúðu/
7.undi IH er minn bekkur/
Gangsta rapp er minn smekkur/
Busta-bitches er nafnið á mínu Crewi/
Þun lína milli klappi og búúúúúi/
Í lífinu vilja allir komast langt/
En fyrir það gera margir rangt/
Ég reyni að ekki berja fólkið sem ég sé/
En ég verð stundum svo æstur að ég get ekki hjálpað mér/"

Eins og þið sjáið var mjög skynsamlegt hjá mér að skrifa uppbyggilega um strákana í Busta bitches því annars myndi ég enda með brotna rúðu! Beat that Tupac! Hver þekkir svo ekki þessa þörf sem kemur upp þegar maður sér fólk? Maður reynir að ekki berja það en stundum verður maður svo æstur að maður getur ekki hjálpað sér. Mössuðu folarnir í Busta bitches ríma um þessa litlu hluti í daglega lífinu sem allir kannast við og það er held ég það sem gerir tónlistina þeirra svo aðgengilega.

Ég vona að þið, lesendur, góðir hafið haft gaman að þessarri tónlistarumfjöllun. Ég bíð að minnsta kosti spenntur eftir fyrstu plötunni og kem til með að standa í biðröð í Skífunni til að láta árita á mér kassann. Píz át my niggaz.

það var eitthvað lítið til að borða hérna sem passaði saman samkvæmt hefðbundnum kenningum svo ég ákvað að vera frumlegur og prófa að raða einhverju saman úr því sem var til. Útkomuna ákvað ég að kalla..."Fusion Tortillur Hnakkusar". Uppskriftin er eins og hér segir:


2 tortillur
4 sneiðar af osti
gomma af feitu þriðja flokks áleggshangikjöti

Ostinum er skellt á tortillurnar og hann bræddur í örbylgjuofni. Hangikjötinu er því næst hrúgað á, tortillunum rúllað upp og öllu draslinu troðið ofan í vélindað á meðan hugsað er um eitthvað fallegt.

Þetta var semsagt vægast sagt ógeðslegt og afsannaði kenninguna um að nokkrir bragðgóðir hlutir hljóti að bragðast vel saman. Krakkar...ekki reyna þetta heima.

Hangikjöt, ost og tortillur ætti ekki einu sinni að geyma í sama skáp! Allavega ekki ef Hans Blix er í nágrenninu og manni finnst ekki gaman að lenda viðskiptaþvingunum. Ég þarf örugglega að kaupa Kyoto kvóta áður en ég fer á salernið í dag og ef þetta spyrst út verð ég sviptur sjálfræði fyrir að vera sjálfum mér hættulegur. Ég er ekki að ýkja...þetta var líklega versti matur sem ég hef smakkað fyrir utan humarsúpuna á Vegamótum. Samt kláraði ég tvær einingar af þessum óþverra. Þegar ég hugsa til baka þá kláraði ég reyndar líka humarsúpuna á Vegamótum...

Ég er semsagt annaðhvort mjög harður...eða sálarlaust átvagl. Ég hallast að venju að því sem hljómar betur.

Bon appetit!

Það virðist vera mikið í tízku að tala um varnarþörf Íslands og þar sem ég er óöruggur ungur maður sem þorir ekki annað en að marsera í takt við fjöldann þá langar mig aðeins að drepa niður penna varðandi þetta eldheita mál sem er í harðri samkeppni við fuglaflensuna um verðlaunin fyrir leiðinlegustu klisju ársins.

Varnarþörf Íslands, líkt og hin hugsanlega mögulega farsótt fuglaflensa, er ekki til. Allavega ekki ennþá og ekki í nenni fyrirsjáanlegri framtíð sem nokkur lifandi maður hefur getað útlistað. Það vill enginn ráðast á Ísland og það er enginn að fara að ráðast á Ísland, enda til hvers? Við eigum ekki neitt nema smávegis fallvatn, dálítið af jarðhita, Kalla Bjarna og sjö milljón ferkílómetra af mislægum gatnamótum. Einu sinni áttum við að vísu slatta af fiski en það er löngu búið að ofveiða hann allan og skafa sjávarbotninn eins og happaþrennu svo varla er Osama Bin Laden á leiðinni hingað til að gerast sægreifi. Við erum svo óspennandi að við eigum ekki einu sinni óvini. Það hatar okkur enginn nóg til að koma alla leið hingað og ráðast á okkur og ekki færi nokkur þjóð að hernema okkur með ærnum tilkostnaði til þess eins að þurfa svo að hlusta á einhverjar verðandi seðlaskreytingar þusa í sér um sjálfstæði næstu 200 árin. Ég efast meira að segja um að það sé til sjálfsmorðssprengjumaður í heiminum sem er svo leiður á lífinu að hann myndi nenna að koma hingað til að sprengja sig upp þó kvótinn hans af hreinum meyjum yrði dobblaður! Let's face it folks...við erum ekkert sérlega sexí skotmark. Í darraðardansi alþjóðastjórnmálanna erum við ljóta stelpan sem enginn býður upp.

Allskyns sjálfsskipaðir sérfræðingar hafa sprottið út úr veggjunum undanfarið og röflað um þessa meintu varnarþörf okkar án þess þó að einn einasti þeirra færi út í smáatriði um hver hún nákvæmlega væri (enda er hún engin). Minnstæðastir voru einhverjir tveir stjórnmálafræðingar sem voru kannski ekki svo minnisstæðir eftir allt saman því ég man ekki hvað þeir heita eða hvar ég sá til þeirra. Ég man að þeir voru báðir með gleraugu ef það hjálpar. Þeir félagar lögðu lítið til málanna um þessa meintu varnarþörf (sem er ekki til) heldur voru þeir aðallega að hneykslast á ráðamönnum fyrir að hafa ekki kynnt sér þessa meintu varnarþörf (sem er ekki til) á meðan tækifæri gafst....líklega af því að nú væri það of seint eða eitthvað. Þeir sjálfir virtust hafa efni á að hneykslast út í hið óendanlega yfir þessu öllu, þrátt fyrir að hafa ekkert til málanna að leggja sjálfir, enda er það löngu vitað að stjórnmálafræðingar við háskóla Íslands eru helstu sérfræðingar heimsins þegar kemur að varnarmálum.

Ég er ennþá að bíða eftir að einhver komi með eitt mögulegt dæmi um ógn við Ísland sem Íslendingar gætu afstýrt með því að "skilgreina varnarþörf sína" eða með því að "taka ábyrgð á eigin vörnum". Bara eitt. Það eina sem ég hef heyrt minnst á í hálfkæringi hingað til er að það "séu náttúrulega til hryðjuverkamenn sem geti gripið til aðgerða hvar sem er" og eitthvað álíka heimskulegt bull sem hljómar alltaf eins og menn séu búnir að horfa á of marga þætti af Tvenní for. Menn verða líka hálf sauðslegir í framan þegar þeir láta eitthvað svona út úr sér enda er þetta næsti bær við að tala um fljúgandi furðuhluti þegar þú býrð á útnáraskeri úti í rassgati sem enginn nennir að ráðast á. Það fengist ekki hryðjuverkamaður hingað þótt við myndum borga undir hann flugið fram og til baka. Meira að segja Paul Watson nennir ekki lengur að hræða okkur með borvélinni sinni og þó er hann eini hryðjuverkamaðurinn sem hefur litið við okkur hingað til.

Lítið skandínavískt velferðarríki úti í miðju norður atlantshafi sem verður of upptekið af varnarmálum og hernaðarrugli, er eins og hræddur lúði sem fer á aikido námskeið þrisvar í viku til að læra að verja sig fyrir öllum ljótu köllunum og dópistunum og bíður stöðugt með hjartað í buxunum eftir tilefnislausu árásinni sem hlýtur að koma einn daginn. Ef svo ólíklega vill til að einhver nenni að ómaka sig við að ráðast á lúðann, þá er hann að sjálfsögðu laminn í klessu eins og hefði gerst hvort eð er...af því eftir allt saman þá er hann bara lúði sem getur ekkert varið sig þó hann æfi aikido og sé með plakat af Steven Seagal í herberginu sínu.

Þrátt fyrir hvað þetta er allt heimskulegt þá hef ég skemmt mér ágætlega yfir ruglinu sem undist hefur ofan af undanfarnar vikur. Ríkisstjórnin hefur verið með andlitið skorðað fast milli rasskinna bandaríkjastjórnar síðustu árin til þess að kría út áframhaldandi hernaðarviðbúnað í landinu og gert okkur að hinu aumasta leppríki í von um að einhver 600 störf á miðnesheiðinni haldist óbreytt en þó aðallega til að íslenskir ráðherrar fái áfram að eiga mikilvæg símtöl við einkaritara aðstoðarmanna bandaríkjaforseta á tyllidögum. Síðan gerist það að Hvíta húsið fær leið á að gamna sér með ljótu stelpunni af ballinu, og dömpar okkur til að hafa meiri tíma fyrir aðra og skemmtilegri bólfélaga. Ráðherrarnir, sem vilja greinilega ekki fara úr karakter, bregðast við eins og unglingsstúlkur í ástarsorg og keppast við að koma fýluyfirlýsingum sínum í fjölmiðla og væla um að Bandaríkin hefðu átt að reyna að ræða málin betur við okkur.

Bandaríkin kippa sér lítið upp við allt kveinið og gefa Íslendingum 200 bækur um varnarmál svo við getum reddað okkur sjálf. (RTFM!). Þetta útspil hlýtur að vera það allra kvikindislegasta sem hefur komið frá Bandaríkjunum í lengri tíma og þá tel ég fangapyntingar og idolið með! Þeir láta sér ekki nægja að dömpa ljótu stelpunni af ballinu þegar þeir eru búnir að fá sitt, heldur gefa þeir henni "The idiot's guide to masturbation" í sárabót.

Það hefði vissulega verið stuð ef endir hersetunnar hefði verið að okkar frumkvæði. Það er samt næstbest að sjá ríkisstjórnina skríða grenjandi á eftir þeim og afhjúpa undirlægjuhátt sinn og þrælslund svo ekki verður um villst.

Landsbyggðin stendur í björtu báli þessa dagana. Bráðum verður hægt að leggja niður bæði Byggðastofnun og Framsóknarflokkinn og við verðum loks frjáls. Ég vil samt nota tækifærið og óska vinum mínum í Borgarnesi alls hins besta nú þegar lokastundin nálgast. Ég vona að þeir muni brenna fallega þegar þeirra hinsta stund kemur og lýsa upp vorhimininn eins og þeir lýstu upp tilveru mína oft á tíðum.

Aprílgabb

Ef þið farið niður á höfn þá er hvalur fastur í höfninni og hann er fullur af gulli og landa líka. Fyrstir koma fyrstir fá!